شداد يبقى ليكم (نجيلة)!!

صابنها
شداد يبقى ليكم (نجيلة)!!
محمد عبدالماجد
• في الانتخابات الماضية فاز آدم سوداكال في الفترة التى كان يسيطر فيها (الكيزان) ويتحكمون في كل شيء…وكانت الرياضة تدار من خلال المؤتمر الوطني…مع ذلك استطاع سوداكال الفوز عن طريق (الانتخابات)…فعلها سوداكال وقت الموضوع بقى صعب على الحكومة.
• فاز آدم سوداكال وهو في (السجن) برئاسة نادي المريخ وتم تنصيبه رئيسا للمريخ بالتزكية بعد ان لم يترشح امامه احد (لم يتقدم احد) – لا قطب مريخي ولا مشجع ولا حتى مبارك تكتيك.
• شداد يعمل ليكم شنو؟
• عن طريق الصناديق اصبح آدم سوداكال رئيسا للمريخ – تم الطعن فيه لدى المفوضية والمحكمة الادارية وتجاوز سوداكال كل هذه الطعون وأكمل دورته وزاد عليها حتى بعد ان تم تشكيل لجنة (مريخية) في اتحاد الكرة لعزله وبعد ان تمت مخاطبة الفيفا وعقدت عدد من الجمعيات العمومية ، العادية وغير العادية من اجل الاطاحة بالرئيس الشرعي.
• شداد يتقطع!!
• الكندو بعد كدا إلّا يجيبوها ليه من اكسفورد.
• مع هذا ومع فوز سوداكال برئاسة نادي المريخ بالتزكية ومع تمديد الفيفا له – إلّا ان اهل المريخ مازالوا يهاجمون كمال شداد ويعتبرونه سببا في رئاسة سوداكال للمريخ.
• لا الكندو عمل شيء.
• ولا الجاكومي.
• شداد لم يتدخل في الجمعية العمومية للمريخ ولم يحدث تزوير في الصناديق.
• شداد لم يقل لأهل المريخ لا تترشحوا امام سوداكال حتى يفوز بالتزكية.
• براي سويتها في نفسي!!
• المريخاب يريدوا ان يحمّلوا شداد وزر انتخابات فاز بها سوداكال بالتزكية – وفشلوا بعد ذلك في اقتلاعه من منصبه – رغم ان كل لجان الاتحاد العام وكتله تعمل ضد سوداكال، فهم قد اوقفوه وحولوه الى لجنة الانضباط بعد ان افقدوه شرعيته وعزلوه من منصبه.
• ومازال سوداكال رئيسا.
• بالشرطة.
• بالنيابة.
• وسوداكال رئيسا.
• يهاجموا في شداد ولا يلوموا انفسهم – عندما لم يتقدم مريخابي واحد ليدق صدره ويترشح امام سوداكال عندما تركوا المريخ وابتعدوا عنه – فقط لأن جمال الوالي قرر الابتعاد عن المريخ.
• الانتخابات بقت سمحة الآن؟
• اهل المريخ لا يريدوا ان يفعلوا شيء – يردوا الاتحاد العام ان يفعل لهم كل شيء.
• يشركوا اربعة محترفين في مباراة – ولا يحاسبون – لأن الاتحاد يشترط تقديم الشكوى قبل المخالفة.
• يبعدوا عناصر المرحلة السنية من الملعب ويخالفوا اللائحة – ويفرضوا على الاتحاد ان لا يسألهم – لأن الشكوى كان يفترض ان تقدم قبل المباراة.
• يسجلوا عجب والرشيد وبخيت خميس بعد توقيعهم لعقودات مع الهلال – ويتم اعادتهم بعد ذلك للمريخ.
• يصاب التش في مباراة المريخ الافريقية – يتكفل الاتحاد العام بعالج التش في اعظم المستشفيات في العالم.
• يصاب سيف تيري يفرضوا على الاتحاد علاجه.
• لا يريدوا ان يفعلوا أي شيء.
• هم يكتفوا عادة بـ (أي دمعة حزن لا لا) و (نهواه في كل الظروف) – الصفوة لا يدفعون.
• الصفوة لا يتقدمون.
• الصفوة يريدوا من الاتحاد ان يفعل أي شيء.
• انتوا عاوزين تعملوا شنو؟ وقت عاوزين الاتحاد يعمل ليكم أي شيء؟
• على الاتحاد ان يوقف الدوري الممتاز (3) شهور بدون أي منطق حتى يكمل رمضان عجب ومحمد الرشيد وبخيت خميس عقوبة الايقاف – ثم يأتي الاتحاد ويبرمج مباريات الدوري لتلعب كل 72 ساعة بعد عودة ثلاثي المريخ من الايقاف.
