زي صندوق المناديل تجر (1) بيطلعو (3) !!

بالعربي الكسيح
محمد الطيب الأمين

* هنالك تعريف واحد فقط لـ(القربة المقدودة) ..
* وتعريفها إصطلاحاً ولغة هو : (ما بتمسك الموية) ..
* القربة لما تكون مقدودة تكب فيها موية بهنا بتطلع بهناك طوالي..
* وفي ذلك هي أشبه بـ(ساقية جحا) ..
* وبما أن ذلك كذلك فنحن لا نريد أن تكون فترة التسجيلات بالنسبة للهلال مثل (القربة المقدودة) ..
* لما تسجل مهاجم بمليون دولار وتقوم تتخارج من مكسيم بتكون فعلت ما تفعله القربة المقدودة ..
* ولما تسجل مكسيم وتتعاقد مع تيتيه بتكون فعلت ما تفعله ساقية جحا ..
* تأمين إستمرار مكسيم مع ضم محترفين يحدثون الفارق يعني أن الهلال في السليم ..
* لو جبت ساماتا ، ومكسيم مشى بتكون ما عملت حاجة ..
* جمعة ما فيهو كلام لكن ما تفرطوا في مكسيم ..
* المهم ..
* زمان المريخ في التسجيلات أول حاجة بيعملها بيخطف اللاعب بعد داك بيفاوض النادي ..
* ولما النادي يرفض بقوم المريخ بمفاوضة (خال) اللاعب ومرات بفاوضو (حبوبتو) أو (أخو مرتو) ..
* بتذكر مرة ناس المريخ عشان يقنعو اللاعب قاموا فاوضوا (أخو مرتو) ..
* والله صحي ..
* الآن المريخ بقى يفاوض النادي ويفاوض اللاعب ومع ذلك ما بقدر يشيلو ..
* النادي بيوافق واللاعب بيوافق وفي النهاية المريخ بعتذر بسبب عدم السيولة ..
* هو إنتو ما عندكم سيولة المفاوضين ليها شنو ؟؟
* غايتو جنس شلاقة ..
* زي زمان عندنا صاحبنا كانت عاجباهو فكرة (أنا ماشي لنسابتي وأنا جاي من نسابتي) ..
* الكلام ده كان عاجبو شديد ..
* وقام عرس على الأساس ده ..
* عرس عشان يقول للناس (أنا ماشي لنسابتي) ..
* أول ما جا من شهر العسل بقى يجي يلقانا قاعدين في (الدكان) يقول لينا بصوت عالي: (شباب كيفكم أنا ماشي على نسابتي وجاي) ..
* شهرين كل ما يقابلك.. يا يقول ليك أنا ماشي على نسابتي ويا كمان قال ليك أنا جاي من نسابتي ..

* قضاها مشية وجية ساكت ..
* هو مفتكر العرس (زيارات) ..
* في النهاية مسكين طلق المرا وبقى يشوف نسابتو (عشرة عشرة) ..
* هسه ناس المريخ يمكن معجبين بحكاية تقديم طلب للأندية بخصوص نجوم التسجيلات ..
* عاجباهم الحكاية دي ..
* أي نادي في البلد دي قدموا ليهو طلب ..
* فاكرين التسجيلات (طلبات) ..
* وغايتو جنس غايتو ..
* لم يتشدد هلال الأبيض في (عدم إطلاق صراح الغزال)، وبالمقابل لم يتشدد الهلال في (ضم الغزال) ..
* الغزال كان يمكن أن يكون كلمة السر في هلال (2018) ..
* عموما ما راح شئ ، شهر ستة سيعود الغزال ليلعب موسماً واحداً ويختم من بعد ذلك حياته داخل بيته ..
* وعلى فكرة.. ما على شرط مهند يلعب أساسياً مع إنو (خانتو أصلاً شاغرة) ..
* أكثر ما أعجبني في تسجيلات الهلال هذا العام هي إن المجلس لم يشطب من داخل التشكيلة الأساسية ..
* في الأعوام السابقة الشطب كان بيكون من التشكيلة الأساسية وحتى الإعارة تتم من داخل التشكيلة الأساسية .. والشغيل خير نموذج ..
* واضح أن رئيس الهلال الكاردينال قد إستفاد كثيراً من الدروس السابقة وأقبل هذا العام على التسجيلات بفهم متقدم ..
* وبما أن تسجيلات الهلال المحلية (ناجحة إلا ربع) فإننا ننتظر أن تكون التسجيلات الأجنبية (ناجحة ونص وخمسة) ..
* محلياً تسجيلاتنا (ناجحة إلا ربع) وذلك لأسباب عديدة منها تمسك الخرطوم الوطني بلاعبيه وتفريطنا في محمد عباس وعدم ضم الغزال ..

