* قبل حكومة الإنقاذ كان سعر الخروف وسعر جلد الخروف واحد ..
* تشتري الخروف ب(15) جنيه وتبيع الجلد ب(14) جنيه ..
* كنا بنستهدف الجلد أكثر من اللحم ..
* غاية كانت عندنا جلد الخروف وليس لحم الخروف ..
* الخروف كان بحاجة رمزية جدا ..
* ممكن تشتري (قش) يدوك معاهو خروف هدية ..
* نفس فكرة الموبايل ..
* تشتري موبايل يدوك معاهو سماعة هدية ..
* وأول ما جات حكومة الإنقاذ أصبح الخروف أغلى من (جلد الخروف) ..
* وانعكست الآية .. زمان تشتري القش بدوك الخروف هدية ولما جات الإنقاذ تشتري الخروف بدوك معاهو القش هدية ..
* وبعد شوية بقى الوضع .. تشتري الخروف وتشتري القش ..
* وبعد فترة تشتري الخروف وتشتري القش وتتبرع بالجلد لناس الدفاع الشعبي ..
* حتى الجلد شالوهو مننا ..
* ولو ما الحكومة سقطت كان ح يطلعوا قرار يقول ليك : بعد تضبح الخروف تتبرع باللحم لناس الدفاع الشعبي وانت تشيل الجلد ..
* كنا ح نصل مرحلة زي دي لكن الحمدلله الحكومة سقطت ..
*الحكومة سقطت بعد ما صدرت إناث الماشية وبعد ما كيلو الضان بقى ب(400) جنيه ..
* الآن قالوا أسعار الخرفان في السوق تتراوح ما بين (7 الى 60) مليون ..
* اتخيل خروف بي 60 مليون ..
* شكلو قارئ طب ..
* خربج مختبرات يمكن ..
* بتكلم لغات ..
* خروف بي 60 مليون اللهم إلا يكون بيقول (بااااااع) بالعربي وبالانجليزي وبالفرنسي وبالصيني ..
* يحدث هذا في بلد فيه أكثر من مليون رأس من الماشية ..
* السنة دي الضحية نحن ..
* الضحية نحن ما الخروف ..
* الضحية المريخ ..
* المريخ عربياً ح يواجه الوداد المغربي، وافريقياً ح يواجه شبيبة القبائل الجزائري ..
* يعني زي الزول الواقع ليهو في مشكلة ..
* زي لما تلقى الشارع الرئيسي مقفول بالمتاريس، تخش بنص الحلة برضو تلقي المتاريس حاضرة ..
* لا تعرف ترجع الظلط ولا تعرف تواصل بالزقاقات ..
* المريخ لو فكر يركز علي العربية بيطير من الأفريقية ..
* ولو فكر يركز علي الأفريقية بيطير من العربية ..
* ولذلك أنا أقترح لهم التركيز مع المحلية ..
* ركزوا مع كأس السودان ..
* هكذا أقترح ..
* وأي زول طبعا حر في (مقترحاتو) ..
* بالنسبة للهلال سيواجه كما هو معلوم الوصل الإماراتي عربياً وسيواجه ريون الرواندي افريقياً ..
* لن نقول مهمة الهلال سهلة ولكن نقول ثقتنا في الهلال كبيرة ..
* الهلال بشخصيته ومواهبه يستطيع أن يتجاوز المرحلة الأولى من البطولتين إذا أحسن الإعداد ..
* العناصر الموجودة في الهلال لا يعلا عليها إذ توجد خامات على طراز رفيع فقط تحتاج لاعداد مثالي من الناحية البدنية والفنية والنفسية ..
* صحيح الهلال في فترة التسجيلات الأخيرة لم يكمل كل نواقصه ولكنه أحدث إضافة ربما تضفي قوة جيدة للفرقة ..
* ويبقى الأمل معقود على الثنائي التونسي والجزائري ..
* المضي قدما في درب البطولات بيد الهلال لا بيد غيره ..
* الهلال في يده القلم إن أراد كتب نفسه سعيداً وإن شاء كتب نفسه شقياً ..
* وبمناسبة القلم ..
* بدون دعوة وبدون جدول خرج الشعب السوداني في تظاهرات احتجاجية كبيرة ليلة أمس الأول واستمرت حتى صباح الأمس ..
* احتجاجات رفضت نتائج لجنة التحقيق الخاصة بفض الإعتصام ..
* النتيجة كانت مخيبة جدا رغم انها متوقعة ..
* ما حدث في ساحة الإعتصام لم يكن هينا وبالتالي الشفافية هي وحدها التي سوف ترضي الناس ..
* ما حدث فاق البشاعة ولن يرضى أحد إلا بتحقيق عادل وواضح ..
* الدم السوداني أغلى ما في هذه البلد ..
* ننتظر تكوين الحكومة المدنية التي بدورها ستكون لجنة تحقيق محايدة للنظر في تلك الكارثة الإنسانية ..
* ونركب صافنات ونجيبة (سودانية) واصلو الزول بيموت والذكرى تفضل حية ..
* و..و..
* والقاضي الله