• ناس المريخ – يتعاقدوا مع غارزيتو وابنه ..وعاوزين كمال شداد يمنع هذا التعاقد.
• قالوا بجيبوا الشرطة لغارزيتو!!
• الشرطة تحكم المريخ!!
• ناس المريخ لأنهم ما جاهزين وعندهم مشاكل عاوزين لجنة الفاتح باني تأجل ليهم مباراة القمة – (الى ان تصبح ودية بإذن الله وتوفيقه).
• وقد تم لهم ذلك؟
• ناس المريخ بعد تأهل المنتخب السوداني الى نهائيات افريقيا ونهائيات العرب فيفا قطر عاوزين الجهاز الفني للمنتخب يختار عمار طيفور الذي لا تتجاوز حتى وقتنا هذا كل مشاركته مع المريخ 320 دقيقة.
• عاوزين فيلود يختار ثلاثي المريخ الذي كان موقوف – والذي اضطر غازريتو اخيرا لإبعاد عجب والرشيد من المشاركة مع المريخ لعدم جاهزيتهم.
• الناس ديل ممكن يكونوا عاوزين سيف الدمازين الذي غادر الى دياره في الدمازين ان يتم اختياره من هناك للمنتخب.
• الاغرب من هذا ان اعلام المريخ الذي كان يتحدث عن (زريبة القش) وعن ملعب المواشي – اجبرته الظروف الى ان يتحدث عن ملعبه وان يسخر منه وهو يبدو مثل (بِركة نورين) كما قال محمد عباس القضارف.
• الهلال كان بلعب في استاده عندما كنتم تطلقون عليه اسم (زريبة القش) واسم (الحفرة) …وقت كانت غبارته للسماء.
• في زول من الهلال قال ليكم عاوزين نلعب في استاد المريخ الذي شيدته الدولة وجعلته في ذلك الوقت في صورة زاهية.
• نسيتوا وقت كنتوا بتسخروا من ملعب الهلال؟
• سبحان الله ..هسع بقيتوا تسخروا من ملعبكم.
• مشكلة ملعب المريخ والإمطار التى هطلت فيه هل كانت بسبب كمال شداد؟ – علما ان الامر كله في يد اللجنة المنظمة التى يتحكم فيها المريخ – والتى تجبر على تنظيم المباراة مكانا وزمانا على حسب رغبة المريخ.
• هم الذين طالبوا باللعب في استاد المريخ.
• عندما اخرجوا من استاد المريخ ولعبوا في استاد الخرطوم شكوا من ذلك وخرج كابتن المريخ بكري المدينة يطالب بالعودة الى استاد المريخ.
• شداد يبقى ليكم (مظلة).
• شداد يبقى ليكم (شمسية).
• يردم ليكم الحفر؟
• شداد الذي وصفوته بالكبر والخرف – يعمل ليكم شنو يبقى ليكم (مصارف)؟
• شداد يبقى ليكم (نجيلة)؟
• الاستاد استادكم.
• والملعب ملعبكم.
• والتاج يعقوب لاعبكم.
• وبخيت خميس.
• وامير كمال.
• شداد يعمل ليكم شنو؟
• عاوزين تلعبوا في استاد الهلال؟
• يا حلاوة.
• الصديق المريخابي المهندس هيثم السنوسي قال لي والله تقول استاد الهلال ما صبت فيه مطرة.
• استاد الهلال واستاد المريخ تقول ما فاصل بينهما شارع.
• هيثم قال لي وقت اقلب لمباراة الهلال – بشوف مباراة الهلال مقارنة بمباراة المريخ زي كأنها في الدوري الانجليزي.
• قولوا ما شاءالله.
• برشلونة بقى بدون ميسي.
• الهلال فيه اتنين ميسي.
• ميسيان.
• نحمد الله ونشكر فضله.
• ناس الليغا لو حضروا للسودان …بعدمونا (الميسي)…يمين صلاح عادل ما يخلوه لينا.
• استاد الهلال الذي سوف يستقبل مباراة المنتخب في 7 سبتمبر وسوف يستقبل مباريات الاندية السودانية الاربعة بما في ذلك مباراة المريخ في 11 سبتمبر هل يمكن ان يكون مفتوح لمباريات الدوري الممتاز ليلعب فيه المريخ الذي كان يصفه اعلام المريخ بسوق القش.
• ما قلتوا قش!!
• ما قلتوا زريبة.
• الملعب الذي قالوا انه كان سببا في اصابة (التش) يبكون عليه الآن بعد ان اتضح ان استاد المريخ كله (حفر).
