*قالوا في (3) ما بتقدر تنساهم في حياتك ..
1- زول نساك وإنت في زنقة
2- زول ما نساك وإنت في زنقة ..
3- والزول الزنقك ذاتو ..
* ديل ما بتنسوا نهائي ..
* طال الزمن وألا قصر إنت بتكون متذكرهم ..
* وأعتقد أن أهل المريخ المشهور بـ(المدفور) في (6) ما بقدروا ينسوهم :
1- سوداكال
2- شيبولا
3- شلباية
4- سموأل
5- وشلباية تاني
* وغايتو جنس غايتو ..
* تاريخياً.. قوة الهلال في (وسطه)، وأناقة الهلال في (صناعة لعبه)..
* وبما أن ذلك كذلك يجب أن لا ينسى مجلس الهلال (صانع الألعاب) لأن قوة الهلال لن تكتمل إلا بـ(بقدم من حرير تحرر الباصات الفاخرة) ..
* شخصياً أرى أن الإستعانة بمؤيد الصيني مع وجود الثعلب ونزار حامد سيكون هجوم الهلال (مُتغذي) على الآخر ..
* أخيراً جداً تم قبول الطعون وطار سوداكال من رئاسة المريخ ..
* سوداكال كان هو (الرئيس الوحيد) الذي تقدم لرئاسة المريخ ومع ذلك إترفض ..
* ودي زي حكاية الزول البيكون عندو (قميص واحد وبتشيلو المكوة) ..
* والله صحي ..
* يكون عندك (قميص واحد) ويتحرق أثناء المكوة ..
* ناس المريخ عندهم رئيس واحد وإترفض ..
* الحل الوحيد.. شوفو ليكم رئيس (مُجنس)..
* إن شاء الله صلاح ادريس .. ما كعب معاكم ..
* وبالمناسبة ..
* لا نعيب على صلاح ادريس رفضه إطلاق بوغبا ..
* كما لن نغضب من شغل (المغارز) العملو بتجديد عقد بوغبا قبل إنتهاء عقده بعامين ..
* عقدو باقي فيهو عامين ولكن من باب (المغارز) جدد ليهو العقد تاني ..
* أنا شخصياً كنت على ثقة عمياء بأن صلاح ادريس لن يفك لاعباً للهلال ولم يخالجني شك في ذلك ..
* صلاح من حقه أن يجدد لبوغبا ومن حقه أن يتعاقد مع بوغبا سيد الاسم ذاتو ..
* ومن حقنا أن ننصح الأرباب بأن لا يجتهد فوق طاقته لأنه ومهما فعل لن يستطيع أن يعمل من أهلي شندي هلال ..
* لو سجلت بوغبا سيد الاسم ومعاه دي ماريا وكرستيانو فان الهلال هلال وأهلي شندي أهلي شندي ..
* هسه يا الأرباب في زول بقدر يحول (جبال التاكا) ويعملها في عطبرة ؟؟
* في زول بقدر يشيل (نهر القاش) ويعملو في سنار ؟؟
* في زول بقدر يجيب (جبل مرة) كوستي؟؟
* ولا في زول بيستطيع يحول (سد مروي) إلي نيالا ؟؟
* لما (مقرن النيلين) يبقى محلو في (لفة الجريف) ممكن أهلي شندي يبقى هلال..
* غادر الكاردينال إلي دبي لمقابلة المحترفين وإكمال الصفقات ..
* لا نريد أن نستعجل ولكن (دبي) دي بالذات بقت بتجيب كسافتنا في كل فترة تسجيلات ..
* الكاردينال إعترف بعدم وجود لجنة فنية وأعلن تحمله بشكل شخصي الصفقات الأجنبية ..
* ما قاله الكاردينال يضعه أمام تحدي ..
* الكاردينال (جدع شماعة اللجنة الفنية) وبالتالي فشل المحترفين لا قدر الله سيتحمله هو بنفسه كما أعلن ذلك..
* نتعشم في محترف بمليون دولار وما فوق حتى يحدث الفارق وحتى نضع كل فريق في (علبو) ..
* في هذا الموسم المنتهي كثير من الأندية (تطاولت على الهلال) ونريد أن نضع كل فريق في (علبو) إعتباراً من الموسم الجديد ..
* وعشان نضعهم في (علبهم) لابد من تسجيلات (غالية وفاخرة) ..
* كل أندية الممتاز بقت تجيب محترفين زي محترفننا ..
* وعشان نحن نتميز لابد أن نجيب محترفين (سوبر إستار) ..
* هذا مع ضرورة الإصرار على تسجيل حمزة داوود ..
* والإصرار على تسجيل متوكل ..
* ممكن نقبل فكرة تأجيل التعاقد مع سيف تيري لكن حمزة داوود مهم ..
* ثم محمد عباس مهاجم أمبدة ..
* أتمنى أن لا يكون محمد عباس قد وقع لهلال الأبيض ..
* وحقيقة في لاعب في غرفة المريخ المفروض نشيلو ..
* اللاعب إسمو التاج عطبرة ..
* ممكن نخطفو ..
* حتى لو ما سجلناهو في الهلال نوديهو كوبر أو أهلي الخرطوم ..
