كتابة المطارات زي (اكل المستشفيات)

اكتب بدء في مطار اديس ابابا قبل الاقلاع الى (كيب تاون) ان شاءالله – الساعة الآن السادسة والربع صباحا بتوقيت الخرطوم. السابعة والربع بتوقيت اديس ابابا ..سوف نقلع بتوقيت اثيوبيا عند الثامنة والربع.

توقيت جنوب افريقيا نفس توقيت السودان وفي فرق ساعة بين توقيت السودان وإثيوبيا.

انتوا شنو حكاية (الربع) المشت معاي دي؟

والله ما قاصدها.

جاءت كدا.

متل (الشباك) الاتخلق عشان يكون ناصية.

يا ابن المحظوظة.

المهم بعد اقل من نصف ساعة سوف نكون على متن الطائرة او فوقها ما فارقة كتير . كتابة المطارات طعمها زي (اكل المستشفيات)…ان شاءالله ما تكون ليكم (مسيخة).

ابلعوها بس.

اكتب في العمود بجواري ياسر مزمل وعثمان ميسي ..استرقت السمع لهما ..فوجدتهما يتحدثان عن مجموعة الهلال في بورتسودان وصعوبة البرمجة التى يمكن ان ترهق الهلال من خلال السفر الى بورتسوان في ظل مباريات المجموعات.

الصعوبة في السفر والارهاق ..وليس في المباريات.

علمت لاحقا ان البرمجة اتغيرت…يعني ما تقيفوا في (الونسة) دي كتير.

انا بكتب وقاعد اتلفت.. الاثيويبين بطبيعة الحال ناس هاديين ..ما زينا بتعاين كلام وونسة. وتنظير.

في الطائرة لن استطيع ان اكمل كتابة هذا العمود – عشان بطارية اللاب توب ما بتنستر ..اللاب توب ما بيشتغل إلّا عندما يكون في الشاحن.

زي مجلس السيادة.

عليك لله ما تلخبط لينا الكيمان.

خلينا في كورتنا.

اديس ابابا زي (ساخن بارد) مرات بتحس انها باردة …ومرات بتحس انها ساخنة.

ومرات لا دي ولا دي.

ممكن الشعور بالغربة.

ويمكن لا.

الزمن دا ما في حاجة مضمونة.

ما قلت ليكم قاعد اكتب ليكم على طريقة (اكل المستشفيات) – عشان كدا جبت ليكم الساخن بارد.

تبدو اديس ابابا من خلال (صالة المغادرة وان انظر اليها من قزاز الصالة …مرهقة ..الصراعات الاخيرة اثرت فيها – الحرب كعبة ..وسلبياتها بتظهر بسرعة.

عمل سنين وانجازات عمر يمكن ان يروح في لحظة بسبب الحروب.

نحن السودان انهكناه بالحكم العسكري.

البلد الآن متوقفة.

جواو موتا زول منضبط شديد.

انا قلت جوانا موتا.

مالي نطيت ليكم في المدرب طوالي.

يمكن عشان شايفو قاعد قدامي.

جواو موتا ..بتلقاه دائما اول زول بنزل..الصباح استيقظنا عند الرابعة صباحا ..لقيت جواو موتا قدامي.

الزول دا ما بنوم.

يمكن النوم صعب مع برودة (الغرف) في فندق الاقامة.

ويمكن بفكر في صن دوانز.

على العموم هو يبدو واثقا.

وأنا ثقتي اكتر منو.

السنغالي (لاعب برشلونة) السابق ..ما بفارق اوتارا …لسه بعيد عن اللاعبين ..يمكن عشان هو ايضا يبدو عليه الهدوء.

ابراهيم مصطفى مع ديفيد ريتشارد ..في أي حتة.

مالي زي العاوز اصدع.

احسن ما اكتب ليكم بي صداعي.

اخلي باقى العمود الى ان نصل الى (كيب تاون) ان شاءالله.

بالمناسبة انا لقيت لي (كوبس) بالرجالة في المطار..اي زول شايل موبايلو وبفتش ليه في شاحن.

انا طلعت بدري ..ومسكت لي (كوبس) وقعدت اكتب.

طبعا مطار الخرطوم مقارنة بمطار اديس ابابا ..زي (باقي الملاريا).

غايتو نحن عندنا مطار تقول مطار (حربي).

مطار عبارة عن (زقاق) كبير.

لكن اديس ابابا برضو فيها الحس السوداني ..بتحس انهم بيشبهونا في حاجات كتيرة.

حتى ستات الشاي على الشوارع بالطريقة السودانية نفسها ينتشرن.

ما عارف الطريقة دي حقتنا. وإلّا حقتهم؟

الصداع زاد.

احسن نخلي الباقى لي (كيب تاون).

نقوم نشوف لينا (خبر).

لكن تاني ارجع وأقول احسن اكتب ..وأنجز – الظروف ما معروفة.

اقول ليكم.

نتلاقي في (كيب تاون).

وصلنا (كيب تاون).

طبعا ما طوالي كدا.