• (الحفر) البرة – الحفر الشغالين فيه ضد سوداكال …ظهر في ملعبكم.
• يا سبحان الله.
• انتوا (الحفر) غريب عليكم؟
• استاد الهلال بقى ليكم حلو الآن.
• الغريب ان قناة الملاعب كان يتحدث استديويها التحليلي عن مباراة المريخ وهلال الساحل وكأن هلال الساحل كان يلعب في (الكامب نو) في الوقت الذي كان يلعب فيه المريخ في ام درمان في معلبه.
• قناة الملاعب واضح انها جناح الكندو.
• ديل ناس حديقة الموردة ذاتهم.
• المطر والحفر عادي بالنسبة على كاميني ويوسف بدوي وانور السادات ومفضل محمد الحسن …لكن ناس بكري المدينة وامير كمال والتكت ..الملعب صعب عليهم.
• علما ان الملعب في الاساس هو ملعب المريخ.
• في ناس بشكوا من ملعبهم.
• نجيب ليكم قلاب تراب؟
• اذا كان هذا حال المريخ؟ طيب حال هلال الساحل يكون كيف؟
• (البحارة) اللعب في هذه (البرك) وضح انو ما عندهم فيه مشكلة.
• بحارة فعلا.
• في زول بيلعب مع (البحارة) في الخريف.
• التاج يعقوب قرب يغرق ليه في حفرة.
• والجزولي نوح لو كان بشارك في اولمبياد طوكيو في مسابقة السباحة كان على الاقل جاب ليه (فضية).
• بكري المدينة لو ما شافها شينة كان عاوز يرمى سنارته.
• الترع دي فيها سمك؟
• …….
متاريس
• الناس الاستغلوا شكل استاد المريخ لمهاجمة سوداكال نقول ليهم في فترة جمال الوالي وبسبب التصريف الموية وصلت للركب في استاد المريخ.
• الصور موجودة.
• انتوا قاعدين تنسوا؟
• استادكم في الخريف اصلو كدا.
• سوف اعود لأكتب عن اهلي شندي.
• ويبقى الاهلي شندي …الاهلي شندي.
• قلبونا مع الاهلي شندي من اجل البقاء والعودة الى موقعه الطبيعي ان شاءالله.
• مفضل محمد الحسن قدم مستويات رائعة مع هلال الابيض ولم يقصر مع المريخ الفاشر وها هو يقدم الابداع كله مع هلال بورتسودان.
• مفضل يستحق ان يكون في المنتخب المرحلة القادمة.
• لاعب جاهز.
• الاهلي المصري برغم ان الاتحاد المصري لم يفتح سيستم التسجيلات ..ومع ان الاهلي متساوي مع الزمالك في النقاط …والفريق مقبل على مباريات مفصلية في هذه الايام ، إلّا ان الاهلي حسم حتى الآن ثلاث صفقات من العيار الثقيل …رغم ان الاهلي فاز ببطولة الاندية الافريقية للابطال.
• (وقع كريم فؤاد لاعب النجوم المعار لإنبى على عقد مع الأهلي ممتد لمدة 5 مواسم ليكون الصفقة الاولى للمارد الاحمر، في الوقت الذي ينضم كريم فؤاد لتدريبات الأهلي بعد انتهاء مباريات انبي في بطولة الدوري العام، في ظل انتهاء اعارته بنهاية الموسم الجاري، وحصل الأهلى على توقيع اللاعب كما أنهى جميع إجراءات الصفقة مع نادى النجوم وينتظر اعلان القلعة الحمراء عن الصفقة وتقديمه بشكل رسمى لوسائل الاعلام. وحسم الأهلى صفقة الموزمبيقى لويس ميكيسونى جناح نادى سيمبا التنزانى مقابل مليون و50 ألف دولار لمدة 3 مواسم مقبلة، خاصة بعدما نال اللاعب إعجاب لجنة التخطيط والجهاز الفني للفريق الأحمر. و نجح النادى الأهلى فى حسم صفقة جناح فريق برايتون الإنجليزي بيرسي تاو، بعد توصل الناديين إلى اتفاق نهائي من أجل إتمام الصفقة).
• انتوا يا ناس الهلال منتظرين شنو؟
• احسموا تسجيلاتكم.
• ما تعملوها كسور وبواقي ساكت.
• المدرب البرتغالي بتعامل بعلقية اوربية ويمكن يكون متمهل بعض الشيء.. ولو مشينا بهذا النظام الدقيق في السودان …القطر بفوت …والهلال ما بسجل.
• احسموا صفقاتكم.
• ……..
• ترس اخير : عندنا زول غرق في استاد المريخ.