بابكر سلك
*بروح الثورة تأهل الخرطوم تلاتة افريقيا
*واقول الخرطوم تلاتة لان النسب الذي تم الصاقه بالخرطوم تلاتة قد انتهي
*وماباقي الا ان تعيد الخرطوم للافتتها كلمة تلاتة
*ليعود الهتاف المحبب تلاتة حلاتها
*وبالامس كانت تلاته حلاته
*جابت تلاتة وطلقت التمهيدي بالتلاتة
*الخرطوم تلاتة النادي الانموذج الذي يفرخ و يصعد ويسوق سنويا كمية من المواهب الشابة
*لذا نجده لا يعاني من اعلانات الفيفا ولا مطالبات الاجانب
*ولا يقف موقف المدين امام اي مجلس قضائي او شبه قضائي
*ودي حنكة العملية الادارية الواعية والراشدة
*والسبب يعود الي ان من يتداول القيادة بالنادي هم اهل الرياضة لا دخلاء عليها
*ولا اناس دخلوا المجالس للاعلان عن انفسهم وشهرتها
*ولكنهم اهل وجعة واصحاب دار وخبراء كار
*ايها الناس
*بعد سقطت بس
*واستقامت الامور
*وكفانا الله شر تدخلات الوزير والمفوض وامانة الشباب وافتراءات الحزب الحاكم
*لابد لاهل الرياضة من التعاضد والتماسك لاعادة اهل الكار
*واذا دايرين تتأكدوا من اهل الكار
*ارجعوا للفار
*اكيد حاتعرفوا الدخل متسلل منو ومتين
*تتذكروا مجلسنا بتاع اللوردات؟؟؟؟
*المهم
*دين غرزه وولدو امر واقع يجب التعامل معه بواقعية بعيدا عن الكيد وكشف الاوراق
*لان الحصة قبل كل شئ مريخ
*المهم
*غرزة عقدو سنة
*السنة بمبلغ محدد
*غرزة خلانا بعد الشهر التامن(لان العصمة كانت في ايدو ومافيها مؤخر صداق لصالحنا)
*الاربعة اشهر الفضلن غرزة شال فيهن مرتب من الليبيين
*حسب القوانين الفيفاوية نقوم بعملية حسابية
*نطرح ماتقاضاه غرزه من ليبيا من حق سنة غرزة عندنا
*الباقي نطرح منو ماتقاضاه غرزة مننا خلال التمنية اشهر ان كان قد قبض شئ
*النتيجة هي حقوق غرزة علينا
*يعني اربعمية الف دولار ده كلام بوبار ساي
*ولا اظن ان مكتب المريخ التنفيذي بفوت عليهو حساب زي ده
*فقط علي المكتب التنفيذي ان يجمع المستندات وان يتعامل بجدية مع الموضوع وعدم سبهللية
*لان الديون التي فرضت علينا عقوبة الحرمان من التسجيل
*هي نفسها الديون التي ستقودنا للدرجة الاولي ان اهملناها
*تيك كير
*المهم
*اليوم نحشد الشفوت لنأهل للمريخ علي حساب الجزائري
*النصر يسكن حناجرنا التي لاتعرف الهتاف الا للمريخ وبس
*والتأهل علي حساب فريق مثل الشبيبة الجزائري تأهل يستحق ان نحتفي به
*لانه لم يأت علي حساب فريق ضعيف مثل رايون الرواندي
*فرواندا التي نشهد لها بالتطور
*اي شئ فيها اتطور الا رايون اسبورت
*يبقي نجي كلنا نقود مريخنا حقنا للتأهل والهنا
*وبالامس استضفنا الخرطوم تلاتة
*ولانمانع في استضافة ابو الهل افريقيا لانو الحصة وطن
*فكما تعلمون الكاف قال استاد الهلال مدتو منتهية وكشافاتو غير مطابقة للمواصفات
*كشافاتكم كشفت حالكم ياروشا
*زي لمبة(حمامات زمان البلدية)
*قرمبعة مابتشوفها
*والذين يتخوفون من احتمال اعتداء جماهير الهلال علي استادنا
*اقول ليهم مابحصل
*ده كان زمان قبل الثورة
*الآن سلوك الثورة نشر وعيا كبيرا وسط الشعب
*تانيا الاعتداء بجيبوا الزعل
*والزعل بتجيبو الهزيمة
*ورايون الرواندي ده في التمرين مابجيب قون
*يبقي مافي خوف
*اذا في خوف يكون من حسين الجريف ده
*جنوا رقاد واطة
*ونجيلتنا جديدة مابتتحمل البشتنة ورقاد الواطة
*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا
*اخير تعالجوا الباعوض والضبان حماية للانسان
*او تجهزوا قبوركم لينا
*الكوليرا ما بتفرز يا والينا
سلك كهربا
ننساك كيف والكلب قال امس اكلنا فول بخمسين وضبان بتسعين
والي لقاء
سلك