* المريخ ما عندو قروش ..
* أو بالأصح المريخ ما عندو رئيس ..
* وحتى أكون أكثر دقة .. المريخ ما لاقي رئيس ..
* (ما لاقي رئيس) هي أكثر دقة ..
* وأي لاعب في غرفة المريخ لما نشيلو فذلك يعتبر (حسنة وأجر) بحسابات الدنيا ..
* لما تنقذ ليك لاعب من الفقر أكيد دي حاجة كويسة ..
* غايتو أنا لو في محل سوداكال أي قرش دفعتو للمريخ في الفترة الأخيرة ح أطالب بيهو ..
* ولا قرش ما بخليهو ..
* هسه سوداكال المفروض يعمل كده ..
* يدفع ساي ليه ؟؟
* شيل قروشك طوالي ..
* وأرفع يدك من ملف التسجيلات ..
* وخليهم يأكلوا نيم ..
* مش إنتو قلتوا المريخ ما محتاج تسجيلات ؟؟
* طيب خليكم كده ..
* ما تسجلوا ..
* وقابلونا الموسم الجاي ..
* مشكلة المريخ إنو ما لاقي رئيس مريخابي ..
* الرؤساء كلهم هلالاب ..
* القيادات هلالاب ..
* حواء السودانية شغالة هلالاب فقط ..
* وأصلاً هي من زمااااان شغالة هلالاب بس ..
* شوفوا ليكم موردابي زعلان يبقى ليكم رئيس ..
* ما منطقي تكونوا قاعدين تلاتة شهور بدون رئيس ..
* مسكين السماني الصاوي ..
* قلت لي يا السماني طلعت من غرفة الهلال ومشيت المريخ ؟؟
* كويس والله ..
* أها خم وصر ..
* وبعد تخم وتصر أدي معاك الغربال ..
* وغايتو الله يكفينا شر (المُصدي) اللمعتو الأيام ..
* ونركب صافنات ونجيبة (حلفاوية) وأصلو الزول بيموت والذكرى تفضل حية ..
* و..و..
* مطلوب رئيس (إعارة)
كلامك في المليان،
الكاردينال ما قصر و انجز و حاول المستحيل ان يصنع هلالا جبارا ، لكن هناك مشوشون يشوشون عليه ، الجوهرة سوف تظل جوهرة في جبينه مدى الحياة و ما انفقه سوف لن ينساه جميع اهل الهلال.
لكن الطريقة التي تم بها اهداء بكري للمريخ ما تزال غصة في حلق اي هلالي و بالذات بعد تألق بكري و هو يعتبر من احسن الهدافين الذين لعبوا للسودان و ما زال، عيبه الوحيد و انه لا يتنازل عن مستحقاته و يتدنى مستواه ، معه حق لان الاداريون دوما يتشطروا الى اللاعبين،
لم يستفيد الكاردينال من درس بكرى حتى وقع في نفس الخطأ مع محمد عبد الرحمن و اهموه بانه مصاب و تم اهدائه للمريخ بنفس تفاصيل بكري، بكري و محمد عبد الرحمن اظهرا حبهم للهلال و انهم يبادلون جماهير الهلال الحب بدليل عدم الاحتفال عند احرازهم لاهداف في الهلال.
و ايضا فقدنا مهند و الشغيل و مساوي و موكورو بوشايات من اداريين و صخفيين بالهلال، و لولا كتابات بعض الصحفيين لفقدنا كاريكا و بوي و بشة بنفس الفهم.
اتمنى ان يأتي الكاردينال بمهاجم واحد و لكنه مميز جدا و مدافع مميز و لاعب وسط مميز،
كلامك في المليان،
الكاردينال ما قصر و انجز و حاول المستحيل ان يصنع هلالا جبارا ، لكن هناك مشوشون يشوشون عليه ، الجوهرة سوف تظل جوهرة في جبينه مدى الحياة و ما انفقه سوف لن ينساه جميع اهل الهلال.
لكن الطريقة التي تم بها اهداء بكري للمريخ ما تزال غصة في حلق اي هلالي و بالذات بعد تألق بكري و هو يعتبر من احسن الهدافين الذين لعبوا للسودان و ما زال، عيبه الوحيد و انه لا يتنازل عن مستحقاته و يتدنى مستواه ، معه حق لان الاداريون دوما يتشطروا الى اللاعبين،
لم يستفيد الكاردينال من درس بكرى حتى وقع في نفس الخطأ مع محمد عبد الرحمن و اهموه بانه مصاب و تم اهدائه للمريخ بنفس تفاصيل بكري، بكري و محمد عبد الرحمن اظهرا حبهم للهلال و انهم يبادلون جماهير الهلال الحب بدليل عدم الاحتفال عند احرازهم لاهداف في الهلال.
و ايضا فقدنا مهند و الشغيل و مساوي و موكورو بوشايات من اداريين و صخفيين بالهلال، و لولا كتابات بعض الصحفيين لفقدنا كاريكا و بوي و بشة بنفس الفهم.
اتمنى ان يأتي الكاردينال بمهاجم واحد و لكنه مميز جدا و مدافع مميز و لاعب وسط مميز،