فرحانين كدا .. يعني صفوف الرغيف ح تختفي خلاص ..!!

في الصمت كلام
محمد عثمان بلل
فرحانين كدا .. يعني صفوف الرغيف ح تختفي خلاص ..!!

• الناس في شنو .. والوصيف في شنو.
• معقولة دا كله عشان شنو.
• قرار محكمة (كاس).
• (كاس) يا حساس.
• افتكرت السعادة دي عشان الاعلان عن نهاية ازمة البلد دي.
• تقابل اي وصيفابي تشعر انه البلد دي ما فيها اي ازمة.
• السودان خلاص ودع (الصفوف والطوابير والزحمة ووووووووووووووو ).
• وتشتري الرغيف وانت قاعد في بيتكم.
• وتدخل (الطرمبة) وانت (بتقدل).
• وترجع الاسعار تاني قبل انقلاب (1989م) المشؤوم.
• وترجع ايام هوانا وصفانا.
• يا عالم اختشوا شوية.
• انتو ما عندكم دم.
• يجب مراعاة ظروف البلد دي.
• اي عايزين نفرح والله.
• لكن ما بالطريقة دي.
• بطريقتكم دي نهائي ما عايزين نفرح.
• قرار محكمة.
• (تقلعوا) الكأس بقرار محكمة.
• يعني تاني نقفل الاستادات ونقبل على المحاكم.
• طيب يا المحاكم جاااااك زول.
• حكمت المحكمة حضوريا وغيابياً بفوز الوصيف بالممتاز.
• محححححكمة .. ورفعت الجلسة.
• كدا كويس معاكم.
• يلا أفرحوا كلكم.
• استادتكم دا حولوه الي صالة افراح.
• وخليكم مع المحاكم.
• مافي داعي زاتو تاني تسجلوا لاعب.
• محاميين بس.
• شوفوا ليكم محامي مهاجم خطير .. أقصد (حنكو) سنيين.
• طيب أسألكم سؤال.
• بعد التعب دا كله .. وكمان بعد كم سنة.
• سيدالبلد احرز اللقب كم مرة .. والوصيف شالو كم مرة.
• يا جماعة دا سؤال عادي والله.
• ما تضايقوا.
• طيب مافي داعي للشتائم دي.
• وكمان جابت ليها حُجار.

• اها شفتو الكهرباء قطعت.

• وحتي الكهرباء معاكم برضو.

((صمت اخير))
• احرزتو الكأس كم مرة .. ولا السؤال ممنوع.