قاعد ومركب السماعات وما عندو رغيف !!
بالعربي الكسيح
محمد الطيب الأمين
قاعد ومركب السماعات وما عندو رغيف !!
* من الأمثال الذكية جداً: (إن جادت بخيط العنكبوت تنقاد ولو عاكست تقطع سلسل الحداد) ..
* المثل ذكي وينطبق علينا في كثير من تفاصيل حياتنا ..
* مرات بتقوم من الصباح واليوم بكون ماشي معاك (مية مية) ..
* بكون ماشي معاك (عسل على رأي المثل) ..
* ومرات من تصبح بتحس بيها معاكسة ومعكسة ..
* تشرب الشاي تجي تلقى (القميص) شالتو المكوة ، تطلع تقيف للمواصلات ساعة ، تركب المواصلات بعد ساعة يقوم (اللستك) يبنشر، تصل وتلفونك فيهو (5%) وما معاك شاحن ، تلقى الشاحن تخت التلفون تقوم الكهرباء تقطع، ترجع الشاحن لسيدو تقوم الكهرباء تجي، تطلع راجع البيت تفقد (جزلانك) في المواصلات، تصل البيت تلقي في (ملاح) وما في رغيف، تمشي الفرن تلقى (الفران مركب السماعات وقاعد يسمع وما في رغيف) ..
* نفسيات عديل ..
* ترقد في السرير تقول تنوم يجيك الباعوض (الذكر منه والأنثى) ويتم ليك الناقصة ..
* هذه المعاكسات بـ(الكربون) يعيشها حالياً المريخ الشهير بـ(المدفور) ..
* والله صحي ..
* المريخ أصبح الصباح لقى جمال الوالى ما في ، طلعوا من البيت لقوا سوداكال رئيس لكن في نفس الوقت (ما رئيس) ..
* رئيس لكن في نفس الوقت ما رئيس ..
* قعدوا شوية كده محمد جعفر قريش (نائب الرئيس الما فيش) طلع ليهم معلومة (بيع الكأس) ..
* قعدوا ينفوا ويندهشوا في موضوع (الكأس) قام السماني الصاوي مشى ليبيا ..
* قبل ما يوزعوا دولارات السماني قاموا أخدوا (تلاتة) في بتسوانا ..
* هو عليك الله لو ما ساي إرادة في فريق بتغلب من فريق بتسواني ؟؟
* الأردن وبتسوانا ما فيها كورة ومع ذلك المريخ خسر في الأردن بالسبعة وفي بتسوانا بالتلاتة ..
* وصلوا السودان قالوا زي ما غلبونا تلاتة بنغلبو تلاتة ونحتكم لركلات الترجيح ..
* ترجيح بـ(الصاء) ؟؟
* قال ترجيح قال ..
* قبل ما مباراة الاياب تبدأ قام الإتحاد وقف (بكوري) الهارب من المنتخب ..
* وقعدوا يكوركوا بكري وما بكري فجأة البتسواني جاب هدف التقدم جوة الرد كاسل الشهير بـ(إستاد الحكومة) ..
* قبل ما يعادلوا هدف البتسواني قام الوزير (عين) ليهم مجلس جديد بفوق للمجلس القديم المنتخب ..
* زي الزول البتجرح بفوق لجرحو القديم ..
* مرات كده ممكن تتجرح في نفس محل الجرح القديم ..
* يكون عندك جرح في كتفك وتجي داخل (الغرفة) يضربك باب الغرفة في الحتة الفيها جرح ذاتا ..
* المهم ..
* قعدوا يهللوا للوزير ولمحمد الشيخ مدني قام المريخ طار من التمهيدي ..
* وأنا أذكر جيدا أن المريخ طار من التمهيدي قبل يومين من إجازة (رياض الأطفال) ..
* والله صحي ..
* رياض الأطفال الفي حلتنا شغالين يوم دراسي عادي والمريخ طار ..
* وده أظن أول فريق في العالم يطير قبل (إجازة الروضة) ..
