رمضان عجب ومحمد الرشيد اخبارهم شنو؟
صابنها
محمد عبدالماجد
رمضان عجب ومحمد الرشيد اخبارهم شنو؟
______________________
• ابوعشرين عرفها ، احترم كلمته وطبق الاحتراف زي ما بقول الكتاب ، وهو الآن يقود الهلال من انتصار الى انتصار.
• ابوعشرين لاعب محترف بمعني الكلمة.
• نجاحات ابوعشرين ليست حصرية فقط على الهلال ، بل قاد ابوعشرين المنتخب الوطني لانتصار كبير وعظيم على المنتخب الغاني.
• الزول دا لعب مع المنتخب 90 دقيقة امام المنتخب الغاني ولعب مع الهلال في البطولة الافريقية 180 دقيقة.
• 270 دقيقة تبارك الله ما استقبل مرماه هدف.
• لا امام غانا ولا امام فايبرز.
• 270 بشباك نظيفة.
• دي بتتلقى وين؟
• في مباراة الهلال وفايبرز اليوغندي احد الزملاء كان يجلس الى جواري في المقصورة الرئيسية ، انفعل وغضب وكورك في دفاع الهلال عندما ابعد ابوعشرين (كرة) خطرة من قلب المرمى بعد ان لعبت في مرمى الهلال من خط 6.
• قلت لهذا الزميل …دفاع الهلال قاصد الكرة دي – عشان ابوعشرين يحلل قروشه.
• وعشان ناس المريخ (المغصة) تكتلهم.
• وعشان نحن نستمتع.
• الواحد بقى يفرح لمن الدفاع يغلط ..عشان نشوف تجليات ابوعشرين.
• عشان نستمتع.
• تغلطوا انتوا يا حلوين ..يجيكم ابوعشرين بالاعذار.
• ولا بتلفت.
• اول نحن ابوعشرين جايبنو لي شنو؟
• جايبنوا مخصوص لمثل هذه الكرة.
• جاينوا عشان الغلطات دي.
• انت يا حسين الجريف ما محظوظ.
• حسين الجريف لو محظوظ كان يكون حاضر ابوعشرين دا.
• كان مهما يغلط …ابوعشرين بصلح الغلطة.
• نحن في الهلال عاوزين نستمتع بهذه الفدائية وبإخراج الكرة بتلك الصورة.
• انا اول مرة اشوف لي حارس مرمى (ثعلوب).
• يطلع ليك الكورة من القون زي الشعرة من العجين.
• الكرة كانت (هدف) مضمون للفريق اليوغندي ، لكن ابوعشرين ما شاء الله عليه (اتكشح) ليك في الكورة ، واتمدد في المرمى واخرجها بكل سهولة.
• عشان كدا وفي وجود ابوعشرين ..عاوزين ناس اوتارا والطيب عبدالرازق ووضاح وارنق ما يقفلوها شديد.
• اغلطوا شوية بين الفينة والاخرى.
• عاوزين مرة مرة كدا يفوتوا ليهم كورة.
• عشان نشوف ابوعشرين.
• وعشان ناس المريخ (المغصة) تشقهم.
• عليكم الله انتوا لو عندكم رأس تفكوا ابوعشرين وتمسكوا في رمضان عجب ومحمد الرشيد.
• رمضان عجب ومحمد الرشيد لو جاءوا للهلال كان هسع بكونوا (لافين) الملعب.
• ما عندهم طريقة في وسط الهلال.
• وسط الهلال فيه عبدالرؤوف وجيسي وبوجبا قاعدين في (احتياطي).
• يعني رمضان عجب ومحمد الرشيد يلعبوا وين؟
• والله (مقصورتنا) مقفلة.
• السنة دي ما عندنا أي طريقة.
• غايتو رمضان عجب ومحمد الرشيد إلّا يلعبوا عن طريق (المداورة) ، لكن عشان يلعبوا عديل كدا ما اظن.
• ما عندنا أي طريقة.
• بالمناسبة دي – انتوا وين الاسماء دي؟
• وين رمضان عجب؟
• وين الزول محمد الرشيد؟
• عليك امان الله اختفوا نهائي من الوسط الرياضي.
• انتوا يا الطاهر يونس ويا نزار عوض مالك …الجماعة ديل عملتوا ليهم شنو؟
• بالله رمضان عجب ومحمد الرشيد في مباريات المريخ (الودية) بقوا ما بظهروا.
• والله (ادبة) زي دي انا اصلي ما شفتها.
• انتوا عارفين لو رمضان عجب ومحمد الرشيد بيلعبوا الآن في الهلال ما كنا بنستمتع زي الاستمتاع دا.
• ما في احسن من كدا.
• ابوعشرين.
• وبوجبا.
• والغربال.
• ومؤيد عابدين.
• ورمضان عجب ومحمد الرشيد برة الكشف.
• في (جرسة) اكتر من كدا.
