* قبل سنوات بعيدة وعندما إستباح الخرطوم (الخمر والميسر والقمار) ومشتقاتهم من الحرام قام المجتمع السوداني بمكافحة ذلك من خلال بيوت الأعراس ..
* أنتجت البيوت السودانية أغنية (سيرة) كافحت بها (الخمر) بطريقة غير مباشرة ..
* وهذا يثبت ان للأغنية دور يمكن أنت تلعبه في المجتمع ..
* إمتدحت (الدلوكة السودانية) الرجل المستقيم فكانت أغنية : (لا لعب القمار ولا جرب الخمرة) ..
* تقول الأغنية: (مشهور في الفريق لا بيت ولا بيتين لا لعب القمار ولا جرب الخمرة) ..
* مدحت حواء السودانية الرجل الذي لا يلعب القمار ولا يشرب الخمرة ..
* بل أن الأغنية مدحت الرجل (الما جرب الخمرة) ..
* الما جرب .. مش الجرب وتاب ..
* تذكرت هذه الأغنية تحديدا وأنا أطالع خبر الإستغناء عن خدمات (ثلاثة) محترفين بفريق الهلال من أصل (خمسة) محترفين ..
* وحكمة الله التلاتة الذين تم الإستغناء عنهم (مواسير) والثنائي الذي لم يتم الإستغناء عنه جيدين ..
* يعني قبل ما نتكلم عن إيجار الشقة والفاحشة والخمر والقمار لابد أن نعرف أن المحترفين الذين أجروا شقة ويشربون الخمر هم (المواسير) بينما الما مواسير ما أجروا شقة ولا بيشربوا خمرة ..
* يعني جات صدفة كده يا الكاردينال ..
* سبحان الله حكمتو بالغة والله ..
* نتفق أو نختلف حول القيمة الفنية للمحترفين الذين نتعاقد معهم وعن الطريقة التى نستجلبهم بها ولكن يجب أن نتفق على أن لا نكذب ..
* الكذب والتلفيق مرفوض في كل الأحوال ..
* تلفيق التهم والكذب ورمي الناس بالباطل لا يجوز ولا يشبهنا ..
* لو مجلس الهلال متمثل في الرئيس خجلان من شطب المحترفين (الفاشلين) فان الخجل لا يبرر الكذب والتلفيق ..
* كونك تكون خجلان ما معناها تغشنا وما تحترم عقولنا ..
* وبعدين الخجل في شنو ؟؟ يعني خلاص دي أول مرة تجيبوا محترف وتشطبوهو بعد (55) يوم من تسجيلو ؟؟
* الخجل فوق شنو ؟؟
* هل سيسيه كان بتاع فاحشة وشقة ؟؟ هل موكورو كان بتاع شقة وفاحشة ؟؟ هل مكسيم كان بتاع شقة وفاحشة ؟؟ هل أبيكو كان بتاع فاحشة ووسكي ؟؟ هل بوتاكو الأثيوبي كان بتاع وسكي وفاحشة ؟ هل جاجا البرازيلي كان بتاع فاحشة ؟؟ هل تيتيه كان بتاع عرقي وبنقو ؟؟ هل شيبولا كان بتاع مريسة وقمار ؟؟ هل محمد عبد الرحمن إصابتو مزمنة ؟؟
* ليه بنلفق في الناس وبنقول فيهم كلام كذب ؟؟
* الشطب وعدم الصبر والتسجيل الخطأ والشطب الكارثي من أبرز صفات ومواصفات مجلس الكاردينال فلماذا التلفيق ؟؟
* طيب عندي سؤال: بالنسبة للتنزاني (المتألق) توماس ما ليهو في الفاحشة ولا كيف ؟؟
* وبالنسبة للأخ البرازيلي (المتألق) جيوفياني ما ليهو في الوسكي ولا كيف ؟؟
* طيب هل لو كان توماس وجيوفياني مستواهما زي مستوى هارونا وسيرجو هل ممكن يحصل ليهم إستثناء من حكاية الفاحشة دي ولا جيوفاني وتوماس حاليا هم بتوعين فاحشة لكن الإستثناء جاء عطفاً على مستواهما ؟؟
* السؤال ده مهم جدا يا ريس ..
