كعب) الغربال !!

صابنها

محمد عبد الماجد

كعب) الغربال !!

• مريخابي لقيتو واقف الصباح في الدكان – ما عارف المريخاب بقيفوا في الدكاكين ليه؟
• الغريبة ولا بيشتروا.
• بقيفوا ساي.
• الواحد تلقاه اليوم كلو واقف في الدكان.
• يسأل من (الطحنية).
• و (السكر).
• و(الدقيق).
• و(البسكويت).
• ويرجع البيت من غير ما يشتري أي حاجة.
• ولو لقى ليه (رف) فاضي في الدكان ..يقول لبتاع الدكان – انت الرف الفاضي داك كان فيه شنو؟
• لو اشتريت ليك (رصيد) يقول ليك عاوز تضرب لي منو؟
• لو طلعت ليك قروش من جيبك يقول ليك عندك قروش وقعت من جيبك.
• لو قلت عاوز (اندومي)…يقول ليك اعمل حسابك من (الاندومي).
• والله الايامات دي (السرطانات) متل ارقام التلفونات.
• بدون تسجيل تشيلها!!
• المهم لقيت لي مريخابي من الصباح واقف في الدكان – قلت ارفع ليه روحو المعنوية شوية في البرد دا.
• اصلو المريخاب الايامات دي لو ما رفعتوا ليهم روحهم المعنوية ممكن يروحوا فيها.
• امانة فيكم – أي مريخابي تلقوه الايام دي – ارفعوا ليه روحو المعنوية…انتوا خسرانين حاجة.
• دي اقل حاجة تعملوها ليه.
• لأنه في ايام سودا ماشي عليهم.
• في ايام صعبة ماشي عليكم.
• راجياكم ايام زي (الفجل).
• المريخ اتأهل لمرحلة المجموعات بعد سنوات طويلة.
• والمريخ متصدر الدوري الممتاز.
• في معنويات اكتر من كدا.
• بدون التش.
• وبدون بكري المدينة.
• وبدون رمضان عجب.
• وبدون محمد الرشيد.
• وبدون ابوعشرين.
• وبدون جمال الوالي.
• الفاضل ابوشنب ما بقصر.
• الفاضل ابوشنب بقى ثابت في تشكيلة المريخ اكتر من سيف تيري.
• هداف الدوري ابوشنب.
• عليكم الله ما تسألوني.
• خلوني.
• ما تقاطعوني في الكلام.
• عاوز ارفع للمريخاب معنوياتهم.
• فريق اتأهل للمجموعات ومتصدر الدوري الممتاز ومقدمين فيه شكوى في (9) الف دولار.
• فضيحة السواد.
• (9) الف دولار في شنو؟
• طعمية.
• ولّا زلابية.
• قالوا مدرب الاحمال السابق في المريخ مشتكي المريخ في (9) الف دولار.
• دي يا ربي شالها (رغيف).
• كان تعملوا المبلغ كبير شوية – مع تأهلكم للمجموعات.
• مع صدارتكم للدوري الممتاز.
• كان تقولوا 100 الف دولار.
• 50 الف دولار.
• 9 الف دولار – ما حلوة في حقكم.
• (9) الف دولار كابتن الفريق ممكن يدفعها من جيبو.
• الناس ديل رئيسهم الفخري بعمل في شنو؟ – اذا كان المريخ مقدمين فيه شكوى في (9) الف دولار.
• المهم ما علينا.
• قلت للمريخابي الواقف في الدكان (كعب) الغربال!!
• المريخابي ما صدق.
• نطط عيونو متل (الزرازير) وقال لي نحن ما قلنا ليكم – ونحن ما اتكلمنا في الحتة دي.
• انتوا ساي ما بتسمعوا الكلام.
• انتوا ما بتصدقوا.
• رأسكم (قوي) يا ناس الهلال.
• قدر ما حاولت اقاطع المريخابي واثبتوا واتكلم ليه عن (كعب) الغربال ما اداني فرصة.
• المريخابي قال لي والله الغربال ما بعمل ليكم حاجة.
• ولا بقدم ليكم شيء.
• انتوا دفعتوا فيه قروش ما بستحقها.
• وينو الغربال؟
• قلت اقاطعو – قلت ليه يا زول اقيف.
• والمريخابي بتكلم في كلامو.
• قال لي ح يقعد ليكم كدا.
• ولا ح يلعب ليكم.
• وتشطبوه.
• وتاني يرجع للمريخ.
• عشان انتوا يا ناس الهلال ما عندكم صبر.
• وعندكم جمهور كله (مدربين).
• الزول دا في التسجيلات القادمة ح تشطبوه.
• وح يرجع المريخ.
• تعالوا شوفوه ح يعمل شنو في المريخ؟
• المريخابي وقت وصل للحتة دي قلت ليه اصبر خليني اكمل كلامي انت عارف (كعب) الغربال العاوز اتكلم ليك عنو؟
