زولكم طلع (ماسورة) !!

صابنها
محمد عبد الماجد
زولكم طلع (ماسورة) !!

· عندما ظهر مصطلح (الماسورة) في الوسط الرياضي وانتقل الى الاوساط الاخرى – كان المصطلح (ديباجة) للسوء والفشل.
· دكتور (ماسورة) تمشى ليه بي ملاريا عادية تطلع منو بي (جلطة).
· بتاع مطعم (ماسورة) تطلب منو (سمك) يجيب ليه (عدس).
· مهندس (ماسورة) البيت يسلمك ليه بعد الاولاد ما يتخرجوا من الجامعات – وأنت كنت قد سلمته له قبل العرس.
· فنان (ماسورة) وقت يغني لمحمد وردي زي البعكس ليه في كورة.
· الماسورة كدا.
· اللاعب وقت الجمهور يصفه بـ (الماسورة) اقنع من خير فيه – اللاعب لو عندو كورة بعد هذا المصطلح كورتو تطير من رأسو.
· اول ما المدرجات تقول (ماسورة) خلاص – الكلام انتهى.
· لاعب المريخ والهلال السابق استيفن وارغو جاء للمريخ برقم فلكي بعد ان كان هدافا لبطولة دوري ابطال افريقيا وكان الاهلي المصري يرغب في تسجيله لكن الرقم الذي دفعه المريخ في اللاعب جعل المريخ يصرف النظر عن اللاعب.
· المريخ سجل اللاعب بعد ضجة كبرى.
· الجميع انتظر هذا اللاعب وتوقع ان يقدم الكثير مع المريخ ولكن اللاعب فشل في ذلك.
· الناس صبرت على اللاعب مباراة – اتنين – تلاتة – اربعة.
· وقت الموضوع وصل عشرة – اطلق الاعلام والجمهور على وارغو مصطلح (الماسورة).
· تذكروا وارغو اول هدف سجله للمريخ كان على ما اعتقد بعد 6 شهور وكان في فريق الشجرة في مباراة ودية.
· ناس معاوية الجاك وكابو احتفلوا بالهدف دا زي الاحتفال بعيد الاستقلال.
· بعد سنة كدا سجل على ما اعتقد في شباك الاهلي مدني في الدوري الممتاز.
· اها من ديك تاني ما قامت قايمة لاستفين وارغو حتى بعد انتقل اللاعب للهلال ولعب له.
· من (المواسير) التى لا تنسى في الدوري السوداني اللاعب النيجيري (افياني) – وهو لاعب قوي وحقق شيء من النجاح مع الهلال لكن مع ذلك اطلقوا عليه لقب (ماسورة).
· شوية الكورة الكانت عند افياني طارت منو؟
· كهربتو كانت زايدة شوية.
· والجمهور السوداني ما بحب الزول الكهربتو زايدة.
· لكن اشهر مستورد للمواسير في تاريخ الكرة السودانية هو اشرف الكاردينال الذي كاد ان يحول الهلال الى (مغلق) مواسير.
· الكاردينال ما خلي ليه (ماسورة) في افريقيا واسيا وأمريكا اللاتينية ما جابها الهلال.
· عشان كدا عمل استاد الهلال ثلاث طوابق.
· نادي الهلال كان يمكن ان يتحول من ام درمان الى سوق السجانة بسبب (المواسير) التى سجلها الكاردينال في الهلال.
· مصطلح المواسير يقال انه ظهر في احدى مدن الولايات الغربية عندما حدث تمويل في (المواسير) ومنحت قروض وحررت شيكات فحدثت خسائر كبيرة للمتاجرين في هذه السلعة – ربما من هنا خرج مصطلح (ماسورة) من السوق ودخل للوسط الرياضي وأصبح ماركة لكل فاشل.
· شيء مهم اخر نقوله في هذه الحتة – وهو مهم بمكان عشان تكونوا عارفين وما تلخبطوا الحاجات.
· مصطلح (ماسورة) لا يقال للشيء الفاشل والسلام – هذا اللقب يطلق لمن كان يتوقع نجاحه وفشل بعد ذلك وخذل الناس.
· يعني الشيء الفاشل اصلا ما ممكن تقول عليه (ماسورة). من كنت تتوقع نجاحه ويترقب الناس ذلك ويفشل بعد ذلك هو الذي يقال عنه (ماسورة).
· لذلك ارتبط المصطلح بالمحترفين لأنهم يتم تسجيلهم بعد ضجة ومفاوضات ووعود وأحلام وترقب وأموال تدفع وسماسرة.
· زمان نحن وقت يظهر محترف جديد – بندخل الاستاد ونقعد في المدرجات – لو الجمهور قال عن المحترف (ماسورة) بنقنع منو ونشوف لينا حاجة تانية.
· أنا عارف اني قطعت قلبكم – وقلتوا الزول دا عاوز يقول شنو؟ وقاصد منو من المحترفين؟
· عملت ليكم المقدمة الطويلة دي مخصوص – عشان تعرفوا خطورة هذا المصطلح.
· انتوا اصبروا وطولوا بالكم – ح اكون معاكم في منتهي الوضوح.
· ح اكون معاكم في منتهى الصراحة.
· الاستاذ الكبير ميرغني ابوشنب كان بكتب عممود اسمه (بصراحة) حرقوا ليه بيتو.
