*قرعة افريقيا رمتنا مع الجزائر
*سكتنا
*ماقلنا شئ
*قامت قرعة بطولة العرب شافت سكاتنا ده ورمتنا ليك في المغرب
*وموش المغرب ساي
*الوداد
*آخر بطل لافريقيا قبل الكورة المعادة
*الله يسألكم دي قرعة دي؟؟
*دي قرعة ولاعقوبة؟؟؟؟
*يمكن يا اسد الفيفا جاب جواب قمتوا اهملتوهوا كالعادة
*قامت الفيفا عاقبتنا بالقرعة الافريقية
*وقامت قرعة العرب كسرت تلج للفيفا وعاقبتنا عربيا
*معقولة!!!
*الجزائر بي جهة والمغرب بجهة؟؟؟
*والمحزن ان الجزائر خايفة مننا موت
*والمغرب فتحت بوستات من اسي تواسي الوداد في حظو العاثر الرماهو في طريق المريخ
*قلت المحزن
*لان الجزائر والمغرب حكمهن كان بناء علي سمعة المريخ القديمة
*بالذات مريخ ٢٠١٥ و٢٠١٧ ومريخ عرب ٢٠١٨
*ومادروا ان مريخ معسكر الدمازين راس حربة صريح مافيهو
*اعداد يساوي واحد بالمائة من اعداد ٢٠١٥ مافيهو
*جاهزية مالية فورية تعينه علي تدارك المشكلات التي تقابله بسرعة مافيهو
*ولا مليم
*وضع بالجد اليم
*لذا نزلت القرعة علينا كالعقوبة
*وعقوبة لا تخضع لاستئناف
*عاد القرعة بستأنفوها كيفن؟؟؟
*ايها الناس
*تتذكروا لما غلبنا الترجي واحد بس بامدرمان!
*وقتها كتبت وكلي ثقة
*الترجي يشوف كونفدرالتو وين
*وقد كان
*ولج هدف ضفر شباك الترجي بتونس
*فولجنا لمجموعات افريقيا
*والترجي شاف كونفدرالتو وين
*ماكنت حاوي
*ولكن اعداد المريخ واستعداده وثقة الجمهور ونجاعة غرزه ونوعية اللاعبين وجاهزية المجلس المادية
*كلها كانت معطيات افادتني حينما كتبت الترجي يشوف كونفدرالتو وين
*الآن ماهو المتوفر من تلك المعطيات؟؟؟
*الاجابة عليك ياصديقي اسد
*والرأي عندي
*ان معطيات اليوم هي التي اججت خوفنا من القرعة
*سودانير المابتطير دي
*ترميها القرعة مع الجزائر والمغرب
*والله تبقي ملك الجو بدون منازع
*طالما معطيات تشغيلها هي نفسها معطيات تأهيل واعداد المريخ لهذا الموسم
*السنة الفاتت نقاطة البطولة العربية مشت الحال
*السنة دي خريف نقاطة العرب غائب
*بيعوا خط هثرونا لحقونا سودانير عشان تسيرونا
*حيرتونا
*المهم
*والناس جايطة تناقش في الكلام بتاع فض الالتزام
*اتذكرت فيلم هندي قدييييييم
*زمن السينما بتعمل دورين
*فيلم فيهو اقطاعي مستأجر ليهو بلطجية وكتائب ظل وهنود ملثمين
*وطايح ليك في الهنود المساكين
*حقارة زي الحقارة وكضب زي الكضب
*المهم
*الهنود المساكين فاض بيهم
*وقالوا بهارتي برهان بالكل
*بالعربي يعني قرفنا وبالبرهان والدليل
*الاقطاعي لملم عصاباتو وركبوا ليك سطوح قطر كلكتا
*من كلكتا لي بومباي هرسوا ليك الهنود هرس
*قرضوا نص الهند
*لاخلو كبير ولا هندي صغير
*لاخلو راجل ولا مرة
*ياخ الهنديات ديل تلقاهم ميتات واقعات في الشوارع وعلي الحقول
*والشعور دي مكشحة من بعيد تقول شوارع زلط
*هندستان كاليووو
*يعني مافضلت في الهند كبد رطبة
*الجريمة هزت الهند وباكستان وافغانستان
*الوكت داك افغانستان مافيها طالبان
*طالب واحد وكان بقرا بالمساء
*المهم
*الشرطة زعلت وقررت القبض علي القتلة ارضاء لارواح الشهداء ودموع الاحياء
*تحرك تيم ضخم من الشرطة بقيادة اللواء راميش بالكل مهراجا
*وبعد معارك ضارية مع القتلة
*تم القبض عليهم وترحيلهم لمكتب اللواء راميش
*وراميش كان راجيهم بفارغ الصبر
*قال ليهم دخلوهم
*كان المشهد مهيبا
*وفلاش باك لفديوهات الشهداء وجثثهم المتناثرة
*وصور كنداكات الريف الهندي ملقاة علي قارعة الطريق
*طريق كلكتا بومباي
*ثم لقطة للباب يفتح ويدخل عبره القتلة الاربعة
*راميش قال للضابط المرافق للقتلة
*بجا
*تم كهيه بازداش تركومي بهادر بونا بومبي تم كلكتا تم اقناع ساسي شابور فور؟؟؟
*بالكل نهيييييييي
*وانتهي الفيلم
*ومعني كلامو يا اخي الكريم
*الناس مجدعة جثث من بونا لي بومباي لي كلكتا داير تقنعني كتلوهم الاربعة ديل بس؟؟؟ بالطبع لن تستطيع اقناعي لن تستطيع
*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا
*انت متأكد ولايتك دي مدينة؟؟؟
*امال القرية ضلمتها كيف ياوالينا؟؟؟
سلك كهربا
ننساك كيف والكلب قال قايلننا هنود
والي لقاء
سلك
