بالعربي الكسيح
محمد الطيب الأمين
زعلانين على السيوترات البتزيد البرد !!
* ونحن صغار عندنا صديقنا (عضاهو كلب).
* وناس الحلة اختلفوا حول ما إذا كان (الكلب سعران ولا عادي)؟
* في ناس قالوا الكلب (جيعان) وفي ناس قالوا (سعران) .
* تشخيص حالة الكلب لم يكن دقيقاً ولذلك من باب الاحتياطي أفترضنا أنه سعران حتى ننقذ صديقنا .
* وبالفعل أنقذناهو وأخد ليهو (24) حقنة في (صرتو) لما عرف حاجة.
* المدهش في القصة إنو الكلب طلع (جيعان) بينما صديقنا طلع هو (السعران) .
* بقينا نفتش علاج للكلب.
* لقينا علاج للكلب ولم نجد (صرة الكلب) .
* أها نفس الحكاية ناس المريخ جهزوا لينا (24) حقنة وانتظروا (النجم يعضي) .
* من العصر المريخاب قعدوا أمام الشاشات ومنتظرين (عضة النجم) .
* معنوياتهم عالية .
* أول مرة في حياتي أشوف لي زول بيطير من التمهيدي ومعنوياتو عالية .
* بتذكر مرة الهلال ده طار من التمهيدي نحن وأولاد حلتنا أربعطاشر يوم بنمرق من البيت بعد صلاة العشاء.
* الشمس دي ما قاعدين نشوفها .
* المريخاب تلاتة سنين توالياً سقوط من التمهيدي ومع ذلك معنوياتهم عالية .
* عليك أمان الله المريخاب قاعدين في أندية المشاهدة من قبل انطلاقة الأستوديو التحليلي .
* وشايلين معاهم تسالي وفول حاجات .
* ولابسين سيوترات .
* والله صحي .
* الجابركم شنو على البرد؟
* فريقكم وطار من التمهيدي، لشنو تعبانين ولابسين السيوترات وقايمين وقاعدين؟
* هو ذاتو والله المفروض زول بيطير من التمهيدي ما يلبس سيوتر .
* أنتو بطيروا من (الصيف).
* الشتاء ما بتلحقوا.
* سيوترات شنو عليكم الله البتلبسوها أنتو.
* أنتو بطيروا من مرحلة الفنايل (أم حملات).
* ما بتصلوا مرحلة السيوترات.
* السيوترات عندها ناسا.
* أنا لاحظت حاجة.. كل المريخاب الكانوا لابسين سيوترات بعد هدف أطهر حسوا ببرد أكتر.
* السيوتر عند المريخاب بيزيد البرد .
* قالوا النجم سعران وفي النهاية طلع الهلال هو السعران .
* النجم أخد حقنة في (صرتو) فتألم المريخ.
* حكمة الله .. ينطعن النجم في تونس ويتأوه المريخ في العرضة .
* عاملين نجيلتكم الشينة دي .
* طيران من التمهيدي ونجيلة شينة وبعد ده يلبسوا ليك السيوترات من العصر .
* المهم .
* ظهر الهلال في تونس وهو في كامل العافية .
* لعب الهلال مباراة كبيرة من النواحي التكتيكية .
* الهلال فاجأ أهله قبل أن يفاجئ الأغراب.
* مباراة شهدت روح قتالية عالية جداً أعادة للأذهان الهلال القديم.
* شخصية وكاريزما باهرة في الشوط الثاني.
* شخصية واضحة، فريق يلعب من أجل أهداف معينة.
* التعليمات كانت (الشوط الأول تعادل) وفي الشوط الثاني نضربهم .
* وقد كان.
* نجح الهلال تكتيكياً في الحصة الأولى وكان خط دفاعه محكم ومنضبط.
* في الشوط الأول لم تكن شخصية الهلال الهجومية واضحة.
* في الحصة الثانية تحرر الهلال وانفتح نحو الهجوم.
* ظهرت ملامح الخطورة فكان الهدف الأغلى للنجم الأغلى أطهر الطاهر .
* لن نتحدث عن تطور أطهر وإمكانياته العالية فهذا قد لاحظه الجميع.
* يلعب أطهر وكأنو في زول مغالطو (ماشاء الله تبارك الله) .
* مليان عافية وحيوية.
* أيضاً لعب أبوعاقلة مباراة كبيرة وكذلك بوي وسموأل والشغيل وعمار وكل نجوم الفريق .
* واضح أن الهلال من ناحية نفسية أستعد للنجم.
* في عمل نفسي كبير تم قبل المباراة .
* أسعدتنا روح الهلال أكثر من الفوز نفسه .
* الهيبة بتفرح .
* والهلال فرحنا وما قصر .
* نحن نرضى عن الهلال إذا (لعب) وخسر .
* ونتململ في حضرة الهلال إذا فاز ولم (يلعب).
* فنحن شعب اختار الهلال لداوعٍ تتعلق بالأناقة والمقام الرفيع .
* عشقنا في الهلال روحه وأناقته .
* فهو السحر الذي جذب كل السودانيين عدا (قلة زعلانة) .
* والله لا أتمنى شيئاً في الدنيا إلا أن نستثمر هذه الفرحة ونخت أيدينا في أيادي بعض ونعمل من أجل الهلال بعيدا عن المصالح.
* الهلال وطن فنرجو أن لا نقسمه ونشعل أطرافه بالصراعات.
* علينا أن نعتبر أن مباراة رادس كانت في أم درمان والمباراة القادمة في رادس.
* ونوصي الكاردينال باستعجال المحترفين الأجانب حتى يشاركوا معنا في مباراة النجم القادمة.
* مبروووك نجوم الهلال، مبروك جمهور الهلال الوفي، مبروك الجهاز الفني ومبروك مجلس الإدارة .
* ما تحقق يستحق المباركة والقادم أحلى إذا اجتهدنا.
* ونركب صافنات ونجيبه (هلالابية) وأصلو الزول بيموت والذكرى تفضل حية.
* و..و..
* وفرحي خلق الله واتني يا شبه القمرة.
