في الصمت كلام
محمد عثمان بلل
كرة القدم للـ(حريم) في السودان والله ما وقعت لي ..!!
• ما قادر اتخيل نهائي تنظيم دوري في كرة القدم للسيدات في السودان.
• يمكن الحكاية تكون مقبولة في أوروبا أو أي مكان تاني غير السودان.
• كمان ما كنت بحلم يجي يوم ونشاهد فيهو (حريمنا) يلعبوا كمان في الاستاد.
• اكيد في ناس ح يقولوا الزول دا متخلف ساي.
• قولوا زي ما عايزين تقولوا.
• شخصيا ما قادر اتقبل الفكرة دي.
• ولا يمكن في يوم من الايام اقتنع بي كدا.
• احترم النساء جدا في بلادي .. وأي مكان تاني.
• رسولنا الكريم أوصانا بالنساء خيراً.
• والرسول قدوتنا.
• أشفق على المراة العاملة وهي تسعى لتوفير اللقمة الحلال لها ولأبناءها.
• تبذل ما فوق طاقتها وهي تعاني في الوصول الي مكان عملها بسبب زحمة المواصلات.
• وأيضا تعاني في العودة الي منزلها للقيام بواجب زوجها وأولادها .. بعد معاناة كبيرة في العمل.
• تظل تبذل مجهودات كبيرة وهي صامتة دون ملل أو كلل منها
• للمراة العاملة الاحترام والتقدير.
• لكن كمان جابت ليها (كورة قدم) عديل كدا.
• دي بالغتوا فيها.
• وهناك سؤال مهم يدور في الدواخل.
• ماهو رأي نساء في وطني العزيز في هذه المستجدات؟