* هذه الأشياء ربما تكون خارج إرادة مجلس الهلال بإعتبار أن الهلال سعى لضم حمزة داوود وإجتهد لكسب تيري ولكن إدارة الخرطوم رفضت ..
* (الربع) الناقص في التسجيلات المحلية نتمنى أن يكتمل في الصفقات الأجنبية لتكون (ناجحة ونص وخمسة) ..
* وحقيقة لولا مشكلة الخانات التى يعاني منها الهلال لقمنا بتشليع المريخ المشهور بـ(المدفور) ..
* لكن الخانات خذلتنا ..
* لو ما الخانات لا بنخلي مامادو ولا بنخلي جمال سالم ولا بنخلي محمد جعفر قريش ذاتو ..
* المريخ حتى الآن فشل في إعادة قيد قائده راجي عبد العاطي بسبب ضيق ذات اليد ..
* والغريبة راجي بيصرح وبيقو : (أنا ح أنتظر المريخ لآخر لحظة) ..
* شكلو إنتظارك ح يطول ..
* حتى لو إنتظرت وتم إعادة قيدك برضو (كاش) ما في..
* تسجيلات كلها بالدين ..
* ديون تقيلة ..
* البلد كلها عايزة قروش من المريخ ..
* ناس الكهرباء وناس النفايات والضرائب وشركات الرعاية والنضافة والعمال واللاعبين والأجانب والفنادق والكافتريات ..
* ده غير النجيلة البقت زي (وش الفنانة البعرفها أنا) ..
* نادي الديون ..
* قالوا واحد سألوه من (ديون المريخ) ، قال ليهم : زي صندوق المناديل تجر واحد يطلعو معاك تلاتة ..
* وفعلاً والله ..
* صندوق المناديل الورقية لما تحاول تجر منديل واحد بيطلعوا معاك تلاتة أو أربعة مناديل ..
* لما أنت ذاتك تتحرج ..
* هسه المريخ لو ظهر (داين) واحد بيظهرو معاهو تلاتة وأربعة..
* وأنا والله مستغرب في حاجة واحدة ..
* مستغرب في إنكم ليه لسه ما دايرين تبيعو كأس الممتاز الشلتوهو لما الهلال إنسحب من البطولة قبل موسمين ؟؟
* بالجد مستغرب ؟
* معقولة في زول بيكون عندو كأس ممتاز وما يبيعو ؟
* ياخ هو الوالي باع ليهو كأس ..
* بيع ساي يا محمد جعفر قريش ..
* طبعاً أصلاً كأس مانديلا (غير المعترف به) معمول من (صفيح علبة لبن بدرة) ..
* علبة لبن بدرة وعملوها كأس ..
* فورمست ..
* فورمست بـ(القاء) ؟؟
* وغايتو الله يكفينا شر (المُصدي) اللمعتو الأيام ..
* ونركب صافنات ونجيبة (رشايدية) وأصلو الزول بيموت والذكرى تفضل حية ..
* و..و..
* وكأني مديون للعذاب وأدفع ….(من ويييييين

حمل تطبيق كورة سودانية لتصفح أسرع وأسهل

 لزوارنا من السودان متجر موبايل1

http://www.1mobile.com/net.koorasudan.app-2451076.html

3,699 حملو التطبيق

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app

13230 حملو التطبيق

على متجر   mobogenie

 http://www.mobogenie.com/download-net.koorasudan.app-3573651.html

5000+ حملوا التطبيق