* لا أظن أن هنالك شاب لم يلبس ملابس والده في فترة من فترات حياته .
* كل الشباب جربوا ملابس الأباء ما عدا الأباء الذين توفاهم الله ولم يكتب للأبناء مصاحبتهم في الدنيا .
* إحساس إنك تلبس (جلابية) أبوك وأنت في طور المراهقة هو إحساس جميل يمنحك كثير من السعادة .
* تلبس جلابيتو وقميصو ونظارتو .
* بتحس إنك بقيت كبير لمجرد إنك لبست ملابس أبوك .
* يحدث هذا لأننا كنا نستعجل (الكبر) .
* كنا دايرين نبقى كبار بالرجاله .
* ووجدنا ضالتنا في ملابس كبارنا .
* وحتى البنات (التابات ياداب) الواحدة بتلبس توب والدتها في وقت مبكر .
* كنا ننتبه كثيرا لكل فتاة تأتي (درس العصر) بثوب والدتها .
* وبالذات التوب الليموني .
* وتقريبا كل البنات جربن مسح (نوار زهور صباح الخير) في الشفاه (بدل روج) .
* فكرة إنك تلبس ملابس الناس الأكبر منك عشان تبقى كبير هي فكرة ممتعة .
* ليس ملابسهم فقط بل حتى حركاتهم وونساتهم وكل تفاصيلهم نتشبه بها .
* زمان نحن وأولاد حلتنا بنرسم (الشنب) بالفحم وقلم الرصاص .
* وأكيد التشبه بالرجال فلاح .
* وبما أن ذلك كذلك فإن مانشيت صحيفة (الصدى) الذي جاء فيه : (سيد البلد يدشن إعداده بشيخ الاستادات) إنما هو شئ لا يخرج من كونه (شاب يتردي ملابس والده) .
* وعلى العكس هذا لا يغضبنا فمن يتشبه بالهلال يضيف للهلال ولا يخصم منه .
* واصلا (التشبه بالهلال فلاح) .
* المريخ الشهير ب(المدفور) وقت ما بقى هلال قال أحسن يلبس ملابس الهلال .
* (سيد البلد) و(الزعيم) و(صاحب المقام الرفيع) و(كبير البلد) كلها (ملابس الهلال) .
* ولكن لا نمانع أن يمسح المريخ محل الشنب بالفحم .
* كل التمهيداب كده .
* ما عندهم شخصية .
* كل زملاء المريخ في التمهيدي هم بالحالة دي .
* والله صحي .
* عندك القطن التشادي (دفعة بالنسبة للمريخ في التمهيدي) وبرضو كلامهم كتير .
* ناس القطن التشادي كلامهم كتير وبرضو بيقولوا القطن سيد البلد في تشاد .
* الغزالة الكيني .. نفس الفهم .
* الروب الجنوب أفريقي زميل قديم للمريخ في التمهيدي وحاليا بيطاول على اورلاندو .
* (الباباي النيجيري) صاحب باع في التمهيدي وبرضو بيطاول على انيمبا .
* الجماعة ديل كلهم كده .
* بيطلعوا من البطولات بدري عشان كده ما بكون عندهم شغلة .
* ومعروف قلة الشغلة بتعلم المشاط .
* زول بطلع من أول مباراة بيكون عندو فراغ عريض .
* وبيني بينكم حارة والله تطلع من التمهيدي ويكون في فريق من بلدك في المجموعات ولسه رامي قدام .
* إحساس حار والله .
* إحساس إنك عاطل وأولاد الحلة شغالين صعب .
* غايتو أنا عندي مقترح لناس المريخ .
* بقترح تعملوا إتحاد تسموه (إتحاد تمهيداب أفريقيا) ، أو (إتحاد أطفال أفريقيا) ، أو ممكن (إتحاد عطالة أفريقيا) .
* وخلوا مقر الاتحاد ده يكون في السودان بما إنو المريخ (شيخ طريقة) وطويل الباع في موضوع التمهيدي ده .
* هكذا بقترح .
* وأي زول طبعا حر في (مقترحاتو) .
* المهم في الموضوع نحن ما دايرين جمهور الهلال يزعل من مانشيت صحيفة الصدى .
* الموضوع عادي .
* زي ما قلت ليكم نحن نقبل هذا المانشيت في إطار (التشبه بالهلال فلاح) .
* لكن كمان بنخاف يجي يوم ويقولوا المريخ لقبو (الموج الأزرق) .
* ح يقول ليك : (الموج الأزرق يواجة الهلال ورمضان عجب يتحدى) .
* الناس ديل اتوقعوا منهم أي حاجة .
* هم في حالة عدم توازن .
* عشان كده خلونا في كورتنا وهلالنا .
* أيام ويواجه الهلال بلاتنيوم في مباراة يستهدف من خلالها الهلال النقاط كاملة .
* أربع نقاط من مجموع مباراتين ستنقل الهلال للدور القادم .
* ولكن نحن نرفع شعار الست نقاط .
* بلاتنيوم خرج من المنافسة وباع نصف تشكيلته .
* ولكن هذا لا يعني أنه فريق سهل .
* يلزم أن نمنح الخصم حقه من الإحترام وأن نخلص للكرة ومن بعد سيكون النصيب فرحنا .
* وننصح بعدم التركيز مع الحكم .
* ما نحاول نبحث عن مبررات .
* إذا ركزنا على الحكم سنمنح اللاعبين إحساس يمكن أن يفسد كل شئ .
* أفريقيا مشكلتها في التحكيم ولن تحل اليوم ولا غدا .
* دي مشكلة ضمائر .
* عشان كده على مجلس الإدارة ورئيس البعثة التركيز مع الحكم وإشهار العين الحمراء ، أما نجوم الفريق فعليهم التركيز في شغلهم .
* نركز مع الهلال ولا نشغل بالنا بالأهلي والتحكيم .
* ده شغل المجلس الذي عليه أن يكون صاحيا خلال الفترة القادمة .
* الأهلي سيضرب على كل الأوتار حتى يفقد الهلال تركيزه .
* المرحلة تحتاج لوحدة وتكاتف وذكاء .
* ندعم بشدة سفر الكاردينال مع البعثة ونثمن تفهمه ضرورة تسليم اللاعبين كل المتأخرات .
* هذه الأمور ستمهد الطريق للفريق حتى يحقق المطلوب ويترقى للمرحلة القادمة بإذن الله .
* ما نخلي حاجات جانبية تشغلنا عن الهم الأكبر .
* نجهز بديل الشغيل ونطلب من بشة أن يصحى شوية .
* كل لاعب يقعد مع نفسو ويراجع حساباتو حتى يكون الهلال كما يجب .
* أما ناس المريخ فموعدنا معهم مباراة الأهلي إن شاء الله .
* قمة الهلال والأهلي ستكون مباراة بين الكبار أوي .
* نعلم أن المريخاب في مباراتنا مع الأهلي سيكونوا مصريين أكتر من سمية الخشاب ذاتا .
* لكن بإذن الله سنضرب مصريين مصر ومصريين السودان برضو .
* ونركب صافنات ونجيبة (هلالابية) واصلو الزول بيموت والذكرى تفضل حية .
* و..و..
* والقادم أحلى .