• المريخابي ما وقف قال لي عارف الغربال (كعب) وما بقدم أي شيء للهلال.
• قلت ليه يا زول قول باسم الله.
• (كعب) الغربال سجل بيه هدف – مدافع هلال الابيض لغاية الآن فاكر الهدف باليد.
• الكرة مشت الشبكة.
• والحكم جرى على النص.
• ومدافع هلال الابيض قاعد (اغالط نفسي بي اصرار واقول يمكن انا الما جيت).
• ناس قناة الملاعب قدر ما عادوا الهدف – ما فهموا شيء.
• الكورة مشت وين؟
• ما في زول عارف.
• جات كيف؟
• ما في زول عارف.
• اتلعبت ازاي؟
• ما في زول عارف.
• هدف زي (الزر).
• المريخابي قال لي انت بتتكلم عن شنو ؟ عن ان الغربال (كعب) وإلّا (كعب) الغربال.
• قلت ليه كعب الغربال.
• قال لي طيب وأنا بقول شنو من الصباح؟
• قلت ليه ابدا – انا قاصد ليك (الكعب) بتاع القدم.
• المريخابي قال لي عاوز تقول شنو عن (كعب) الغربال؟
• مالكم يا ناس الهلال عاوزين تجيبوا لي (الصدمة).
• مالكم عاوزين تجيبوا لي (نفسيات).
• قلت ليه عاوز اقول الغربال سجل في هلال الابيض هدف بكعبه.
• بالكعب عديل كدا.
• المريخابي سكت.
• وقع.
• قام تاني.
• ينطط في عيونو متل الستائر الما موزونة.
• قال لي الزول دا لو فتح – تاني ما بقيف.
• وناس مزمل تاني ما بقعدوا في البلد دي.
• وطالما بدأ بـ (الكعب) – تاني الجن الاحمر ما بثبتو.
• ما شاءالله.
• وتبارك الله.
• محمد عبدالرحمن شال الكورة بالكعب وهو جاري – وقعت طوالي في الشبكة.
• ولا اتلفت.
• مشى مباشرة يحتفل عند راية الكورنر.
• مدافع هلال الابيض لغاية الآن (مخلوع).
• ومعلق قناة الملاعب (مخنوق).
• وما عارفين الحاصل شنو؟
• لكن برضو لازم ندي (التحية) لعيد مقدم.
• لعب كرة معكوسة (مشهية).
• فلت لحظة.
• رفع الكورة.
• والغربال كورة زي دي ما بجامل فيها.
• ولا بيلعب.
• اول اهداف الغربال مع الهلال بعد العودة.
• اول هدف – اجمل هدف في الممتاز.
• بالكعب.
• والغربال ان شاءالله تاني ما بقيف.
• بيلحق نزار حامد.
• وبفوت منو.
• وببقي هداف الممتاز ان شاءالله.
• وبلحق سيف تيري في البطولة الافريقية وبفوت.
• ويبقى هداف البطولة الافريقية ان شاءالله.
• الغربال اصلو ما عندو شيء صعب .
• لاعب عندو عزيمة.
• واصرار.
• وقوة.
• وارادة.
• وسرعة.
• ومهارة.
• الغربال فتح.
• خلاص تاني ما بقيف – وبما ان الاهداف بدأت بالكعب – ح تشوفوا منها العربي والافرنجي.
• اشكال والوان.
• والليلة ان شاءالله نشوف (نوعية) جديدة من اهداف الغربال.
• انطلاقة.
• وضربة راسية.
• وضربة جزاء.
• حاجات كدا – اشكال والوان.
• خلاص الهلال بدأ.
• وح يستلم أي شيء.
• اديناكم فرصة كافية.
• ورجعنا نستلم كل الاشياء.
• برة وجوة.
• الكلام دا قبل السيستم ما يفتح.
• وقت السيستم يفتح شوفوا ليكم بلد.
• احسن تتخارجوا من الآن.
• البلد دي تاني ما بتتقعد ليكم.
• ……………
متاريس
• يا جماعة يلعب من يلعب.
• خلوا المدرب يشوف شغلوا.
• جمهور الهلال كله بقى مدربين.
• جمهور الهلال بقى (الكاردينال).
• المباراة والتانية عاوزين يجيبوا ليهم مدرب جديد.
• اتعودوا على كدا.
• الكاردينال خرب طبع الهلالاب.
• الدوري السوداني الممتاز رغم من انه بدأ متأخر – لكن شكله ح يلحق الدوري السعودي والمصري رغم بدايتهما المبكرة.
• في صالح القمة السودانية ان تلعب اكبر عدد من المباريات في الدوري الممتاز قبل بداية مرحلة المجموعات.
• الاستفادة كبيرة من الدوري الممتاز.
• اندية الممتاز تقدم خدمة كبيرة للهلال والمريخ.
• الدوري ممتع.
• وشيق.
• …………….
• ترس اخير : يا مراكبي ودينا ومن توتي عدينا.