عندما يصبح (عدم الموضوع) اهم من (الموضوع) ذاتو
صابنها
محمد عبد الماجد
عندما يصبح (عدم الموضوع) اهم من (الموضوع) ذاتو
• مرة كنت واقف لي في صف رغيف – لابس لي (قميص احمر) وأنا لمن البس لي (قميص احمر) ، اصلو ما بتمشي معاي.
• أي حاجة بتتقفل في وشي.
• التلفون القي قاطع كهربة.
• والشاحن القي رايح.
• والكبري القي مقفول.
• لمن وقفت في (الصف) كنت بعاين للفرن هناك ، رهاب رهاب – شيء اشوف وشيء ما اشوف.
• قلت ما مشكلة.
• رحلة المليون ميل بتبدأ بي خطوة.
• تقول عاوز ادخل كلية الطب.
• العراقيل دي كلها من (القميص الاحمر) ما من (الحرية والتغيير).
• ساعة وقفت في الصف كان اي زول بيدوه (50) رغيفة.
• يشيل رغيفو ويتخارج.
• والزول وقت يشيل الرغيف من الفرن زي المهاجم وقت يسجل هدف الفوز.
• الصف اتقدم شوية – قالوا يا جماعة طلع قرار من بتاع الفرن أي زول ما يدوه رغيف اكتر من (30) رغيفة..عشان الرغيف يكفينا كلنا.
• قلت في نفسي القرار دا من بتاع الفرن ام مدني عباس مدني.
• عاينت في قميصي (الاحمر) وقلت ما في مشكلة.
• (ومشيت معاك كل الخطاوي الممكنة).
• نزحزح في الصف متل العاوزين ندفن لينا زول.
• او زي البنقب لينا عن (دهب).
• نتكلم مرات.
• ومرات نسكت.
• ومرات ما نقول شيء.
• الصف مشى شوية …باب الفرن بدأ يبين شوية.
• ظهر لي (كلب) قاعد جوار باب الفرن – في البداية كنت فاكرو (كديسة).
• قالوا بتاع الفرن طلّع قرار قالوا أي زول يدوه (20) رغيفة بس.
• قلت ما بطال.
• وقعدت اعاين لي (قميصي الاحمر) زي الشيء الكعب.
• القميص بقى (مكرفس) زي (التوقيع).
• شيء برد.
• وشيء كلاب تهوهو.
• وشيء تسمع كلام فراغ.
• الصف اتقدم ومشى.
• قالوا أي زول بيدوه (10) رغيفات بس.
• عاينت لي قميصي (الاحمر) شعرت بيه ضاق عليّ.
• قعدنا.
• وقمنا.
• ونعسنا.
• والنوم طار من عينا.
• وباب الفرن بدأ واضح بشكل كبير.
• والكلب الكان قاعد جنبو – قام مشى.
• خلاص قربنا.
• قالوا أي زول بيدوه (7) رغيفات بس.
• قلت في نفسي والله الواحد لو كان واقف في صف (الدهب) ما بحصل عليه كدا.
• 7 رغيفات كفاية ..بتعشينا.
• انشغلت شوية بالواتساب.
• قلت اكتل الوقت.
• دخلت الفيس.
• ما خليت لي صفحة.
• كسرت (الوقت).
• يا جماعة الناس ديل ما يقولوا لينا جيبوا صورة الجواز.
• جوازي منتهي وما جددته.
• رفعت رأسي لقيت باقى لي (10) اشخاص فقط واصل لشباك الفرن – اصل النهائي – الفاينل.
• البرازيل وفرنسا.
• لكن صف النسوان خارب الرصة.
• ما بتعرفن بطلعن من وين؟
• والله الليلة امشي البيت بدون رغيف ..إلّا يشيلوا (اللوحات).
• لمن باقى لي (5) اشخاص واصل شباك الفرن – بتاع الفرن قال أي زول بنديه (5) رغيفات بس ..عشان الناس كلها تشيل.
• يحيا العدل.
• كله من (القميص الاحمر).
• قلت خمسة – خمسة ..بنمشي نتم العشا (اندومي)…ومسلسل (تركي).
• وصلت الشباك.
• بتاع الفرن عاين لي قميصي الاحمر – وقال معليش (الرغيف) انتهي – لكن عندنا خبزة تانية.
• الخبزة التانية دي حقت (الحرية والتغيير) وإلّا حقت (الجبهة الثورية)؟
• قلت ليه الخبزة التانية بتطلع متين؟
• قال لي مع النباه الاول.
• قلت ليه خلاص امشي البيت اغيّر (القميص الاحمر) دا – واجيكم راجع.
• أنا من الصباح واقف هنا بقيت زي (الاستوبر) الضربو الكورة في ضهرو.
• قالوا لي لو مشيت ح تفقد حتتك.
• قلت ليهم ولو ما مشيت ح افقد شخصيتي – احسن امشي ابدل القميص دا واجيكم.
• طلعت من الصف فرحان ..تقول ادوني (رغيف).
• عاوز اتخلص من (القميص الاحمر).
• مشيت البيت – شالتني (نومة) – تاني ما جيت راجع.
• نحن (الجامعة) ما حرسناها كدا – معقولة احرس لي (فرن) الوقت دا كله.
• صف (اللوتري) ما وقفنا فيه قدر دا – نقيف في صف الرغيف.
• هسع (العصيدة) دي مالها؟
• لومها لي؟
• والله احسن حاجة.