· الاستاذ حيدر المكاشفي بكتب عمود باسم (بشفافية) اوقفوه مرة واحدة من الكتابة اكثر من سنة.
· البلد دي لا الصراحة ولا الشفافية بنفع معاه.
· هسع بكون في زول قلبو اتقطع من الكلام دا.
· الزول دا عاوز يقول شنو؟
· الزول دا عاوز يصل وين؟
· المريخاب بكون بضحكوا لي هنا.
· نحن كتبنا عن جيرالد فيري وكتنبا عن ديفيد ريتشارد وكتبنا عن ابراهيم مصطفى وحاولنا ان ننقل الصورة او احساسنا – لأن نجاح اللاعب المحترف شيء ما مضمون.
· المهم كتبنا ليكم ونقلنا ليكم الصورة من القاهرة.
· مع البرد دا.
· يمكن نكون صاح ويمكن نكون غلط.
· كل يوم بنقطع لينا اكتر من ساعة ونص عشان نصل معسكر الهلال.
· في برد – لو ما طلعت من الشقة (متنكر) ما بتقدر تطلع فيه.
· والله روحك ما بتعرفها.
· المهم ما اطول ليكم (المقدمات).
· عندنا قريبنا في الحلة لمن يكون عاوز يديك خبر وفاة زول بكتل ليه (21) زول ثم يدخل ليك على الزول الذي توفى فعلا.
· في ناس بتاعين (مقدمات) – الواحد لو عاوز ليه منك قروش او عاوز يتسلف منك بحكي ليك ظروف العالم الثالث كله.
· ولمن يفشل في ارجاع هذه القروش لك مرة اخرى ، بقعد يحكي ليك في حاجات لمن انت قلبك يتقطع.
· هسع انا كسرت ليكم في (مقدمات) من امها.
· ادخل ليكم في الموضوع.
· شوف الساعة كم؟
· بعد مباراة الهلال والبنك الاهلي المصري كنت ماشي في سوق العتبة زي أي زول.
· في البرد دا.
· مبسوط من المباراة ومبسوط من المحترفين.
· دا احساسي كدا.
· فجأة ثيتني ليك زول في سوق العتبة.
· زول زعلان ..وما رضيان بما نكتبه.
· الزول دا بعيون حمراء – قال لي انتوا بتكتبوا ساكت.
· انتوا بتنفخوا في الفاضي.
· والكلام دا ما صحيح.
· قلت هي الحاجات دي وصلت القاهرة برضو.
· يا زول اهدأ في شنو؟
· زعلان في شنو؟
· قال لي انتوا بتكتبوا ساي.
· قلت ليه طيب انت وقت عارف كدا – زعلان مالك ؟
· قال لي المشكلة في ناس ما عارفة.
· وانت مالك.
· قلت ليه بكرة بعرفوا – ما في زول بتغشي – الناس ديل اصعب مننا – وعارفين أي شيء.
· الزول عاوز يمشي وهو في هذه الحالة من الغضب.
· قلت ليه تعال هنا في شنو؟
· والله ما فاهم أي حاجة.
· صاحبكم في البرد داك – قال لي زولكم طلع (ماسورة).
· قلت ليه زولنا منو جيرالد فيري؟
· قال يا ريت.
· قلبي رقد شوية – قلت جيرالد مرق منها.
· قلت ليه ديفيد ريتشارد؟
· قال لي ابدا.
· الحمدلله.
· يا ربي الزول دا زعلان في ابراهيم مصطفى – ما في زول غيرو.
· قلت ليه ابراهيم مصطفى؟
· قال لي ابدا.
· قلت الحمدلله الثلاثة مرقوا منها.
· واكيد انتوا هسع قلتوا نفس الشيء (الحمدلله).
· زولكم عاوز يفوت ..مسكتوا من قميصو – جريتو جرة زول زعلان.
· جرة الخمسين البتكون في اخر اللعب- وكرت صغير.
· زولكم اتهجم قال لي في شنو؟
· قلت ليه زولنا منو الطلع ماسورة؟
· عاين لي سمح وقال لي (رئيسكم).
· قلت ان بقت على الرئيس هينة وقت المحترفين مرقو منها.
· الشارع الحتة دي قادر عليها.
· لكن للأمانة ما سألتو وقلت ليه رئيسنا منو؟
· ما عارفو قاصد منو؟
· البرهان؟
· ام حمدوك؟
· والله الزول بقى ما عارف أي شيء.
· عاوز اسألو لقيتو فات.
· فات وين ما عارف؟
· موش في ناس يكونوا معاك فجأة كدا تلقاهم ما في.
· بمشوا وين ما بتعرف.
· الزول قطع قلبنا.
· يا ود الناس كفاية علينا (البرد).
· ……
متاريس
· احسن حاجة الدوري يلعب بدون لاعبي المنتخب.
· ما في احسن من كدا.
· وزمن ذاتو ما في.
· الاتحاد لو عمل كدا – يكون عمل ليه حاجة كويسة.
· الهلال اصلا ما عندو مشكلة.
· التسجيلات يوم 1 ابريل.
· يعني يا بشه ح تعمل تمارين صالة 6 شهور.
· الحكاية شنو؟
· دي عقوبة عديل كدا.
· …..
· ترس اخير : الزمن البدل الضائع 18 دقيقة … دي زي الاجازة البدون مرتب.