• الشيء الذي سوف يفقع مرارة المريخاب – بعد (الجرسة) دي وبعد (الوقفة) دي ..رمضان عجب ومحمد الرشيد بيرجعوا للهلال.
• أنا غايتو اصلي ما شفت الهلال مكتمل بهذه الصورة.
• ما شاءالله.
• وتبارك الله.
• ان شاءالله ربنا يحفظهم ويحميهم من الاصابات.
• من ابوعشرين لغاية الغربال.
• عليكم الله تعالوا اتخيلوا معاي في اول مواجهة بين الهلال والمريخ.
• حراسة المرمى في الهلال فيها ابوعشرين …والمريخ حارس مرماه منجد النيل.
• شوفوا الفرق.
• يمين (الكشافات) الكلام دا ما بتثبت ليه.
• ما عارف ناس معاوية الجاك حالهم ح يكون كيف؟
• الرجفة ح تحصل قبل شهر.
• ان شاءالله يا رب المرة دي الهلال والمريخ يكونوا في الاسبوع التاني.
• ما عاوزين مجموعتين.
• عاوزين كورة عديل كدا.
• عاوزين نواجه المريخ.
• لو عملتوها مجموعتين ..عاوزين المريخ بالاسم معانا في نفس المجموعة.
• ما تقعدوا يا الفاتح باني تنظروا لينا كتير.
• في مرمى الهلال في ابوعشرين وفي المقدمة في الغربال.
• ما بقدر اقول ليكم تاني اسم.
• والله ما عارف زول.
• البيلعب منو؟
• ما تسألوني.
• اوتارا والطيب ام وضاح وارنق؟
• ما عارف.
• مؤيد ام سمؤال…ام استفين؟
• ما عارف.
• ما تسألوني.
• بويا ام فارس؟
• ما عارف يا عالم.
• قلت ليكم ما تسألوني.
• جيسي ام عبدالرؤوف؟
• بوجبا ام نزار حامد؟
• والله ما عارف.
• عيد مقدم ام منير ود نوباوي؟
• والله ما عارف.
• الشيء الاكيد باذن الله ابوعشرين ح يكون حارس المرمى.
• والغربال باذن الله وتوفيقه ح يكون رأس الحربة.
• اها الكلام دا ناس صلاح نمر بقدروا عليه.
• غايتو يا تمبش انت من اول مباراة للقمة بترجع عطبرة.
• يا زول مالك ومال التلتلة.
• ناس الغربال ديل ما بتقابلوا.
• ما تجازف بي سمعتك.
• صلاح نمر حر.
• بي طريقتو.
• اصلو ما عندو حاجة يخاف عليها.
• لكن انت ذنبك شنو؟
• لسه الطريق قدامك طويل.
• والمستقبل في انتظارك.
• في زول عاقل يقابل ليه هجوم فيه فيني والغربال وعيد مقدم.
• يا زول انت ما نصيح.
• احسن تتخارج من بدري.
• ما تشيل المسؤولية براك.
• وكان لي ناس سيف الدمازين …في وجود ابوعشرين (كورنر) ما يحلموا بيها.
• انتوا وين سيف الدمازين؟
• وين الاسم دا.
• ناس رمضان عجب ومحمد الرشيد عرفوها.
• ارتاحوا في دمهم دا.
• مالهم ومال (التلتلة).
• والله بوجبا دا (الكورة) يفكها ليك بي (اللوكشين) حقها.
• اصلو ما بتجل.
• يوزع فيها (ما شاءالله) زي اللحن السرمدي.
• وكان لي جيسي بتلفت على اتجاه وبيلعب الكورة في الاتجاه المعاكس.
• انا ما عارف – لكن سمعتهم قبل كدا بقولوا على الشيء دا في الدوري الاسباني دا (التمويه).
• اول مرة اشوف (التمويه) دا في الكورة السودانية.
• انتوا ما طالبني حليفة لكن (منير ود نوباوي) دا لا نمر ولا اسد بثبتو ما في.
• يا زول منير دا (ما شاءالله عليه) تقول فاكنو بي (نبلة).
• بدخل في عمق التفاصيل.
• بدخل في العصب.
• زي القهوة.
• ما شاءالله.
• بجيك عديل كدا.
• ولا بتلفت.
• ما شاءالله.
• الله يحفظ الهلال ويغطي عليه.
• الناس ديل حصنوهم.
• اقرأوا ليهم.
• الله يكفينا شر الاصابات والعين.
• ………….
متاريس
• قالوا الشيخ (شيخو) اعلن عن نفسه امس امام المريخ.
• مباريات الخرطوم الوطني تاني ح تكون متابعة بسبب (شيخو).
• الايام القادمة ايام شيخو.
• الله يغطي عليه من الاصابات.
• ابراهومة قادر يقدم شيخو النسخة الساحرة.
• الـ 30 لاعب الموجودين في الكشف يجب ان يسافروا مع الهلال الى غانا.