قصدي انا بكتب ليكم الآن من (كيب تاون) وصلنا عند الساعة الواحدة و45 دقيقة يعني الرحلة استغرت بالظبط كدا 6 ساعات ونصف.

المدن الافريقية تتشابه في (الطبيعة)..كيب تاون قريبة من كمبالا واديس ابابا ولكن على احدث.

مدينة قائمة على المرتفعات والمنخفضات – هذا الامر طبعا بعطي المدينة بعد جمالي.

تنزل وتطلع بين الجبال والتلال والوديان.

اغلب الاشجار في كيب تاون اشجار عريقة وعتيقة ..وكلها اشجار (منحنية)…ما عندهم شجرة واقفة عديل ..ربما كان ذلك بسبب الاهوال التى تعرضت لها جنوب افريقيا.

كيب تاون مدينة ما في زول في العالم بحس فيها بالغربة ..وذلك لسبب واحد هو ان كل الالوان ..كل الاعراق في كيب تاون اولاد البلد.

يعني الزول الغريبة ما بتعرفو في كيب تاون.

المباني في مدينة كيب تاون مبنية على الطريقة الانجليزية القديمة ..بتشبه البيوت التى نراها مرسومة في كتب الانجليزي زمان.

الغريبة ان البيوت على طريقة الاشجار ..مبنية على (ميلان)..ما عارف عملوها كيف؟

لكن اعطت المدينة شكل جمالي اخر.

المدينة مع جمالها هذا … ما فيها زحمة ..حتى الشواطيء والمنتجعات الحركة فيها محدودة …مع ان اغلب شوارع كيب تاون شوارع ضيقة … وبتمر بمنحيات وتعرجات كثيرة.

يعني ممكن فجأة تلقى نفسك داخل ليك في بيت.

تقوم تطلع.

انا بتكلم عن الشارع.

يا ود الناس هي عرفت من متين؟

نسيت اقول ليكم رجعت اكتب في وقت متأخر ..بعد العودة من تمرين الهلال الذي انتهى بعد الثامنة.

هناك ملاحظات عن هذه المدينة التى يبدو فيها ان الصراع بين المحيط والجبال واضحة.

مدينة محاصرة بالمياه والجبال.

عندهم جبال رهيبة.

يعني الجبل تقول مرسوم في لوحة.

بعمل شكل عجيب.

وبحصل تهامس بينه وبين السحاب.

فجأة كدا تشعر انها عاوز تمطر.

والله الكلام دا نحن ما قاعدين نشوفو إلّا في الافلام الاجنبية. اتاريه الكلام دا حاصل في الواقع.

الناس بتبني.

وبتعمل.

وبتخطط.

جنوب افريقيا نهضت وقامت بعد التسعينات.

اتجاوزت اخطر انواع (العنصرية).

تعال شوفه اسي الناس ديل وين؟

والله نحن بنتكلم ساكت.

وقاعدين ننظر.

وبنتحاسب في حق هذه البلد.

الساعة الآن التاسعة والنصف ..واليوم عندي ملخبط عشان وصلنا في هذا اليوم ..ومشينا التمرين ..ورجعنا.

بكرة ان شاءالله ادخل ليكم على (المحيط الهندي).

اتخيل لي كدا ان المحيط الهندي تعب معاي.

وكان لي نيلسون مانديلا خلوه ساكت ..بمشي ليكم عليه.

اكتشفت في جنوب افريقيا انو ما في حاجة بتطلع من فراغ.

هذا الشعب وتلك البلد من الطبيعي يطلع منها نيسلون مانديلا.

شعب جنوب افريقيا شعب عظيم …وشعب عملي عشان كدا عمل ليكم دولة اوربية في قارة افريقيا.

نحن بعدين.

بالمناسبة كيب تاون في الليل ..السماء من الواطة ما بتفرزها.

عارفين ليه؟

عشان الانوار والمباني المشيدة في الجبال والمرتفعات بتخلي السماء والارض واحد.

نجوم واضاءة وانوار وشوارع.

في ظل كل هذه الجماليات …الهلال وصل الى المدينة بروح معنوية عالية وبثقة كبيرة في تحقيق نتجية ايجابية امام صن دوانز.

طبعا معروف فريق صن دوانز ما ساهل ..وهو عمل اضافات في الايام الاخيرة …وداخل لمرحلة المجموعات بقوة.

بكرة نكمل.

عشان الوقت شكلو اتأخر.

….

متاريس

مع كل هذا الارهاق امس ادي الهلال تمرين رائع.

الجميل ان التمرين كان في استاد رائع.

طبعا المقومات والبنية التحتية في كيب تاون مقارنة مع القاهرة لا تقارن.

الناس ديل تجاوزوا القاهرة.

قلنا ليكم دولة اوربية في افريقيا.

بكرة نواصل.

ما تمشوا بعيد.

وابقى (ترس) ما تبقى (حرس).

…..

ترس اخير : ارسل على كدا ..والله مراجعة ما عندي ليها حيل.