غايتو (ميسي) مسكولات ساكت ح يتعب معانا !!

بالعربي الكسيح
محمد الطيب الأمين

* معروف سلفا أن (المُقايضة) هى نوع من أنواع البيع ..
* وهي (حلال) ..
* البدل أو المُقاضية هو : (نظام صرف وبيع يتم عبره تبادل البضائع أو الخدمات مباشرة بسلع أو خدمات أخرى دون استخدام وسيلة المال) ..
* كما لا يضر إذا تم إستخدام وسيلة المال وهنا يُسمى (الفرق) ..
* تديني قطعة واطة في الدروشاب وأديك قطعة واطة في الفتيحاب وتدفع فرق ..
* أو ممكن الموضوع يكون (طقة بطقة) ..
* تديني (توسان بيضا) وأديك (توسان سيلفر) ..
* (رأس برأس) .. يعني نتقايض لا تدفع لي ولا أدفع ..
* وبما أن ذلك كذلك فنحن شعب الهلال الآن تجدنا أمام خيارات متعددة فيما يتعلق بصفقة الأخ أوتارا ..
* يمكن أن نبيع أوتارا لبرشلونة عبر (الدفع المباشر) أو عن طريق (المُقايضة) أو عن طريق (البدل) وندفع (فرق) ..
* كل هذه ستكون (خيارات) أمام مجلس الهلال ..
* وما علينا إلا أن نختار الخيار الأمثل ..
* وحقيقة قبل أن نخوض في تفاصيل (خيارنا الأفضل) لابد من ثتبيت بعض النقاط ..
* أول حاجة طبعا ناس المريخ لما الخبر إتنشر في الفيس كانوا فاكرين إنو الموضوع (كضب ساكت) ..
* وطبعا إحنا بنلقي ليهم العذر ..
* ناس المريخ حتى (الإنتخابات) في نظرهم (كضب) عشان كده من سابع المستحيلات يصدقوا حاجة زي دي ..
* الخبر لما إتنشر في الفيسبوك كان أوتارا جوة الطائرة متجه نحو تركيا ومنها إلي مقاطعة كتلونيا ..
* الخبر كان مفاجأة بالنسبة لكل أهل الوسط الرياضي ..
* غير أن الخبر فيه درجة كبيرة من المصداقية والدليل أن اللاعب سافر بالفعل وينتظر أن يبدأ اليوم أو غدا الإختبار الطبي ..
* يعني موضوع جد جد ..
* والحقيقة لابد من الإشادة بمجلس الهلال الذي تعامل مع هذا الطلب المفاجئ بشئ من الإحترافية والعقلانية والفهم الكبير ..
* مجلس الهلال فاجأ الناس ..
* المجلس لم يعلن عن رغبة برشلونة في ضم أوتارا إلا بعد ان وصلت التذاكر والفيزا ..
* بعد ما إستلموا وإتأكدوا إنو أوتارا وصل شارع المطار بعد داك أعلنوا عن الخبر ..
* وده فهم متقدم جدا ..
* طبعا ناس المريخ قالوا العربي الكويتي داير السماني الصاوي ..
* العربي الكويتي ياداب (ناوي) ..
* لسه في مرحلة (النية) ..
* يعني لا وصلت تذكرة ولا وصلت مخاطبة رسمية ..
* ومع ذلك إعلام المريخ يتحدث عن رغبة العربي الكويتي في تسجيل السماني ..
* مجرد رغبة ..
* كان على الرغبات أنا عندي رغبة أرتبط بـ(أليسا) ..
* القصة ما قصة رغبة القصة قصة تذاكر ومخاطبة رسمية ..
* الآن العربي الكويتي حتى إذا خاطب المريخ وأرسل التذاكر فأن المريخ (أجبن) من ان يفك السماني ..
* ناس المريخ ما عندهم الفهم ده ..
* اللاعب الوحيد الطلع من المريخ (إعارة) هو أحمد الباشا ، وطلع لأنو جمال الوالى (قارش ملحتو) ..
* في عشرين سنة المريخ قدم الباشا ومحمد موسى (المهندس) للإحتراف وبالمقابل قدم الهلال كل من ريتشارد وبشة والثعلب وعاكف عطا ووالى الدين وقدوين وداريوكان ..
* المريخ جبان ..