* بعد طاروا من التمهيدي وبقى عندهم (مجلسين) قام المجلس (الحكومي) جاب مدرب بفوق للمدرب القاعد أصلاً..
* بقي عندهم مجلسين وكل مجلس بمدربو ..
* وطبعاً الفريق واحد ..
* ما قدروا يعملوا فريقين ..
* عندهم فريق واحد وطار من (أول لقمة) ..
* من (أول لقمة) رشقتني عيونو وجذبتني فنونو وبقيت مجنونو ..
* وإحنا بنغني: (من أول لقمة ورشقتني عيونو) قامت المحكمة رجعت سوداكال للرئاسة..
* المهم ..
* قبل ما مدرب (الحكومة) يجي يحل محل مدرب (التلاتات) المعروف بمازدا قام الإتحاد العام برمج مباراة الهلال والخرطوم الوطني بإستاد الخرطوم ..
* والمباراة عصر ..
* وقبل ساعات من مباراتهم مع الأهلي الخرطومي ..
* الجماعة إتحركوا من الفندق ومباراة الهلال والخرطوم الوطني في الدقيقة (89) ..
* إتحركوا جايين على إستاد الخرطوم عشان يواجهوا الأهلي بعد مباراة الهلال ..
* في الفندق وهم طالعين كانت النتيجة تعادل سلبي بين الهلال والخرطوم ..
* وأول ما وصلوا الإستاد قام شيبوب الثقيل جاب قون ..
* شيبوب الذي (عبر) ستة مطارات ونط من الطابق العاشر ..
* شيبوب القالوا ح يوصلوا قضيتو لحدي الفيفا ..
* المهم.. قبل ما يرتاحوا من شيبوب قام الاهلي جاب فيهم قون ..
* والقصة بقت جايطة ..
* ومشاعرهم إتلخبطت ..
* بقوا يهتفوا ضد شداد شوية ويهتف ضد مازدا شوية ..
* أنا العاجبني في جمهور المريخ إنو بيهتف بالتساوي ..
* بيوزعوا فرصة (الهتافات) ..
* مرة شداد ..
* ومرة مازدا ..
* ومرة محمد جعفر قريش ..
* يعني عندهم عدل في الحتة دي ..
* وأنا أفتكر إنو دي حاجة ممتازة ..
* كونو يكون في عدل في الهتافات دي حاجة ممتازة ..
* أفتكر كده ..
* وأي زول طبعاً حر في (إفتكاراتو) ..
* وتاني عندي إفتكار..
* بفتكر إنو جماهير المريخ المفروض تاني تعمل تكريم لبكري المدينة ..
* أعملوا ليهو تكريم تاني عشان الناس تشاركم فرحتكم بهذا اللاعب الذي أصبح (عاطلا) ..
* وغايتو السنة دي بالذات يا متنا من الضحك ويا كمان الضحك كتلنا ..
* ونركب صافنات ونجيبة (أهلاوية) وأصلو الزول بيموت والذكرى تفضل حية ..
* و..و..
* ولو سألت علينا كنت عرفت إحنا الليلة….(من صيدلية لصيدلية وما لاقين حبوب إيرقان).
حمل تطبيق كورة سودانية لتصفح أسرع وأسهل
لزوارنا من السودان متجر موبايل1
http://www.1mobile.com/net.koorasudan.app-2451076.html
2,456حملو التطبيق
لزوارنا من جميع انحاء العالم من متجر قوقل
https://play.google.com/store/apps/details?id=net.koorasudan.app
17756 حملو التطبيق
على متجر apkpure
https://apkpure.com/ar/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9/net.koorasudan.app
على متجر facequizz
http://www.facequizz.com/android/apk/1995361/
على متجر mobogenie
https://www.mobogenie.com/download-net.koorasudan.app-3573651.html
على متجر apk-dl
http://apk-dl.com/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9
على متجر apkname
https://apkname.com/ar/net.koorasudan.app