* أها طيب لو كان هارونا لعاااااب وفي كل مباراة بيجيب هدفين هل ممكن يتم شطبه بدواعي الفاحشة والشقة غير المفروشة ..
* أنا أفتكر إنو الإصلاح لا يتم بهذه الطريقة الساذجة التى يعمل بها مجلس الهلال ..
* جمهور الهلال ده فيهو (رئيس الجمهورية وفيهو الوزراء والولاة والسفراء والأطباء والمهندسين والعلماء وأساتذة الجامعات وعمال اليومية وناس الأعمال الحرة ورجال الأعمال وستات الشاي وأصحاب الكافتريات و..و..) ..
* يعني الهلال (شعب كامل) ..
* عشان كده عيب شعب كامل تحاول تستغفلوا وتطلع بيهو العالي بكلام أقل ما يوصف بأنه كلام ساذج وفارغ ..
* ياخ شقة شنو وفاحشة شنو ؟؟
* هارونا الفاشل ده لحدي الآن ما بيفرز شارع الأربعين من شارع العرضة تقول لي شقة وفاحشة ..
* هو زول ما كمل الشهر التاني كيف يفكر في الفاحشة قبل ما يحفظ الشوارع ويحفظ كلمتين باللغة العربية ..
* الحاجة التانية .. أوتارا شاب مسلم وشفناهو بيصلي وبيصوم وهو محصن ولذلك من الخطأ أن نرميه بما ليس فيه ..
* أنا بكتب الكلام ده بعيدا عن المستويات الفنية يا جماعة ..
* يعني ما بدافع عن المحترفين الذين تم شطبهم ..
* أنا بدافع عن قيم إسلامية وسودانية وهلالية أصيلة ..
* كيف نصدق إنو الشطب كان بسبب الفاحشة وأنت القلت لينا: (بكري المدينة تاني ما بيدقها) ؟؟
* كيف نصدق إنو الشطب كان بسبب إيجار شقة وأنت القلت لينا: (محمد عبد الرحمن إصابتو مزمنة) ؟؟
* كيف نصدق الشطب كان لاسباب أخلاقية وأنت القلت لينا: (ساماتا والأخطر من ساماتا) ؟؟
* رئيس الهلال ما كان محتاج لـ(مبرر) للشطب فهو معروف لا يفهم في كرة القدم ولا يعرف كيف يسجل وكيف يشطب ..
* ما محتاج تبرر والله العظيم ..
* الزول البيبرر ده بيكون ما عندو سوابق مع المحترفين وبيكون بيعرف كورة ..
* لكن انت شطبت سبعين محترف وخمسين مدرب ، عشان كده ما كان في داعي لحكاية الفاحشة دي ..
* أما الناس البيقولوا إنو شطب المحترفين تم بناء على رغبة شداد من أجل إتاحة الفرصة للشباب لدعم المنتخبات الوطنية نقول لهم : (طيب وكت أصلاً هو إقتنع بكلام شداد ما كان يكمل جميلو ويشطب ليهو توماس وجيوفاني برضو) ؟؟
* يا جماعة كل القصة الكاردينال إكتشف إنو هو لسه ضحية لناس بغشوهو في المحترفين وبغشوهو حتى في التبريرات الوهمية ..
* دي كل القصة بجانب الدولار طبعاً ..
* أول مرة في حياتي أشوف لي محترف قبل ما يخش التشكيلة يفكر في الفاحشة ..
* داريوكان لما (غلط) وقبضوهو ناس النظام العام كان ذلك بعد سنتين من توقيعه للهلال ..
* لكن محترف لسه ما عرف درب إستاد الهلال ويمشي يأجر في المهندسين .. دي قوية دي ..
* خلاص الموضوع .. الكاردينال لسه بغشوهو في المحترفين وبيسجل (كيري) عشان كده بيشطب بعد (34) يوم من التسجيل ..
* و..و..
* والله في ..
