شلعوها الزنابقة

نبض الصفوة
امير عوض

؛
حتت أنو المريخ يتأهل عربياً و الزنبوق يكون طيش أفريقيا دي صعبة.
ما بتتهضم للزنابيق.
وقفت ليهم في حلقهم.
الجماعة راجين الجيش يبرد بطنهم قام زاد أوجاعهم.
بصراحة فقع مرارتهم.
و يُقال هرّد كبدتهم كمان.
الدواعي النفسية زادت عليهم.
و المغصة دايره تشقهم
كيف المريخ يتأهل و هم متزمبقين في الطيش.
وسط الوجعة دي قالوا العراب كان قاعد يفكر.
يفكر في الصفر اللاصق فيهم ده.
و يفكر في المريخ الاتأهل عربياً.
و سرح بالتفكير شوية و وصل حتت انو فرط في تيري و حمزة.
و كيف أنو ضيع ميدو و العقرب.
و فجاءة.. آدم جاء داخل شايل ليهو كرتونة.
كردنة قال ليهو ده شنو يا آدم؟
آدم قال ليهو دي المرتبات يا ريس.
مرتبات بالكرتونة و نتائج كويسة بالمعلقة!!
كردنة عرف انو بنفخ في قربة مقدودة.
و مع كلمة (قربة) اتذكر انو عندو محترف اسمو غاربا.
محترف طول في عرض تقول جاي يحترف (بودي قارد).
العراب شات الطربيزة القدامو و نادي آدم.
قال ليهو رجع الكرتونة دي انا بقد القربة دي.
بلا محترفين بلا وجع راس.
واتارا اب شعيرات ده غير الكضب ما شوفنا منو حاجة.
غشاني و قال لي انا ماشي برشلونة و انا كنت قايلو أمتيتي.
طلع ماسورة و بتنطط زي حمل الخريف بدون كورة في الراس.
رجعوا الكرتونة دي.. ده قرار أنا اخدتو.
انا موش رئيس الهلال.
رئيس عديل يعني ما لعب.
و آدم رجع الكرتونة و خارج نفسو من الغضبة دي.
ناس قربة و واتارا يبرطعوا في التمرين و كردنة بي جاي نجض بصلتهم في النار.
كردنة حريف في الحاجات دي.
عندو نظريات عالمية في طيران المحترفين.
نظرية (يا ميرفت الدولار شات و نحن شوتنا معاهو).
و نظرية (لو لاقاك حمار في السوق رفسك هل بترفسو).
النظريات دي قال ليك الخواجات هسه بترجموا فيها.
منتظرين الترجمة تخلص علشان يعتمدوها عالمياً.
بيريز و الخليفي منتظرين كتاب (فنون الادارة للعراب ملك الشطارة) بفارق الصبر.
الكتاب ده حيكون معلم من اعلام الادارة الرياضية.
ما علينا.
المريخاب الثقلاء حايمين بإسكرين شوت لصفحة واحدة اسمها زي اسم المنسقة السابقة.
ما معروف الصفحة حقيقية واللا وهمية.
المهم.. صاحبة الصفحة.. واللا صاحب الصفحة كاتب ليهو كلمة غلط.
دي طبعاً عادة زمبوقية متأصلة.
بدل (طائلة القانون) مكتوب (طاولة القانون).
كمان جابت ليها طاولات.
الركد عرفناهو.. الطاولات شنو؟
قانون ده واللا فرن؟
قال ليك ارتكبوا مخالفات اوقعتهم تحت (طاولة) القانون.
ان شاء الله القانون الفي الطاولة دي ما اتقلب في الارض.
باقي الايام دي القانون ده أزمة.
النفر بي عشرين قانونه.
و كمان صفوف تخليك تشتهي الكسرة و العصيدة.
لكن يا ربي المخالفات البترمي تحت الطاولة دي زي شنو؟
