زول اقدم من (شنطة الحديد)

صابنها

محمد عبد الماجد

زول اقدم من (شنطة الحديد)

• بتكون قاعد تتكلم مع زول بالتلفون – كلام عادي …ما تخلوا حاجة.
• تقطعوا في البلد كلها.
• تتكلموا عن الدوري الاسباني.
• نتائج برشلونة الايامات دي زي نتائج الاصابة بي (كورونا).
• نتائج صادمة شديد.
• برشلونة الايامات دي شغالين بالكسر.
• التعادل مكسب ليهم.
• وريال مدريد ذاتو (مصدق نفسو).
• زين الدين زيدان دا اصلو ما في زول ممكن يثق فيه.
• ممكن يخذلك في أي لحظة.
• بتتكلم مع صاحبك في التلفون في كل هذه الاشياء – وبرد عليك بي اريحية ووضوح.
• اخر (قهقهة) وضحك.
• وذكريات.
• وحكاوي.
• وقصص.
• اول ما تقول ليه عاوز لي قروش..يقول ليك قلت شنو؟ صوتك ما واضح.
• الشبكة كعبة.
• ما سامع حاجة.
• البطارية نازلة.
• علاقة البطارية بالشبكة كعبة شنو؟
• علاقتها شنو بالصوت؟
• اخر شيء يقطعها معاك ويقول ليك : اسمع برجع ليك.
• وتاني لي يوم الدين ما يرد عليك.
• في ناس كدا – لو عاوز تختبر تلفوناتهم قول ليهم (عاوز قروش).
• تاني ما بتلم فيهم.
• طوالي يقول ليك الشبكة كعبة.
• والصوت ما واضح.
• وانا في حتة زحمة شوية.
• عندنا زول في الحلة زول قديم …زي (شنطة الحديد) – زول اقل حكمة عندو بقولها ليك (التسوي كريت في القرض تلقاه في جلدها).
• ما عندو حاجة اجد من الكلام دا.
• بي مناسبة.
• ومن غير مناسبة.
• بركب ليك المثل دا.
• زولنا القديم دا – لو مسك (المايك) في حفلة او في المقابر – اول حاجة بقولها ليك (التسوي كريت في القرض تلقاه في جلدها) وبعد كدا بقعد يفتش ليك (مناسبة) عشان يلتق المثل مع المناسبة.
• اصلو ما بتحير.
• زول قديم.
• المثل دا يقوله ليك في الفرن.
• ويقوله ليك في الكورة.
• وفي النادي.
• في أي حتة ما عندو غير (التسوي كريت في القرض تلقاه في جلدها).
• تقول عندو نص في (الجلد).
• الزول القديم دا ..يوم داك كان بحضر في مباراة الهلال وفايبرز اليوغندي…زولكم قاعد كدا شاف (ابوعشرين).
• قعد يحكحك في عيونو متل جردل الجير.
• دعك عيونو ديل لمن قرب يفقعهن.
• قال للولد انت يا جنا الزول الواقف في المرمى دا (ابوعشرين) وإلّا كمان شوفي لحق سمعي.
• الولد قال ليه : بلحيل دا ايوا ابوعشرين يا حاج.
• عمكم قال ليه وابوعشرين الجابو هنا شنو؟ كدي جيب لي النضارة من جوة.
• ابوعشرين علاقتو شنو بالهلال؟
• يا جنا مالكم انتوا عاوزين تعذبوني؟
• مالكم عاوزين تقوموا لي المصران.
• عاوزين تجيبوا لي السكري.
• ابوعشرين لو مشى الهلال انا ممكن اروح فيها.
• انا بضيع فيها.
• ولا بستحمل ليكم حاجة زي دي.
• جابوا ليه النضارة من جوة…لقي ليك ابوعشرين بطلع في الكورة من خط المرمى زي (الزلابية).
• عمك قال للولد يا جنا قلت ليك جيب لي نضارة (النظر) تجيب لي نضارة (القراية).
• الولد قال ليه يا حاج نضارة النظر وين؟
• عمك قال ليه شوفها فوق للتلاجة ..انا ما عارف السر بتاع (فوق التلاجة) دي شنو؟
• أي حاجة تروح منك تلقاها فوق للتلاجة.
• الولد مشى للتلاجة جاب النضارة وجاء راجع.
• عمك لبس نضارة النظر …لقي ليك ابوعشرين ذاتو واقف بي شحمو ولحمو.
• يا جماعة دا شنو؟
• يا جنا انت جبت لي نضارة شنو؟
• مالي زي الشايف ابوعشرين واقف مع ناس الهلال.
• الولد قال ليه يا حاج دي نضارة (النظر) مالك انت؟ – الزول الواقف في مرمى الهلال دا ابوعشرين يا حاج.
• عمك قال ليه ابوعشرين الوداهو الهلال شنو؟
• الولد قال ليه يا حاج نحن لينا سنة بنكورك حرية سلام وعدالة ..والثورة خيار الشعب وما عاوز ابوعشرين يمشي الهلال.
• دي الثورة يا حاج.
• عمك قال ليه والله نحن كنا فاكرين الثورة دي شعارات ساكت …لكن طلعت بالجد.
• الواحد ان بقى كدا يعمل حسابو على (نضارتو).