• الاعيب الاشانتي بقت مكشوفة.
• الكورونا بقت تستغل استغلال سيء.
• الله يغطي على الجميع.
• ……..
• ترس اخير : والله الواحد بقى ينتظر مباريات الهلال زي الموية الباردة.
هو انت لسه بتلعب على صفحات الاصدارات…قلت لي خايفين من العين؟ وهو في عين أشد من عينكم من كل النواحي… عطلتوا رمضان والرشيد وبخيت وخطفتوا جمال ظالم وابوعشرين وشداد ماسك الفرامل يتفرج في مجلس فترته انتهت من ٣ شهور وبدل يخل المشكلة مستعجل للتمديد للسوباط وعامل رايح بل تدويل مشكلة المريخ ودا كلو بتمنو وان شاء الله قريبا تشوفو نتيجة الظلم بداية من تيمكم لحم الرأس إضافة لشداد الظالم وابدأ ما تفرحوا يمهل ولا يهمل وكلامي دا ما تنساهو ان شاء الله قريبا تظهر النتيجة. اما بطيخكم وارد كردفان قريب بتظهر حقيقته وما عارف ماذا ستكتب وقتها وان شاء الله اذكرك يا ود عبدالماجد والأيام دول.
ههههههههههه غايتو ود عبد الماجد ده أعمدته بتريحنا في عضمتنا وبتجي ظابطة مع مزاجنا، والأجمل من كدة إنها بتحرق فشفاش ولدنا أبو المستعار وبتخليهو يولول ويسكلب ويجقلب 😂😂😂
بالله يا ود عبد الماجد كتر لينا من سيرة الولد الزجاجي الغربال ومن سيرة أبو عشرين، ولازم كل عمود حتي لو بتكلم عن السياسة تدخل فيهو اللاعبين ديل، السيرة دي بتعمل نفسيات للمرخرخين، واحتمال الناس العجايز ذي ولدنا أبو المستعار المندلاوي يروحوا فيها 😆😆😆
السنة دي عاوزين نطرد أبو المستعار من الخرطوم ونرجعه خليوة بإذنه تعالي !!
أديهو يا ود عبد الماجد يا هاريهو !!
وبس تجونا نلطشكم كالعادة
اولا ابوالمستعار دا مين؟ ثانيا اذا كان جد جدي من مواليد الخرطوم وين امشي يعني؟ مثلا الرتينة بقت ولا شلعوها منو العوض؟ ههه ههههاااي بلوله قال يرجع الناس حليوة يا بسامة الريدة في قلوبنا الله علامها.. عفوا خليك في فشافيشك وكمونيتك وثقافتك المحدودة… ما الكورة الجابت…. و…. خليناها وما الخرطوم الوردو وشدو فيها الناس ونادو بقية الأجناس خليناها ليكم وانا اصلا لي اكثر او تقريبا عشرة سنة ما زرت السودان مبروك عليكم ومثل ما خلاها اخونا دكتور سامر عبدالرحمن (مانديلا) من اولاد بحري حلة حمد نحن خلينا ليكم البلد ذات نفسها والواحد اذا رجع السودان بعد ربع قرن يلقى بلوله يلف ويدور اهرد فشاشه ادبهم بالحتة الفيها الحديدة ما ترفع الابنص ضحل بلدي اوي وقال شاعر بلوله.
من قمنا كل سنة تكتبوا
الهلال السنة دي وهلال 2017 وهلال..وهلال
ومازال الصفر ياهو نفس الصفر من قبل
ماتولد وان
شاء الله يطول عمرك وعمر الصفر
يزيد معاه. المريخ اسوا فتراته الحالية
هو بطل اخر 3 نسخات من الدوري الممتاز
اين انجازات الهلال ؟
ابو عشرين لعب مباريتين فقط
طول بالك.
اصلا مافي خوف وناس بوي وفارس والشغيل
موجودين
لو جاكم بو فون في شبابه ومع ابو عشرين
في صفركم واقفين…
ايه ام وضاح وام السمؤل فريق الهلال فيه نساء الاصح او وضاح او السمؤل انته درست وين رحم الله الغه العربيه يا محمد عبدالماجد يا فلسفه اكثر من اللازم
قلت لي ا ود عبدالماجد المعنى الجنا ابوعشرين دا 270 دقيقة ما دخل فيهو قون؟ لكن اا اخوي القونين الدخلن ايويويو ديل ما محسوبات ولا كان الحارس منجد ود النيل الحارس اللليل فريق المريخ؟ قبل نحن لا ود عبدالماجد مستنين الغربال ااي عشان الجنا لعاب علا ما عارفبن لشنو ما دخولوه الميدان خاف ماهو رضيان ولا الغللت عليهو منو يا كافي البلاء.
وتجو نديكم المعلوم وبمبان تقيل عينك ماتشوف الى دخان ههههه