السترة و الفضيحة متباريات يا زنابيق.
الاولاد ديل أدوهم قروشهم بعد داك نفتح موضوع الطاولة.
قالوا ما صرفوا تلاتة شهور.
كردنة ده أصلو من يفلس بفشها في المحترفين.
الدولار ده من يشوت كردنة بقبل عليهم و يشوت.
علشان ما تقعوا تحت (طاولة النيفا) أدفعوا المخالصات من سكات.
قصص الخزعبلات دي ما بتخش راسنا.
أدوا قربة ده قروشو اول حاجة بعدها جيبوا طاولتكم و تعالوا احكوا لينا.
كردنة ده بدل غرفة المخدرات مفروض يفكر في مشروع محو الأمية.
الناس دي عذبت العربي عذاب شديد.
زي قصة الرطاني الفي يوم أمّ المصلين.
الرطاني قرأ سورة يوسف.
بعد انتهي واحد من المصلين قال ليهو (والله العملتو في يوسف أخوانوا ما عملو فيهو).
الجماعة ديل ذاتو فترونا.
قربوا يعملوا لغة جديدة.
اللغة الزمبوقية الراكدة تحت الطاولة.
قبل يومين سألت عمك قوقل.
كتبت ليهو مواعيد بطولات (النيفا).
قوقل ردّ لي (هل تقصد الفيفا).
قلت ليهو لا.. النيفا.
نتيجة البحث جاتني: (هل انت زمبوق.. واللا ما قادر تركد مع الشباب)!
جازيت محنك يا قوقل.
انت متقوقل معانا هنا برضو.
قاعد معانا تحت الطاولة.
خلونا في المهم.
المحترف القال (الهليل) ده ياتو فيهم.
الزول ده من البداية قلبي أباهو.
هلهلم قبل يبدأ.
ياربي بعد التشليعة دي بقول عليهم شنو؟
القصيروني داك حنني والله.
لكن واتارا عجبني ليهو.
أب شعيرات يكضب و يغش الجماعة بي قصة برشلونة.
المساكين سفروهو علي حسابهم فيرست كلاس.
قالوا خلاص نحن و برشلونة حنعمل توأمة.
الجوهرة و الكامب نو حيكونوا اخوات في الرضاعة.
أب شعيرات لفّ ليهو اسبوع في سوق أم دفسو بتاع برشلونة و جاء.
لليلة في ناس منتظرين نتيجة الاختبارات.
مساكين ياخ الزنابيق ديل.
أي مكنة بتقسم فيهم.
تتذكروا لما غارزيتو غشاهم و شال مستحقاتو.
في ناس قالوا كردنة مشي دبي و اتفق مع غارزيتو علي حوافز كأس العالم للأندية.
ما تضحكوا.
الزمن داك الغرفة يادووب افتتحوها.
غارزيتو اتصور مع كردنة و شال الــ300 الف دولار و جاء المريخ.
جنس مساخة طاقة الفرنسي ده.
لو مشي أي فريق في العالم ماف مشكلة.
لكن غارزيتو البايخ جاء السودان.
جاء و جابهم طيش أفريقيا لما جمد الكورة.
خلو غارزيتو.. طيب تتذكروا المحترف الاسمو زي المحريب.
الجاء هنا و اتفسح و حايم مع زوجتو.
زوجتو هي واللا خطيبتو؟
الزمن طال ذكروني؟
في ناس قالو صاحبتو.
المهم البنية حضرت ليها شكلة و قعدت تبكي.
مشاعرها رقيقة و جايه من سوريا محل الهدوء و السكينة.
البت اعصابها ما بتتحمل و حلفت علي المحترف ما يلعب مع الشريرين ديل.
تتخيلوا.. مكنات زي دي كانت بتقسم في الناس دي.
طوالي بصدقوا.

نبضة أخيرة
ما وريتونا.. الطاولة دي خبز فاخر واللا عيش بلدي.