*فاذا قبلنا منطقا باستثناء اصحاب احكام الإعدام وناس يبقي لحين السداد والحاجات المتعلقة بالحق الخاص
*تجدنا نرفض وبرضو منطقا الافراج عن من اجرم في حق الاطفال واعتدي عليهم ايا كان شكل الاعتداء الذي وقع الحكم بسببه
*ولكن
*اعداد كبيرة تم الافراج عنها من سجن الهدي
*بعضهم قد يكون محكوما بعشرة وخمسطاشر وعشرين سنة
*مما يدل علي خطورة الجرم
*ماقلنا شى
*لكن عدم استفادة سجناء سوبا من ذلك القرار مافيهو اي منطق
*ومعظمهم اصحاب احكام بسيطة تبقي لبعضهم منها شهر او بعض شهر او شهيرات
*مافي اي عدالة في تطبيق قرار الافراج بين نزلاء الهدي ونزلاء سوبا
*ومافي منطق ولا مبرر ولا سبب معقول
*ولكنا لن نذهب لما ذهب اليه البعض من تفسير لذلك حيث يرون ان الجهوية قد تكون السبب ان لم تكن القبلية المقيتة
*لاننا في عهد الثورة لا نؤمن بكل تلك المسميات والانتماءات
*نعرف انتماءا واحدا اسمه السودان
*بالمناسبة دي
*قالوا واحد سأل الزعيم شاخور
*قال ليهو جنسك شنو؟
*شاخور قال ليهو انا سوداني انصاري اسكن ودنوباوي مريخابي
*تاني الفضل لي من الجنة شنو؟؟؟؟
*ايها الناس
*دخل نزلاء سوبا في اضراب بسبب احساسهم بعدم العدالة في عهد الحرية والسلام والعدالة
*وعلي ادارة السجون مراجعة ذلك ورفعه للجهات المعنية
*لانو الجهات المامعنية مابتقبل بكده
*ناهيك من الجهات المعنية
*المهم
*ماداير اقول الثورة اتسرقت
*لان حق الشباب الصنع الثورة ماهامل لدرجة ينسرق جراء اهمال الجهات المعنية او جراء مواقفها السلبية او مواقفها التي تنم عن تفويت اشياء ماكان يجب ان تفوت
*كثير من التعيينات فيها استفزاز لارواح شهداء ثورة الشباب
*لانو ماممكن تجيب اعداء الثورة ليقودوا دولاب العمل في عهد الثورة لمجرد انكارهم لانتماءاتهم او تبريراتهم لمواقفهم حتي الرمق الاخير من عمر الانقاذ
*شخصيا احترم جدا الناس الما اتنصلت من انتمائها القبل الثورة
*والناس المانكرت مواقفها حتي اليوم الاخير من عمر العهد البائد
*وبالتالي احتقر ماهم غير ذلك
*احتقرهم جدا
*ايها الناس
*عجز حكومتنا عن الامساك بتلابيب السوق والاسعار فيما يختص بالسلع الأساسية المنتجة محليا
*يعتبر فشلا عظيما لايشبه روح الثوار
*التخبط في اصدار القرارات والعودة عنها واصدار غيرها
*يعطينا فهم انو القصة مامدروسة
*ويجعلنا نسأل
*هل عبارة حكومة كفاءات كانت مجرد شعار يزين جيد شوارع الثورة
*ام كانت مطلبا ثوريا ملحا وهدفا مقصود؟؟؟
*وهل يقود الرياضة بولاية الخرطوم رجل ثوري صحيفته خالية من الانتماء الوظيفي للحزب الواحد ذلك المقتول؟؟ام هو منسوب كبير جدا وعلما في ذلك الحزب وذلك العهد؟؟؟
*اذا كانت اجابة الشق الثاني من السؤال بالايجاب
*يبقي تفكيك من رشحه ومن عينه ومن قبل به
*اهم من تفكيك التمكين زاتو
*ايها الناس
*تعالوا نقيم اداء حكومة الثورة
*حكومتنا
*سمحة كعبه حكومتنا
*لاننا اهل الثورة من قولة تيت
*تعالوا نقيمها ونكلمها في اضانها
*ادائك ياحكومتنا زي كورتنا
*ايقاع بطيييييئ
*ومابنعرف للهجمة المرتدة
*بالطريقة دي ممكن نصرجها في شبكتنا
*فاخوتنا ببعض الوزارات لعبهم زي لعب عمار الدمازين
*والله حكومتنا بتشبه كورتنا
*اسي حكومتنا موش فيها حمدوك و البوشي
*في كورتنا برضك في بس العجب وسيدا
*والباقي ناس الزومة وبويا ساااااكت
*يبقي ياحمدوك ياسيدا
*غير المنتخب واستعن بالله ومن بعده بالشباب الذي صنع الثورة ومنحك المحبة
*وخلينا من البعينو سااااكت ديل
*المهم
*ناس كورونا كان جونا او ماجونا
*كان كتلونا او ماكتلونا
*ماخايفين
*لانو اليوم الكنا خايفين مانحضروا حضرناهوا
*حداشر ابريل ٢٠١٩
*بعد كدة ان شاء الله القيامة تقوم
*قال شنو؟
*الداير ديمقراطية يمشي يعملها في الشارع
*قلنا ليهم تطلع الديمقراطية من نادي المريخ للشارع
*ضحكوا
*ومن يوم حداشر ابريل اصبحوا يضحكون بالجزء الثاني من افواههم المفتوحة من فرط الدهشة
*تضحك؟؟؟؟
*ايها الناس
*ان تنصروا الله ينصركم
*اها
*نجي لي شمارات والي الخرتوم
*تعرف ياوالينا
*مابنقنع اصلو
*لكن بنصلح لمن يبقي الحال زي الحال الرسموهوا الشهداء في الخيال
سلك كهربا
ننساك كيف والكلب قال خطاب الاتحاد جاكم ولا لسسسسسسسة؟
