صحيفة كورة سودانية الإلكترونية

شفنا الدنيا فرحة عشان مافيها انت

42

تغريدة واتساب
بقلم : معاذ ابومؤيد

شفنا الدنيا فرحة عشان مافيها انت

سبحان مغير الأحوال من حال الي حال
مش ياهو المريخ القبل يومين
نتيجة وانضباط تكتيكي وحضور والبسمة في وجوه اللاعبين…
الحصل شنو بيكون
علاء الدين والمدرب يضحكوا مع بعض !!
الكل حالتو النفسية مستقرة
غايتو الجواب يكفيك عنوانه
وعنوان جوابنا أمس
اداء جيد وانضباط تكتيكي
اهداف حاضرة …
الأجانب امبارح شكلهم غير وكلهم مشاركين !!
بعد دا المابشوف من الغربال يكون عميان ….
••••••••••••••••••••••••••
يا جماعة مانعمل نفرة وندفع قيمة الفندق في اديس وتكون الإجازة طويلة حبة…
خلونا نتكفل بإقامة جون سينا مدة أطول أمكن الحال ينصلح والمزاج يكون مختلف …
ياخي رجل الخط جاري مرتاح
وبتاع الاسعاف سايق باندياح
والبجيبو الكورة دخلو منظومة النجاح
لوك ايمال صوتو صدح
وعلاء الدين لونو فتح
الباقي شنو!!
منتظرين شنو يالجنة التسيير !!
••••••••••••••••••••••••••
الحضور امس ماعجبنا
والمدرجات مابتشبهنا
لكن نقول شنو
والكان السبب منو
شكرا الألتراس ومبروك الانصهار في بوتقة واحدة
بس مايجيكم جون سينا يفرتقكم
ابقوا عشرة علي الزعيم
وابقوا الصمود ماتبقوا ذيف
المريخ منتظركم شتاء وخريف
اللاعبين ذاتهم بقو مزاجهم معاكم
شكرا لكل شفت جوة الاستاد
ونفرتنا الجاية باقي ليها ايام …
••••••••••••••••••••••••••
لكن ياناس لجنة التحكيم مابالغتو
هيثم النور دا ما استهلكتوه!!
غايتو متر خط الملعب جنس تمتير
عدادك رامي ياهيثم النور
بقيت ذي عوض احمودي واسماعيل عبدالجبار
اساسي قبل الكراسي في جميع المباريات !!
تاني مفروض يختوك مع تشكيلة الفريقين !!
ربنا يديك القوة وتجري كمان وكمان
ويوسع في رزقك…
••••••••••••••••••••••••••

وياناس النيلين شكلكم مرتاحين مع اللاعبين وامس متميزين في النقل وشكلو جونا سينا كان ضاغطكم برضو شايف صورتكم لونها فتح والوانها زبطت…
بس لم تكون في مباريات في الدوري الاوربي شاشاتكم تكون ذي افلام اسماعيل يس ابيض واسود
لانو صورة الدوري الاوربي والبلي استيشن واااااحد !!
من شدة ما نضيفة والصورة واضحة شايفين الدم جاري في عروق اللاعبين وطقم اسنان واحد من الجمهور !!
لكن عندنا هنا العلم الطوله امتار تشوفه رهاب رهاب والوانه مداخلة
يكون جون سينا كان عافص السلك !!
••••••••••••••••••••••••••
مابحب نجيب سيرة الشأن الفني ودى عندها اهل الاختصاص
لكن كريم الحسن كمل مباراة وحلل راتبو ..
بس الجابو منو بالله
لاعب يدس وراء اللاعبين
دي اول مره يدونا ليها
ولاعب فاولاتو اكتر من باصاتو اول مرة تمر علينا
بس الجابك دا انشاء الله مايجي بشارع العرضة ويشوف شارع العرضة دا بير وينطط براهو
قادر ياكريم
اسه لو شلت السمسرة ساكت من غير ماتجيب لاعب وياخد مرتبات ماكان احسن لينا !!
••••••••••••••••••••••••••
ختاما
تمنياتنا ليك باجازة طويلة المدى
ويعجبك المكان وتاخد ليك راحة علي طوووووووول
•••••••••••••••••••••••••
ونحن علي المدرج ونشجع ونتفرج
امبارح المدرج ذاتو اتنفس!!
والجماهير من شدة الاستاد فاضي راكبة ركشة وتتفسح..
وقالوا المواصلات فاضية!!
والخرطوم جاها همبريب وغبار!!
ياخي الناس دي كلها اتنفست
المغتربين اتنفسوا !!
الشاشات اتنفست والوانها ذاتها اتغيرت!!
بمناسبه الشاشات عايزين نسال من شاشة الاستاد مشت وين والموضوع دا حنمسكو في الايام الجاية !!
عشان دي ممتلكات عامة مش ممتلكات خاصة …
بس نخلي حلتكم تنجض في نار هادئة!!
••••••••••••••••••••••••••
همسة اخيرة
صوت الجمهور قرب يطلع
وقرب يوصل
لوكو الصبر ذي صبرنا علي قضية الوك
سنصل الي قول الحق قريبا
مع الشفوت مش حتقدر تغمض عينك
الناس البتمشي وتعفص ساكت
تاني حتفتحوا عيونكم تكون مفتحة فنجان..
ساااااامعني !!!
••••••••••••••••••••••••••
نبارك للاعبين الانتصار
ونقول ليكم سامحونا ظلمناكم وانتو اتاريكم نفسكم كان مكتوم للدرجة دي
بس ياريت نفس النتيجة او ربعها في الجزائر
اهم شي يالوك ايمال ريحت المدافعين الاتنين علي وامير
لكن!!
نصيحة لوجه الله لو عايز تغير اللاعبين استشير انشاءالله جمال سالم لانو قرايتك تعبانة للملعب !!
وبالسلامة ليكم ودعناكم الله عايزين ذيادة في عدد الشهداء في الجزائر……
••••••••••••••••••••••••••
خارج النص
باي باي برشلونة
اتلتكو يتخصص في كبار اسبانيا داخليا وخارجيا….
••••••••••••••••••••••••••

 

تغريدة واتساب

قد يعجبك أيضا
اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد