قلق لوزان

نبض الصفوة

امير عوض

قلق لوزان

الصين انتشر فيها فايروس كورونا..

العالم كله يرجف..

أي بلد خايفه من الفايروس..

منظمة الصحة العالمية مهتمه جداً بالموضوع ده..

المنظمة دي جنها و جنّ الفايروسات الجديدة..

المشكلة العلماء المريخاب اكتشفوا فايروس جديد في العرضة شمال..

يادوب ليهو يومين..

منظمة الصحة خلت الكورونا و بقت معانا في المصيبة دي..

الفايروس الجديد..

فايروس انشطاري..

يعني من نفر بصيب نفرين..

و النفرين بعادوا ليهم أربعة..

أي واحد يكلم التاني بنقل ليهو المرض..

المهم.. العلماء العندنا قبضوا ليهم زنطور..

شالوا منه نقطة دم..

فحصوها و لقوا حاجة غريبة!!

كريات الدم البيضاء عندها لوز..

ده كلام شنو ده اللهم أحفظنا..

الكريات كمان بقت تعرف اللوز..

ما علينا..

الدكاترة طلعوا ليهم (كرية دم بيضاء واحدة) علشان يستجوبوها..

أفتحي خشمك يا شاطرة..

طلعي لسانك بره..

أها.. قولي لوزان..

قصدي قولي عااااااع..

لا حول و لا قوة الا بالله..

Hope less case

حالة ميؤس منها..

حلق مقفول بلوزانه كبيرة خلاص..

لازم نكلم (البوس) يطلع بيان..

اتصلوا بالبوس.. قاليهم أعملوا صورة مقطعية لنقطة الدم..

الدكاترة شالوا (النقطة) و صوروها..

أريتهم ما صوروها..

قال ليك لقوا كريات الدم الحمراء كلها مبتسمة و رافعة أصابعها بشعار النصر..

ده كلو في نقطة دم..

لوز.. و ابتسامات..

فايروس عجيب..

الدكاترة أطلقوا عليه اسم الفايروس (اللوزاني)..

الزناطير ما يتضايقوا..

ده اسم علمي..

و لا حياء في العلم..

المهم ناس علم الأمراض السريرية قالوا إلا نعرف الاعراض المصاحبة للفايروس..

عملوا رحلة علمية للمنطقة الموبوءة في العرضة شمال..

لقوا الزناطير عندهم مباراة..

الدكاترة حمدوا الله انو لقوهم كلهم في مكان واحد..

طلعوا الدفاتر و بدوا يسجلوا في الملاحظات..

الفايروس ما بتحمل القلق..

الفايروس بعمل زغللة في العيون..

الفايروس بخلي اليدين ميتات و بعد 48 ساعة بتتحول لملوص..

الفايروس بقتل حيلك و ممكن واحد يلطشك بونية و انت في بحري و هو في موقف شروني..

زي القون الدخل في ملوص بالضبط..

القون ده نحن من زمن كابتن ماجد تاني ما شوفناهو..

كابتن ماجد بشوت الكورة و بعدها بتونس..

يتناقر مع بسام و الكورة لسه ماشه..

يظهر ليهو مدربو في المدرجات..

و يتونسوا عن كاس العالم 2022 و الكورة لسه طايرة..

تظهر واحدة من المشجعات و تتونس مع صحباتها و الكورة لسه معلقة..

الحلقة تنتهي و التسديدة لسه في الجو..

ناخد يوم كامل و نجي تاني يوم و كورة الجن دي لسه ماشه..

بعد تسل روحنا حتي تدخل القون..

اها كورة قلق الامس دي نسخة كربونية من مسلسل كابتن ماجد..

قلق نشن علي مرمي ملوص في حوالي الساعة 7 مساء..

شات الكورة و بقي مارق..

مشي السوق العربي اتعشي و حلق شعرو..

من هناك ركب حافلات السامراب مشي لواحد كان دفعته هناك..

قعد معاهو و حق الله بق الله..

صاحبوا حلف عليهو يتعشي تاني..

ياخ انا شوت الكورة و اتعشيت..

لا لا حرّم إلا كان تتعشي..

صاحبو جاب العشاء و فتح التلفزيون..

عايزين يجيبوا قناة الملاعب لقوا حجار الريموت منتهية..

قلق عفص الحجار و عضعضها..

الريموت اشتغل الحمدلله..

جابو قناة الملاعب لقوا الكورة في راس الــ18..

المخرج عمل لقطة (كلوز) في حارس الهلال..

لقوهو بتكلم بصوت عالي.. (لن تدخل هذه التسديدة في مرماي ما دمت حياً)!

(سأقفز عليها بالضربة الساحقة و الماحقة و أخرجها عن مرماي)!!

صاحب قلق قال ليهو سيب التلفزيون ده و شيل من الشية دي ما تبرد..

الزول ده حيكون معلق كده امكن لي بكرة..

قلق قال لصاحبو الكلام ده ما بنفع..

انا لازم ارجع الاستاد هسع..

صاحبو قال ليهو كدي قول بسم الله و بيت معانا.. بعد ده ما اظن تلقي مواصلات.. بعدين التسديدة الانت سددتها دي ما بتصل القون الا بكرة الساعة 4:30 العصر..

الصباح رباح ياخ..

قلق أصرّ يرجع..

لقي ليهو لوري بصل جاي زريبة العيش نطّ معاهم..

وصل الاستاد لقي كفاح نايم..

لعيبة الامل كلهم طلعوا السراير و ناموا..

ماف زول صاحي الا ملوص..

لسه بتكلم..

و ناطي علي الكورة..

المهم زي تاني يوم العصر الكورة وصلت المرمي..

و كف..

الحارس قبضها..

و الجمهور هتف..

و نزل المطر..

و برد الجو..

و تييييت الحكم صفر..

الحارس ملص الكورة..

الضربة الساحقة الماحقة لحقت الجماعة..

اللوزنة اشتغلت..

كردنة قال عايز تقرير عن الاضرار..

ملوص كتب في تقريرو انا بعد قبضت الكورة اتملصت مني زي ما اتملصت منكم بطولة 2018..

كردنة قال ليهم خلاص.. قيدوها ضد مجهول ما تشيلو حالنا..

أي زول أنا اتكلم معاهو يجيب لي سيرة لوزان..

كرهتونا البلي..

تعالوا ننسي الحصل..

أرح اعزمكم باسطة..

كردنة ساق التيم محل باسطة و قال ليهو ادينا تلاتة كيلو..

بتاع المحل جاب ليهم قطعتين..

كردنة قال ليهو يا ابن العم انا قلت ليك عايزين تلاتة كيلو..

بتاع المحل قال ليهم دي تلاتة كيلو..

في المحل كان قاعد عمك كبير و وقور.. متابع الفيلم..

كردنة قال لسيد المحل طيب جيب الميزان..

عمك الوقور قال ليهو (يا ولدي.. قصدك الميزان واللا لوزان)..

فوقع لعيبة الزنطور في بلاط المحل.. و عمت أصوات النواح ضواحي العرضة شمال..

النواح و الثكليب مدورات.. و الكتمات و الحفلات في العرضة جنوب..

كل ما نقول نوقف الأفراح..

اللوزانيين يزيدونا فرحة..

يا جماعة قلبنا الصغير لا يحتمل كل هذا الفرح..

أدوا السلام فرصة..

ما ممكن ياخ.. انتو اللوزنة دي انتهت منكم عديل..

بقينا لما نجي في أي شارع الهلالابي بزح من الطريق..

ملاوزين منهم ليهم..

قولوا بسم الله..

نحن تاني لوزان دي ما بنمشيها لو بتعمل ليكم كده..

حنكتفي بلجنة تعاونية لو دي طريقتكم..

كل حاجة و لا تتلوزنو في يدنا..

مشكلتكم ما اخدتو الجرعة كاملة..

آخر مرة صرفنا ليكم مضاد حيوي تلاتة حقن (عجبانول)..

انتو ضربتو اتنين و اتخارجتو..

الجرعة الطبية كانت تلاتة للأسف..

العجبانول ده الا يتضرب مع بعض..

أي لخبطة بتأدي للوزنة الانتو فيها دي..

ماف طريقة الا تصبروا لمباراة القمة نكون جهزنا المضاد..

انتو عارفين مصنع الشفاء اتكسر و نحن شغالين في حلل المطبخ..

بنحاول نتم جرعات علي قدركم لكن الظروف ما مساعدانا..

المهم انتو اتبعوا طرق السلامة الأولية..

غسوا يدينكم قبل تدخلوا الاستاد..

ألبسوا تقيل..

حاولوا تمسحوا سنة 2018 دي من ذاكرتكم..

خلوا تفكيركم ايجابي..

انسوا موضوع انو المريخاب عبدوا طريق لوزان..

ما تشيلوا هم بطولات الدعم الفاتت..

ديك خليناها ليكم ذكاة..

فكروا في المستقبل..

و انو مزمل قاعد..

و قروب الكرامة موجود..

مالكم انتكستوا مع السيرة دي..

خلاص.. نحن بنهزر معاكم..

الايام دي لو جاك حرامي في البيت ما تسكو..

قول ليهو (لوزان)..

لو ضحك.. معناها صفوة و ما حيسرق الحلة..

لو غمر منك اعرف انو مفيرس..

طوالي اتصل علي رقم الطوارئ (٢٠١٨) و هم حيجوا يساعدوك..

ما تنسوا الرقم..

2018

و ما تقلقوا..

القلق برميكم في الطين..

و بفقدكم الأمل..

و أمل أخت بدر..

و بدر اغترب في لوزان.

*نبضة أخيرة*

حالة صعبة.