رابطة الدوحة تقدم شغل لوحة والمستفيد دائما هو الكيان

تغريدة واتساب
معاذ ابومؤيد
رابطة الدوحة تقدم شغل لوحة
والمستفيد دائما هو الكيان

ياناس الدوحة يوم شكركم مايجي
كل مره تورونا حب الكيان كيف
نفتش لمجلس ادارة في امدرمان
وانتو في الدوحة احلي ادارة واحلي عنوان،،،
مركب انقاذكم كل مرة تقدم للمريخ طوق النجاة!!!
ومامستغرب عليكم
ووقوفكم مع جميع الادارات بنفس المستوى ونفس الخط،،،
ماعندكم علاقة بفلان او علان
دروس لناس التكتلات والتجمعات!!!
كل التجمعات المريخية شافت ولمست شغل الدوحة،،،
كان زيارات شخصية اومن علي البعد،،
شكرا شكرا شكرا
دوحة العرب
•••••••••••••••••••••••••
لجنة الاستثمار في رابطة الدوحة بقيادة الحبيب محمود الجلعوب تضع خارطة الطريق ،،،،
بعد كدة كرسي الرئاسة متاحة للجميع ،،
تاني ناقصين ناس الفكر الاداري
يعني الجماعه الابتعدت عشان الصرف المالي!!
دربكم اخضر ،،،،،
حنغني ليكم قرب تعال ماتبتعد
زبدة الاتفاقية كالاتي
التوقيع على مزكرة تفاهم بين المريخ والمجوعة العربية الصينية
ورابطة قطر. فحوها الاستثمار في إنشاء مول ونادي صحي في الجزء الشمالي الغربي للاستاد بالإضافة الي صالة أفراح وفندق في قطعة الحتانة.
ومثل المريخ مسؤل الاستثمار الصادق حاج علي ومثل المجموعة العربيةالصينية المالك الدكتور سيد بابكر التلب ومثل الرابطة المدير المالي مجزوب مجزوب محمد ومدير الاستثمار محمود الجلعوب بحضور رئيس الرابطة الدكتور فيصل همت ونائب الريس مولانا عبد الحميد أبو قصيصة والأمين العام د حسن مجمر ونائب الأمين العام د حسام مكي وأمين الإعلام امجد مصطفى
اتفق الأطراف علي زيارة الشركة الي السودان في وقت عاجل لمعاينة المواقع والتوقيع علي العقود النهائية والبدء في تنفيذ المشاريع باعجل ما تيسر باذن الله……
غالبا الزيارة الاسبوع القادم
نتمنى من الروابط والقروبات العمل علي احتفالية تليق بالوفد القادم وعكس صورة طيبة عن المريخ ،،،
وان تكون الاحتفالية في الاستاد عشان الشركة تشوف عظمه الجمهور ،،،
وان تستثمر الاحتفالية لزيادة دخل الخزينة ماليا عبر احتفال مصغر يشمل مباراة واحتفال غنائي ونضرب اكتر من عصفور بحجر
القروبات والروابط الحوبه حوبتكم الجاية ،،،،
••••••••••••••••••••••••••
ختاما
شكرا رابطة الدوحة وكل من كان علي راس الفكرة والتطبيق والتنفيذ
واجمل مافي الامر انو رابطة الدوحة كل شئ بالكتمان
بعد الشغل ينجض تملك الحقائق للجميع،،،
لكن في اماكن تانية الاجتماعات والمشاريع منقوله علي الهواء مباشره!!!!!
•••••••••••••••••••••••••
ونحن علي المدرج ندعم ونشجع ونتفرج
ودعمنا تاني عبر المشاريع دي
حنموت معاها عديل عشان نطلع من حكاية لجان التسيير والاستقالة!!!
وتشجيعنا تاني حيكون بنفس
ويرجع لينا التيفو وجماليات المدرج،،،
وفرجتنا حتكون في المول وفي المرافق الملحقة بالاستاد
قولوا يارب ياصفوة
••••••••••••••••••••••••••
همسة اخيرة
منتظرين من باقي الروابط الخارجية التحرك في ملف التدريب وشعار الفريق!!
الموسم دا كل الملفات بايدي الروابط والقروبات ماشاء الله تبارك الله
علاج لاعبين
تسجيل لاعبين
معسكرات خارجية
مشاريع استثمارية
تاني الباقي شنو بالله عليكم
ربنا يخليكم للمريخ الكيان
غايتو الجمهور المريخي اثبت انو رقم لايمكن الوصول اليه حاليا
داخليا وخارجيا
•••••••••••••••••••••••••
خارج النص
ياناس المريخ ملف التدريب حاليا حيكون هاجس لنا !!!
ياناس الحقونا بمدرب يهتم بالمواهب الشابة في المريخ
محتاجين مدرب فنان
يخلد صوره جميلة في الاذهان
ماضروري مدرب كبير اسما
عايزين مدرب طموح وتكتيكي
مدرب يجيد العامل النفسي ،،،
فتحي الجبال الانسب خارجيا
لغة عربية مفهومة للجميع
وسعر ماغالي وسيرة فنية فيها طموح،،،،،
وفاروق جبره الاقرب داخليا
انضباط وتكتيك وابن من ابناء النادي والجميع يشهد له بالكفاءه،،،
افتحوا الملف دا من غير خوف طالما قدامنا زمن للدورة الثانية،،،،
اكسبوا الجمهور بتلبية طلباته
والجمهور ماقصر مع الكيان،،،
ماعندنا مانخسره هذا الموسم !!
مدرب ممكن يجذب الجمهور للمدرج ،،،،
مدرب فنان يرجع جمهور المدرجات
•••••••••••••••••••••••••
تغريدات مرورية
القيادة الامنة راحة لك وللاخرين
رمضان جاي نسق زمنك قبل الافطار
ونخلي الجري الفي الطرقات
الطريق يشيل من الحبايب كتير
لاتنسى،،،،،،
اتصالك مهم
وحياتك اهم واهم
لاتتصل الا حين تصل
نتمني السلامة للجميع
••••••••••••••••••••••••••
للتغريدة نقاط واراء اقبل منها ماشئت وارفض منها ماتشاء
تغريدة بصوت مسموع تعبر عن اراء الكثيرين وحالهم ومنقوله بلسانهم ومربوطة بنبض المدرج،،،،،،،،،،
••••••••••••••••••••••••••

حمل تطبيق كورة سودانية لتصفح اسهل

لزوارنا من السودان  على متجر 1موبايل

http://www.1mobile.com/net.koorasudan.app-2451076.html

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app

لزوارنا من الصين الشعبية

http://www.androidappstore.mobi/EN/displayproduct/112531/playstore