• لكن عليك الله يا جنا جيب لي حبوب الضغط بتلقاها في التلاجة.
• وألحقني بي كباية موية …خنقت يا ولدي.
• انت جبت لي النضارة وإلّا جبت لي حاجة تانية!!؟
• عمك تاني يوم قاعد يحضر في مباراة المريخ مع الفريق الكنغولي.
• مرت ربع ساعة.
• ما قال شيء.
• وزولكم مضايق شديد.
• مرت نص ساعة.
• ما قال شيء.
• ضيق شديد.
• انتهي الشوط الاول.
• ما قال شيء.
• كاتمها في قلبو.
• مرت ربع ساعة في الشوط التاني.
• ما قال شيء.
• عاوز يروح فيها.
• مرت نص ساعة.
• ما قال شيء.
• بقى يتنفس بي صعوبة.
• عمك في اخر ربع ساعة …قال للولد يا جنا انت المريخ دا الليلة مالو باقى لي زي الزول الحفيان؟
• الولد قال ليه : مالو يا حاج؟
• في شنو؟
• عمك قال ليه : وين رمضان عجب ومحمد الرشيد ؟ ….والله مريخ بدون الرشيد وعجب متل العطلة الرسمية البتقع جمعة.
• الولد ما عرف يقول ليه شنو؟
• وعمك مصر يسأل – يا جنا وين الرشيد ورمضان عجب؟
• انتوا مالكم عاوزين تجيبوا لي المصران.
• ناس الهلال تاني عملوا فيكم شنو؟
• الولد قال ليه رمضان عجب والرشيد موقوفين ومصيرهم ذاتو ما معروف زي رفع اسم السودان من قائمة الدول الراعية للارهاب.
• عمك قال ليه كيف يعني؟
• الولد قال ليه : يا حاج رمضان عجب ومحمد الرشيد مشوا وقعوا في كشوفات الهلال.
• عمك النضارة وقعت منو؟ وقال للولد وين مزمل ابوالقاسم؟
• تتفاصحوا السنة كلها.
• وين اسامة عطا المنان؟
• وين معتصم جعفر؟
• وين جمال الوالي؟
• انتوا قاعدين وين؟
• انتوا بتعملوا في شنو؟
• الولد قال ليه يا حاج الموضوع دا ما عندو علاقة بالكلام دا – الجماعة ديل مشوا وقعوا عديل كدا في كشوفات الهلال.
• عمك قال ليه والموضوع دا برضو عندو علاقة بالثورة.
• هي الثورة دي مالها دخلت علينا بالساحق والماحق؟
• عمك عاوز يسأل تاني.
• عاوز يقول شيء.
• الولد ثبتو ليك وقال ليه عليك الله يا حاج ما تسألني من (الغربال) – عشان لو عرفت موضوع (الغربال) دا ممكن تروح فيها…يمين تموت قبلك.
• عمك سكت ..قال للولد طيب اقفل التلفزيون دا …وشيل النضارة دي وختها فوق التلاجة …وتاني لو المريخ دا لعب في خشم الباب قدام البيت دا ما تجيب لي سيرتو.
• ولو قلت ليك جيب لي (النضارة) ما تجيبها لي.
• والله الواحد ذاتو خايف يصحي الصباح يلقي نفسو بشجع في الهلال.
• هي البلد دي حصل فيها شنو؟
• وامانة فيك لو الغربال مشى الهلال …ما تقول لي…عشان دا بروح فيها طوالي.
• ولا بصبر ليكم.
• ولا بثبت.
• ولا بركز ليكم.
• لكن يا ولدي عاوز اقول ليك (مثل) جاء وقتو الآن …وانتوا ما بترضوا تسمعوه.
• عاوز اقول ليك يا ولد : التسوي كريت في القرض تلقاه في جلده.
• الولد قال ليه : والله يا الحاج الليلة اول مرة تقول ليك كلام صاح.
• واول مرة في حياتك كلها تخت المثل في حتتو.
• فوق التلاجة يعني!!.
• …………..
متاريس
• ناس الاشانتي قاعدين يجقلبوا كتير.
• اقول ليكم شيء.
• ما تركزوا معاهم.
• ما يجروكم لجلبقتهم.
• ما تهتموا للمواضيع دي.
• انتوا ماشيين غانا عشان تغلبوا.
• ما عندنا قضية بملعب المباراة.
• ولا عندنا قضية بالكورونا.
• ما تعملوا لي روحكم حرب نفسية.
• الاشانتي شنو كمان.
• الاشانتي ولّا الجن الاحمر ما فارقة معانا.
• كلهم بتغلبوا ان شاءالله.
• ما فارقة معانا.
• اشانتي.
• او غيرو.
• كلهم بنضربوا ان شاءالله.
• عندكم ابوعشرين وجمال سالم وابوجا.
• تاني عاوزين شنو؟
• عندكم (الغربال).
• عاوزين اكتر من كدا شنو؟
• ركزوا في ورقكم.
• وما تركزوا كتير مع الاشانتي.
• ما تنشغلوا بي هذه العوامل.
• الحرب النفسية …في التعامل مع اخبار الاشانتي بهذه الصورة.
• ……….
• ترس اخير : نحن ليفربول ما (بنسعل) فيه.