* هسه لو لا قدر الله الأهلي المصري طلب من المريخ السماني (وده طبعا من سابع المستحيلات) ، لو طلب منهم ح يقول ليك : الوقت غير مناسب وامامنا مباراة أمام الهلال ..
* حتى لو كان أوتارا لاعبا في المريخ وطلبه برشلونة فأن المريخ سيعتذر لأن امامه مباراة امام المريخ ..
* والله صحي ..
* ديل كل همهم الهلال ..
* لا عندهم طموح ولا عندهم (بعد نظر) ..
* الهلال وافق على سفر أوتارا لإجراء الإختبارات قبل (8) أيام من مواجهة المريخ وهذه شجاعة وفهم متقدم يرفع من قدر الهلال ..
* فعل الهلال ذلك رغم اننا نعاني من مشاكل في الدفاع ..
* ولكن إحنا نظرتنا أكبر من مباراة القمة وأكبر من الهزيمة والكلام الفاضي ده ..
* المهم ..
* أنا بفتكر إنو أوتارا بعد ما يجتاز الكشف الطبي إن شاء الله نقوم نعمل (مقايضة) مع برشلونة ..
* يشيلوا أوتارا ويدونا بيكيه وندفع ليهم فرق ..
* بس على شرط بيكيه يجيب معاهو (شاكيرا) زوجتو ..
* في العقد ذاتو نكتب إنو شاكيرا تجي البلد دي ونأجر ليها شقة في المهندس ..
* وكمان تمشي معاهو الإستاد ..
* وإحنا نقيف في الصف ونقطع (تذكرتين) ، تذكرة للمباراة وتذكرة عشان نشوف شاكيرا ..
* يعني يا الكاردينال إلا تعمل لينا جوهرة إحتياطي عشان الحضور بيكون خيالي ..
* اعمل لينا جوهرة في الصالحة زي ما قال (الملحن) صلاح أدريس ..
* شاكيرا تسكن أم درمان وتركب الركشة وتدخل البوتيك وتمشي شارع النيل  ..
* وبرضو شاكيرا تعمل (دويتو) مع نانسي عجاج وممكن ملاذ غازي ..
* وممكن عديل تغني مع كورال الموسيقي ..
* بالطريقة دي بنكون ضربنا كم عصفور بحجر واحد ..
* المهم عندنا إنو أوتارا يجتاز الكشف الطبي والبدني والفني ..
* لو إجتاز التلاتة حاجات دي بعد داك بنتفق ..
* وعلى فكرة أوتارا لو إجتاز الإختبارات ممكن بعد شهر يصاحب (أليسا) ..
* الموضوع عادي جدا ..
* وأنا عايز أقول إنو حتى لو أوتارا فشل برضو مكسب كبير للهلال ..
* إحنا ما خسرانين حاجة يفشل ولا ينجح في النهاية الهلال كسبان ..
* وإعتبارا من اليوم كل المواقع والمحطات العالمية ح تذكر أسم الهلال وأسم السودان وهذا شرف كبير ..
* فقط بنقول لنزار حامد (سخن) ..
* وخلي جوازك جاهز ..
* برشلونة عندو مشاكلة في الخانة البيلعب فيها نزار حامد ..
* هسه صلاح نمر ده لو ما قاعد (يتثاءب) أثناء المباريات كان ممكن يلقى ليهو فرصة في فريق الفحيحيل الكويتي ..
* لكن مشكلتو المباراة بتكون شغالة وهو (بتثاءب) ..
* وكده ما صاح طبعا ..
* غايتو بعد كده ميسي مسكولات ساكت تبع معانا ..
* والله صحي ..
* نشيل الرقم من أوتارا ونبقي لميسي في العزيزة ..
* حاجة تسعد والله ..
* ونركب صافنات ونجيبة (كتلونية) وأصلو الزول بيموت والذكرى تفضل حية ..
* و..و..
* ومنايا ليك وما وقف وإتمنيت أنا ….(الريال يفاوض جابسون) ..

حمل تطبيق كورة سودانية لتصفح أسرع وأسهل

 لزوارنا من السودان متجر موبايل1

http://www.1mobile.com/net.koorasudan.app-2451076.html

3,699 حملو التطبيق

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app

13230 حملو التطبيق

على متجر   mobogenie

 http://www.mobogenie.com/download-net.koorasudan.app-3573651.html

5000+ حملوا التطبيق