• غايتو انا شايف الوقوف في صف الرغيف دا عدم موضوع.
• لكن عدم الموضوع دا اهم من الموضوع ذاتو.
• اوريكم عدم الموضوع الجد.
• مرة كنا في الحلة – الساعة 2 صباحا عندنا زول كبير في الحلة اتوفى.
• مشينا للمقابر دي في (برد) يقطع النخرة.
• لو ما عندك جيوب عادي ممكن تفقد (ايديك).
• وصلنا المقابر الساعة (4).
• قبل الساعة (5) دفنا وجينا راجعين.
• لكن (البرد) الدخل فينا ..(منقاش) ما يطلعو.
• طبعا في ناس ما بتعرف (المنقاش).
• ما مشكلة.
• ادخلوا (غوغل).
• اعملوا بحث.
• رجعنا الحلة أي زول بتمنى لو ما كان عندو (نخرة).
• عندما تصبح (البطانية) اغلى امنية.
• اول ما وصلنا الفراش ونزلنا – قبل ما نقعد سمح – جانا (التليب ود رحمة) ناطي.
• متل (القوس).
• قلنا ليه في شنو؟
• قال لينا عاوز لي (بوكسي) عشان يمشي (المصنع) يجيب (التلج) للفراش.
• قلنا ليه يا زول (تلج) شنو في البرد دا؟
• انت يا زول ما نصيح.
• انت يا زول عاوز تفقع مرارتنا.
• مالك انت.
• الحاصل عليك شنو.
• الفراش كله قام فيه…(التليب ود رحمة) بقى زي السمسمة.
• ما عرف يمشي وين؟
• انت يا التليب ود رحمة ما عندك رأس.
• نسيت احدثكم عن (التليب ود رحمة).
• التليب ود رحمة دا كان عندو وهم اسمه (التلج).
• عندو اعتقاد راسخ بالثلج.
• أي مناسبة تحصل بقول عاوز يمشي يجيب (التلج).
• قالوا الزول دا دخلتو (عقدة) في عرسه من (التلج).
• (التليب ود رحمة) اتزوج في سخانة تلحم …وقبل ما يعقدو ليه (التلج) قطع.
• والقعد طرشق.
• اهل العروس شافوا قطعة التلج عدم احترام ليهم.
• شافوها عدم موضوع.
• وعدم شخصية ذاتها.
• اها (التليب ود رحمة) من ديك اتوهم.
• بقى (التلج) عندو اهم حاجة في الدنيا.
• لمن تحصل شيء…اول حاجة بعملها بيجيب (التلج).
• لكن كمان (التلج) في برد زي دا – يبقى هو عدم موضوع.
• عدم موضوع عديل كدا.
• تلج شنو عليكم الله ؟ – لو انتوا ما فايقين!!
• مرة مشينا مناسبة.
• جابوا لينا (بارد) في برد عنيف.
• اتلفتنا شمال.
• اتلفتنا يمين.
• وقت ما لقينا ما في زول شايفنا …دفقنا (البارد) تحت الكرسي.
• في زول نصيح بشرب ليه (بارد) في البرد دا.
• دا ما برد نُصاح.
• ………….
متاريس
• لظروف خاصة اكتب قبل مباراة هلال الابيض مع المريخ…والتى لم اتمكن من مشاهدتها.
• شايف الفاضل ابوشنب حاكم مباراة الخرطوم الوطني والشرطة القضارف.
• وهذا يعني ان مباراة هلال الابيض والمريخ لن يحكمها الفاضل ابوشنب.
• ما عارف المريخ ح يتصرف كيف بدون الفاضل ابوشنب؟
• رأسهم بقطع.
• غايتو لو حصلت حاجة ناس بابكر مختار برجعو لي.
• ولو الموضوع عبر ما في مشكلة.
• ناس عامر عثمان ديل بكونوا جاب ليهم زول يسد مكانة الفاضل ابوشنب.
• معقولة المريخ يحرموه من ابوعشرين ورمضان عجب ومحمد الرشيد وبخيت خميس وكمان الفاضل ابوشنب.
• كتيرة عليهم.
• الشيخ في مباراة الخرطوم الوطني والشرطة القضارف جاب ليه هدف (صاروخي).
• الشيخ ابدع في تنفيذ الضربات الركنية.
• طبعا الهلال عنده مشاكل في الحتة دي.
• ما عندنا لاعب بنفذ الضربة الركنية بصورة صحيحة.
• وما عندنا قون بتسجل من ضربة ركنية.
• نفسنا في الحتة دي.
• غابت الاهداف التى تأتي من خارج منطقة الجزاء كثيرا.
• حتى اعاد لنا السمؤال تلك البصمة من خلال هدف يعتبر اجمل اهداف الدوري الممتاز حتى الآن.
• اقول ليكم من هسع.
• واسمعوا كلامي دا.
• بوجبا عندو هدف (صاروخي).
• عندو هدف (سينمائي).
• انا ما عارف متين؟
• لكن والي الدين خضر بوجبا عندو هدف (سينما).
• العالم كله سوف يتكلم عنه.
• اصبروا بس.
• وتابعوا مباريات الهلال.
• الصواريخ ماشي عليكم.
• ريان هشام اسماعيل الاولى على السودان بأعلى نسبة في تاريخ الشهادة السودانية 98.3%.
• الاولى (هلالابية).
• الازرق دائما عنوان للتميز والتصدّر.
• ……..
• ترس اخير / ما بلقى لي عندكم (رغيف)!!.