* من المواقف السخيفة التي يمكن أن يجد (الإبن آدم) نفسه فيها هي تلك المواقف التي تتعلق بالزواج ..
* والزواج في السودان فيه كثير من المقالب والمصاعب والمواقف السخيفة ..
* ولا أظن أن هنالك موقف أكثر سخفاً من ان (تغير العروس رأيها) في آخر لحظة ..
* أو تغيير أهل العروس لموقفهم في اللحظة الأخيرة ..
* شاب ذهب لأهل العروس و(اتقدم بالباب) وحصل على موافقة والد ووالدة العروس وأخوانها ..
* ثم حدد معهم مواعيد التعارف كما حدد مبدئياً مواعيد الزواج ..
* وحينما حان موعد التعارف استدعى الشاب سبعة من أعمامه ومثلهم من جيرانه فضلاً عن أمام المسجد بالحي وثلاثة من أصحابه ..
* استدعى الشاب حوالي (13) من أصحاب (العمم والدقون) ..
* وأجر لهم عربة (هايس) ..
* وذهبت عربة أخرى تحمل مجموعة لا يستهان بها من النسوان اللائي (قشرن) بالثياب الفاخرة والذهب (الصيني) ..
* ذهب هذا الوفد الرفيع لمنزل أهل العروس وهم على علم بالزيارة وأسبابها ..
* وبعد السلام و(اللبن بالكيك) تحدث امام المسجد وهو من أهل العريس..
* بدأ الحديث بآيات من الذكر الحكيم ثم دخل على الاحاديث النبوية ثم بدأ التعارف من عنده وتواصل ..
* وعندما وصل التعارف عند والد العروس باغتهم بالاعتذار وقال لهم بالحرف: ( والله يا جماعة نسبكم يشرفنا لكن أنا أمبارح استخرت ولقيت سعادة بتي ما مع ولدكم) ..
* الجماعة صنوا صنة وكأن خبر (موت عزيز) قد نما لمسامعهم تواً .
* قالوا ليهو كيف يعني استخرت ؟ نحن البنعرفو البت هي البتستخير وليس والد البت ..
* قال ليهم والله ده الحاصل ..
* عرس ما في ..
* الجماعة لا عرفوا يرجعوا البيت ويواسوا العريس ولا عرفوا من هناك أي زول يمشي بيتهم ..
* منظرهم بقي زي منظر الحرامي الطلعت عليهو شمس ..
* زي منظر المريخ في الفاشر ..
* ناس المريخ سافروا الفاشر قالوا ماشين يحتفلوا باللقب ..
* المجلس كلو سافر مع الفريق ..
* أبو العريس والأعمام والجيران وامام المسجد ..
* سافروا الفاشر حوالي (11) عمه و(14) دقن ..
* عمم ودقون اتلموا وسافروا ..
* علي وين ؟ قالوا ماشين يحتفلوا باللقب ..
* لقب ب(الصاء) ؟
* لما وصلوا الفاشر لقوا مريخ السلاطين (استخار) ..
* ناس مريخ الفاشر قالوا لمحمد الشيخ مدني: (نحن فوزكم علينا يشرفنا لكن كمان أمبارح نحن استخرنا ولقينا سعادة لقب الدوري من نصيب الهلال كبير البلد) ..
* هو عليك الله في زول في الفاشر بيلعب بالنعسان ؟
* حاجة تكسف والله ..
* النعسان دايرين تلعبوا بيهو في الفاشر ..
* الفاشر لو ما بقيت صاحي ما تخاطر ..
* طبعاً ناس الفاشر عندهم مقولة ثابتة بيقولوا : الفاشر بالنهار تضاريس وبالليل باريس ..
* ومدفور البلد أخدها اتنين قبل ما الشمس تغيب ..
* والهدفين سجلهما الحريف منتصر ..
* والله أنا ما في حاجة اثرت علي قلبي وأحزنتني إلا (عمة) محمد الشيخ مدني ..
* لف العمة وسافر الفاشر بقلب قوي ..
* مسكين داير يفرح ..
* مجلس المريخ سافر بقلب قوي ..
* عليك الله فريق مدافعو صلاح نمر من وين جابوا قوة القلب ..؟
* هسه صلاح نمر ده داير ليهو زول يلف عمه ويسافر ؟
* صلاح نمر ده لو في الهلال علي بالنعمة أنا المباراة في الراديو ما أحضرها ..
* اتأكدت تماماً إنو فعلا مرمي الله ما بترفع ..
* ومرمي الناس كان رفعوا بقع ..
* والله صحي ..
* الفيفا شالت من الهلال ست نقاط وأهدت الكأس للمريخ ولكن المدفور رفض هدية الفيفا وانبرش في النقعة ..
* أكتر من كده والله الفيفا إلا تشيل نقاط الهلال وتضعها في رصيدكم ..
* فريق بلا روح وبلا شخصية وبلا هدف ..
* شوية شباب بلعبوا كورة ..
* الشكل الذي ظهر به مدفور العرضة بالأمس يؤكد أن المريخ ليس له في كرة القدم نصيب ..
* في موضوع الكورة كمنشط لا عندكم قسمة ولا نصيب ..
* احسن تجربوا الشطرنج ..
* في الأبيض الرجال فعلوها ..
* هلال قوي ومهاب يضرب بيد من حديد ..
* هلال بسر القلب ..
* هلال ما بتفرق معاهو الست نقاط ..
* هلال بطل لأن وصيفه مدفور وملدوغ في فاشر السلطان ..
* بالأمس حاولنا من خلال هذه الزاوية أن نستفز ابناء السلاطين وقلنا ان مدفور العرضة سيفوز ..
* فكان الحسم من قبل أبطال السلاطين ..
* مريخ الفاشر فريق محترم وقد تطور كثيراً..
* نهنئ كوتش شرف أحمد موسى (أخصائي المريخ) على هذا الفريق المحترم ..
* الفاشر تنحاز للتاريخ وتؤكد أن الرجال مواقف ..
* لكن والله سفركم حار ..
* غايتو لو في المريخ في ادارة بالجد يفترض اللاعبين ديل يخلوهم في الفاشر ..
* جايين لشنو ؟
* صلاح نمر والجس .. انتو قايلين الموضوع سيجة وألا شنو ؟
* وغايتو جنس غايتو ..
* غداً نكتب عن الهلال بشكل أكبر ..
* ونركب صافنات ونجيبة (دارفورية) وأصلو الزول بيموت والذكرى تفضل حية ..
* و..و..
* وجيت أهنيك وأصافحك وجيت أقول…(مرمي الله ما بترفع) ..
