صحيفة كورة سودانية الإلكترونية

سارق (الالقاب) في (الجوي) فشل

25

ابوبكر عبد الله - بيكو

نفاج المــداد

ابوبكر عبدالله (بيكو)

سارق (الالقاب) في (الجوي) فشل ..

* اولا كده كل سنه وانتو طيبين وربنا يحقق الاماني وان شاء الله تامين ولامين يا رب ، ونهنئ كل الامة الاسلاميه بعيد الفطر المبارك اعاده الله عليكم باليمن والبركات …

* بمناسبة العيد دي ، الزناطير دائما بزكروني ناس حلة (اللفاحه)
اسمها اسم تاني بس لقبه (اللفاحه) مشهوره بالاسم ده ، كان سالت اي زول في بلدنا (بعرفه) !

سموهم كده عشان (بلفحو الحاجات) الما حقتكم ويتفشخرو بيها ، يقولو ليك (لفحناها) منهم !
وهم اصلا ما عندهم (التكتح) ..

جنهم (لفح) ، في برش رمضان ده بياكلو واقفين !
ما بيخلو اي حاجه !
باقي (الابري) الفضل يلفحو ،
بااقي الشطه في الصينيه الواحد فيهم بيكبها في (صحنو) !

الما بيعرف (يلفح) ده ما زولم وما منهم !
لا بيستحو ولا بيخجلو عينهم قويه..

* ديل ايام العيد يلفو ليك علي الجيران كلهم ، بعد يخلصو منهم يمشو لي ناس (الحله الجنبهم) من الصباح الواحد ما برجع البيت الا الساعه 12 يفطر ويمرق تاني ، مشهورين بي (لقيط الحلاوه)
الواحد من يمدو ليهو (الشياله) طوالي ما يصدق (يخمش) ليك كم حبه كده ويختهم في جيبو ..

ده علي اساس انو الواحد فيهم متاثر بالصيام في رمضان والخبايز ما بتنفع معاهو !

يعزل ليك (اسمح) حلاوه في الشياله ، يختها في جيب الجلابيه ، بالله يملا ليك جيوبه الاتنين حلاوة !
ولما يرجع البيت يطلعم من جيوبه

تسمعو بكل (بجاحه) يكلم في ناس البيت (الشكل السمح ده جبتو من ناس عوض! والحلاوة الاسمها غريب دي من ناس حاجه نفيسه جابته ليهم بتهم الهام من السعوديه) !

(فلفله) شديده ! حافظ ليك الحلاوه شكل شكل …

* يقوم يشيله ويختها في (شيالة) الحلاوة بتاعتم !
تقوم تجيهم انت عشان تعيد عليهم يمدو ليك الشياله (تلقي) حلاوتكم الما بتغباها (ما عارف كيف الواحد بكون عارف شكل حلاوتم) زااااتا بي (خفجته) الجات بيها لمن (الشنط) وقعت …

* تعاين لي حاجة البتول وتقول ليها (الحلاوة السمحه دي من وين)
وانت في وشك ابتسامه ساخره تقوم ترد عليك بي كل بجاحه (جابا لينا ولد اخوي الزبير من لندن) !

* ياها حلاوتكم زاتا الجبتها ااجابوها ليكم ومشيت استلمتها من المطار وعملت مشكله عشان الشنطه وصلت منتهيه !

لكن ما عندك طريقة بتاعة (غلاط) ..

* اها الزناطير زيهم كده ! يلاقيك الزنطور يقول ليك (نحن سيد البلد نحن الزعيم ، صاحب المحموله جوا نحن الاولاد نحن الفرسان نحن الماكوك) يملو ليك نفسهم القاب ، ويرجعو ليك (ناديهم) !

* يفرغو ليك (الالقاب) دي زي الحلاوة القبيل بتاعه ناس حلة (اللفاحه) ويقعدو يفرزو فيها (سيد البلد والزعيم وصاحب المحموله جوا ديل حقات المريخ ، الاولاد ديل ناس الخرطوم ، الفرسان ديل الاهلي والماكوك ديل ناس اهلي شندي) !

* يشيلو ليك (الالقاب دي بي صمة خشمه) ويختوها في الشياله بتاعتم ! تجي تسأل فيهم دي جبتوها من وين ؟ يقولو ليك دي جابوها لينا في (جرايدنا) ..

ما بيتغالطو نهائي !
لسانهم طويل ..

حاجه اخيره كده :

عندنا ناس بتعمل من الحبه (قبه)
المواضيع تكون ماشه زي الطلقه بدل يساعدونا (بالدعوات)
تلقاهم شغالين (تنظير) !

يحبو (النقد) زي (روحهم) دي !

ويمسكو في (سفاسف) الامور ..

هسه معسكر المريخ ده مالو ؟
عيبو شنو ؟

سافر (حاتم) ولا قعد (الخزين) !
النافص شنو ؟

نتمني من الحميع ان يدعو للزعيم بالتوفيق ..
والعندو حاحه في نفسو يا ريت يخليها عشان خاطر الغلابه البتتوجع من خسارة الزعيم لا قدر الله ..

نقطه اخيره :

يا اخواني الزعيم في العيد هادي وناير

سلطان الطرب الفي في القدله شامخ وساير

معروف الفرح مدلولو فيهو بشائر

والنصر القريب مريخنا جوه جزائر ..

 
 
 
قد يعجبك أيضا
3 تعليقات
  1. ibrahim يقول

    نفهم من كدة إنو الناس البيصوموا ويعيدوا هم الهلالاب بس؟ مثلنا السوداني بيقول: مرمي الله مابيترفع !!! وإنت شكلك (لوكنت صمت) ماطلعت بي حاجة من شهر رمضان….. وعيدك بتكون قضيتو تحت الملاية…إتق الله في الأيام المباركات دي وكل سنة وإنت طيب برضو !!!

  2. lsmail abdol يقول

    بي بركة الايام المباركة دي ياحاقدين ع اسياد البلد الوفاق اطرطشكم6/صفر قولوا يارب ……………

  3. عتيبي يقول

    ده مقال شنو ؟ هو اي نكره داير يشتهر يسىء للهلال ؟ لعلمك يا مسطح الزعيم لقب الهلال السودان وسرقوه كتاب المريخ

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد