دورينا يقتل مع سبق الاصرار واتحاد لايعرف حتى قوانين الفيفا

تغريدة واتساب

بقلم معاذ ابومؤيد
دورينا يقتل مع سبق الاصرار
واتحاد لايعرف حتى قوانين الفيفا

فجاءة ومن دون مقدمات
تنزل برمجة الدورة الثانية
لاحس لاخبر
المشكلة مافي البرمجة
المشكلة حصلوا زمن وين يبرمجو بيه دورينا!!!
كل دول العالم الثالث والاقل من الثالث تبرمج دوريتها من بداية الموسم وفي بعض الدول البرنامج ثابت مع تغير اسماء الفرق
الا عندنا والسبب معروف!!!!
ناسنا ناس قريعتي راحت
واتحاد الطاسة الضائعة
برمجه داخل برمجة
والمتضررين كتااااااار
اندية
ورعاة
وقنوات ناقلة
وحتى الخدمات المساندة للدوري!!!!
وبعدين معاك يااتحاد الطاسة الضائعة!!!!
••••••••••••••••••••••••••
مين البتحمل المنصرف دا
ليها حق الاندية تدخل في ديون
عشان اتحادنا يقتل في المنافسة الاولى مع سبق الاصرار والترصد
نفس الاشكال والخلق
في اتحادنا من سنين والمحصلة صفر!!!!
وبعدين !!!!
يعني ننتظر حتى متى
عشان يحصل تغيير
اتحاد لعبة الكراسي
مره نائب رئيس
ومرة سكرتير
ومرة رئيس
اختلاف مسميات ومخصصات
وتغيير بدل
والمحصلة نفس الجماعة قاعدين
الفيفا تتغير وناسنا قاعدين
وترتيب منتخبنا كم في عهدهم!!!
حتي مدرب المنتخب اصبح من لعبة الكراسي
نفس الجهاز الفني مونسنا بالسنين
نفس الدكة مع كل منتخبات افريقيا
المنتخبات تلاقينا سنويا فيها تغيير
ومنتخبنا نفس الناس
وبعدين!!!!!
••••••••••••••••••••••••••
مسك الختام
منظومة مشقلبة
ومناصب لاتخرج من نفس الاشخاص
وكلو شايت علي كلو
اندية ومنتخبات تفشل خارجيا
واتحاد يعاند محليا
قضايا تحل بالجودية
واشخاص لانشاهدهم الا في التسجيلات!!!!
لاعبين ينتقلو ويوقعوا ومحترفين جايين ومحترفين بيعملوا مخالصات
كل شي متغير الا اصحاب الصور والابتسامة حتي البدلة ياها لونين اذرق واسود وبدلة زرايرها كبار !!!! وبرضو كنب المدرسة بتاع التسجيلات بوهية مابضربوه!!!!
••••••••••••••••••••••••••
ونحن علي المدرج ندعم ونشجع ونتفرج
نفس الملامح مقسومة علينا سنويا
حتى بتاعين التزاكر نفس الجماعة
شفع الكور وبتاعين الاسعاف
محطة واحدة واقفين فيها من سنين!!!
نحن نكبر وهم ماشاءالله محافظين حتى الشيب مابغشاهم!!!!
المدرجات كبرت
والاستادات شاخات
وحتى هتافاتنا اتغيرت
ماعدا اتحاد كرة القدم واقف محلك سر
التغيير الوحيد من شارع البلدية للخرطوم ٢!!!!!
••••••••••••••••••••••••••
همسة اخيرة
ياكابتن برهان بالله قرض علي الشباب ديل
وياريت من سن ٢٧ سنة وانت نازل
عايزين نعيد للمريخ سيرتة الاولى
عايزين روح شبابية تعمرالمكان وتعم الميدان
المريخ لايحتاج الا الانضباط ومعاه شوية خطط وحركات
ارفعوا شعار العلامة الكاملة في الدورة الثانية
تاني ماعايزين حاجة
طمنونا بتشكيلة شبابية ونحن نساعدكم بالتشجيع والصبر
••••••••••••••••••••••••••
خارج النص
سوق الشتل شغال قرش ونص
وناس الشتل ماشين يتكاثروا
واللعنة امتدت حتى لاعمدة الكتاب
مرات تنقل باضافات!!!
ومرات محاولات تقليد!!!
ومرات مقصوصه!!!!
وسوق الشتل ماذال مستمرا
واخر شتلات اليوم عقوبات الاتحاد الافريقي!!!
العقوبات طالت حتى امير كمال!!!
ويتواصل مسلسل الشتل
والغريبة نحن نديهم فرصة!!!
ربنا يرحمنا من فضلوا
ويبعد عننا اصحاب الشتلات وبائعي الكلام المفبرك
لنا عودة للعلاج باذن الله
••••••••••••••••••••••••••
لامتلاك بطاقة تهنئتك
راسلنا علي الواتس
٠٠٩٦٦٥٩٢٠١٦٨٤٨
تكون باركت للحبان
وتكون دعمت الكيان
الفكرة تتلخص في معايدة ابونا المريخ،،،،،،
••••••••••••••••••••••••••
# تغريدة طبية:
لكي تنعم بصحة أفضل، استعمل الملح باعتدال في أطباقك الرمضانية. استعيض عن ذلك باستعمال الخضار، الأعشاب والبهارات لكي تضفي مزيداً من النكهة والمذاق الطيب إلى وجباتك!
وربنا ينعم علي الجميع بالصحة والعافية
••••••••••••••••••••••••••••
# تغريدة مرورية:
وراء كل حادث مخالفة مرورية
والموبايل يشكل نسبة كبيرة من الحوادث المرورية
اصل واتصل
اتصالك مهم لكن حياتك اهم
لاتسرع فالموت اسرع،،،،،
وربنا يكتب السلامة للجميع
••••••••••••••••••••••••••هذه اراء التغريدة اقبل منها ماتشاء وارفض منها ماشئت..
التغريدة تنقل نبض المدرج والقروبات وتقف في مسافة واحدة من الاحداث ،،،،،
نحاول ان نلفت الانتباه لبعض الاحداث والنقاط بواقعية……..
التغريدة لن تخرج خارج نطاق المجتمع المريخي نهائيا الا ماندر
نقد الذات يوصلنا الي الامام والي المنصات باذن الله ،،،،،
ادعمونا بالنصح والارشاد وصححونا إن اخطأنا في يوم من الايام ،،،،،،،،

حمل تطبيق كورة سودانية لتصفح اسهل

لزوارنا من السودان  على متجر 1موبايل

http://www.1mobile.com/net.koorasudan.app-2451076.html

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app

لزوارنا من الصين الشعبية

http://www.androidappstore.mobi/EN/displayproduct/112531/playstore