قوميز قوم قد

في السلك

بابكر سلك

قوميز قوم قد

*اليومين دي الترس شغال
*شغال بمزاج وبدون مجازفات
*لأن (التراسة) ينعمون بالأمان
*لا رصاصة طاشة
*لا تاتشر يرفع أخوك لمن تسلم نفسك
*لا زول واقف بعيد لابس نضارة سوداء بالليل الناس تشك فيهو
*ترس أمان يا مان
*تقول الدايرو وتترس كيلومترات وأميال
*وتنوم مطمئن والصباح تمشي شغلك عاااادي
*زول بشيلك صالح عام مافي
*حرية تعبير كانت لا تمارس ولو تحت السرير
*وتقول لي الثورة فشلت؟؟؟
*نعم المعاناة كبيرة
*ولكن ليس بالخبز وحده يحيا الإنسان
*فالحريات ضرورية للحياة
*ممكن الحيوان تحرمو من حريتو وتطعمو
*ويقبل
*ما حيوان عاد
*تقول شنو!!!!!
*أيها الناس
*لم تأت المدنية لتملأ بطوننا في المقام الأول
*ولكنها جاءت لتملأ صدورنا هواء الحرية والانعتاق وهوى الوطن العليل
*جاءت لتملأ الأفق مساحات للحرية والآدمية والإنسانية والمساواة
*جاءت لتعيد صياغتنا لشعب منتج ما كلو سماسرة
*لتخلق منا شعب صاحب مبادئ لا يجري خلف الثراء والإثراء بلا سبب وبسبب عدم الأخلاق والمحسوبية المحسوبة علي وطن الجدود
*جاءت لتملأ عقولنا فهما وقيما وإدراكاً ومعرفة بحقوق الوطن وضرورة عدم الإضرار به والإتجار بالدولار لأنه إتجار بالبشر يا بشر
*ثم بعد كل ذلك إن كان هناك متسع لها
*تملأ بطوننا بما لا يمس نصيب الآخرين
*المهم
*قوميز مشى
*والقبل قوميز مشى
*والقبل قبل قوميز مشى
*والقبل قبل قبل قبل قوميز مشى
*والبعد قوميز شويه كده ونقول مشى
*مشوا كلهم لأنو مافي ما يربطهم ويلزمهم بنا
*عقد ماظنيتو في
*ولو في ما ظنيتو أكتر من سطرين
*وأظننا ما ناسيين المدرب الحددوا راتبو بالتلفون
*لما وصلنا قسمناهو ليهو قِبل
*لما جينا ندفع قسمنا الإتقسم وبرضك قِبل
*ومشى
*وكأن مجلسنا لما تمد ليهو إييدك يقول ليك ما بصافح
*بصاحب ساي
*والصحبة طبعا لا ترتب التزامات مهما كانت ثمارها
*فالنصاحب لمن نملأ المايقوما
*وبعد داك بنعرف اي ذنب سيء جنيناهو
*قوميز
*قوم قد
*عقد شنو وشرط جزائي شنو ونفقة على منو؟؟؟؟
*أيها الناس
*السكري بتعالج؟؟؟
*بخليك؟؟؟
*ما بفوتك موش؟؟ !
*أها زولنا ده زي السكري
*مرض صديق
*حافظوا عليهو
*كان طلع بودينا
*وكان نزل كر علينا
*سينتهي العزاء بمراسم الدفن
*المهم
*قالوا نحن جايبين محترفين
*إن شاء الله ما يطلعوا مجرد مغتربين
*وإن شاء الله مايودونا الفيفا
*ملينا حكاية كل يوم في الفيفا دي
*ندر تلقى أجنبي ما ودانا الفيفا
*ميسي لو اشتكى للفيفا مطالب بمستحقاتو
*الإعلان بطلع من الفيفا للمريخ
*الفيفا ذاتها كرهت وشنا ده
*لا عقوبات جابت حقها
*لا تحذير توبنا
*لا تدخل في نظامنا الأساسي وعانا
*في الفيفا بقينا زي الزول اليومي بجيبوهو المحكمة شارب
*ياخد جلدتو ويتخارج
*يوم القاضي قال ليهو تاني لو جابوك لي ما بريحك
*بوديك السجن
*تاني يوم جابوهو ليهو
*مولانا قال ليهو تاااااني إنت؟؟؟
*أنا ما عندي شغلة غيرك؟؟ ارتاح منك كيف؟؟؟
*أعمل شنو أنا ؟؟؟
*صاحبنا قال للقاضي اتنقل يا مولانا
*غايتو الفيفا لو دايره ترتاح من وشنا ده إلا تتنقل
*أيها الناس
*إن تنصروا الله ينصركم
*أها
*نجي لي شمارات والي الخرتوم
*كان شفت يا والينا
*قست علينا
*لكن مش حا نموت الله يخلينا

سلك كهربا

ننساك كيف والكلب قال لو مفكر ترجع راجع الدكتور
وإلى لقاء