صحيفة كورة سودانية الإلكترونية

دي ماقروبات…….. دي مجموعة قنوات في العربسات………

20

تغريده واتساب
بقلم : معاذ ابومؤيد
دي ماقروبات……..
دي مجموعة قنوات في العربسات………

عدد قنوات العربسات وقروبات المريخ نفس العددية ونفس الكمية ..
هناك تمسك الرموت وهنا تتعب صباعك من التنقل بين القروبات
بس المتعة في القروبات أجمل من القنوات…
المقارنة انتو شايفنها بعيدة لكن دي الحقيقة كل مقومات القنوات متوفرة في القروبات …
برامج يومية من كرسي ساخن وأقوال الصحف و أعمدة الكتاب وفقرات إعلانية تحت تحت …
ناس تعمل افتتاحية وناس ماسكة الاشراف و الوردية ناس تنسق مع ضيوف الكرسي الساخن وناس تضيف اعضاء جدد وناس ماسكين اعلان النفرة …
وتقولوا لي قنوات الديجيتال !!!
اراهن ان معظم الصفوة ماتمسك رموت الرسيفر الي لم يمر اعلان في معظم القروبات عن ضيف مهم
او في نقل مباراة …
لكن السواد الاعظم ساكن في القروبات سكنة
وماسك الموبايل علي مدار اليوم يدعم ويكتب ويوعى وينقل الاخبار ..
قروبات تفرح وتعوضك عن اي وسيلة إعلامية!!
كل الوجبات الإعلامية موجودة علي القروبات ….
جرب وقارن بين قنوات وبين القروبات !!
*************************
بعض القروبات فيها أضافة لكبار الصحفيين واللاعبين والاعلاميين وبعض الاداريين !!
المشرفين يتسابقون لإضافة بعض الاسماء اللامعة للقروبات حتى يكون للقروبات واجهة ومنصة جيدة …
لكن رسالة للمشرفين تاكدوا انو القروب هو الإضافة للجميع وإضافة للإعلاميين والكتاب وليس العكس …
وبعض الكراسي الساخنة التي تتم في القروبات تشكل مادة صحفية دسمة لبعض الكتاب وفي معظم الاحيان معظمهم ياخد المعلومة من القروب ويشوف راي الشارع والراي العام ماشي وين ….
**************************
لجنة التسيير بعد الشكوى من الفقر البوصلة الان تتجه للاعلام والتزمت الواضح من اعضاء لجنة التسيير من الاعلام !!
بس حبينا نفكر لجنة التسيير الحاصل الان من فعل ايديكم ونتاج لمراوغتكم وتعتيم المعلومة عن الجميع وخاصة في القضايا المهمة للشارع المريخي
راوغتوا في الاول وتحصدون المراوغة الان …
تصريح الريس لصحيفتين خلال ٤٨ساعة عندو الف دلالة ومعنى …
واهمها الشكوى من الاعلام المريخي !!
**************************
نجي للبحث عن هدف لكن ياميرفت ماعصرتي علي الامين العام العصر دا كنا عايزنو للجار لكن تقول شنو بس ياسعادتك عجبتنا الكاريزما وعجبنا الثبات ونطق الكلمات والحضور المميز واجمل حاجه انك ماقلت انك الامين العام ولامرة..
امس الحلقة مشت سريع لكن قبل اسبوعين الحلقة كانت طويلة بطول كلمات انا الرئيس!!
بس ياسعادتك اجابتك علي سؤال ميرفت عن الصحيفة مابرد بطن المذيعة ومابرد بطن المشاهدين وانا اولهم ….
ابعدوا البنزين من النار عشان الباقة ماتنفجر في لحظة تخلعكم وتخلعنا …
ورسالتنا واضحة والشارع عامة عندو راي في حاجتين علي الصحيفة !!
الأداره والدعم الواصل للصحيفة …
**************************
بعثة المريخ تغادر الي القاهرة للمعسكر طبعا دي محمدة لكن سفرنا الطوالي قطاعي دا ماحبابو معقولة بس سفرنا بقى ذي ميزان الجبنة كل مرة نخت قطعة عشان نجيب الوزن ….
القطاعي دا مابشبهنا
القطاعي دا في ضررنا…..
**************************
ختاما
استمتعوا بالقروبات وانسوا القنوات …
بس الموبايل مافيه ترتيب للقروبات ذي القنوات!!
الترتيب هنا للمشاركة والفعالية في القروب ….
والحمد لله حركة القروبات عندنا في ارتفاع نفرات تفرح تملأ العين السبت قرب والقاصي والداني حيعرف انو خلف المريخ شفوت يسدوا عين الشمس
**************************
ونحن علي المدرج نشجع ونتفرج ومنتظرين يوم السبت لتسليم النفرات والقروبات بقت هي الذاد في الميعاد
الدافع جنيه والدافع عشرة جنيه كلو من اجل الكيان
وكلو حيبقى تاريخ للاجيال القادمة……
كشكش جيبك عشان باكر
وكشكش جيبك عشان مريخنا في الخاطر ،،،،،،

 

تغريدة واتساب

قد يعجبك أيضا
اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد