كمان جابت ليها غيرة إستادات
في الصمت كلام
محمد عثمان بلل
كمان جابت ليها غيرة إستادات
• بإختصار كدا.
• ناس الوصيف ديل زعلانين من كردنة.
• معقولة يعمل ليهو جوهرة زي دي في الزمن دا.
• كل واحد بقول ليك نحن رئيس ما عندنا.
• وتسجيلاتنا أحسن نسكت ما نتكلم.
• والسنة دي الوصافة زاتها صعبة.
• ومازدا مدربنا.
• وجيمي مشي خلاص.
• والهلال حسم الدوري والكأس
• وإعداده بدأ مبكرا تحت قيادة برازيلية
• ومعاهم مورينهو كمان.
• معقولة بعد دا كلو نسكت كدا.
• الموضوع طلع من يدنا خلاص.
• ما قادرين نتحمل.
• كردنه بعمل فينا كدا ليه يعني.
• نحن عملنا ليهو شنو.
• عشان سجلنا بكري المدينة.
• تعالوا شيلوا بكري.
• ومعاه محمد عبدالرحمن كمان.
• بس خلاص كفاية البحصل دا.
• بنتحمل اي حاجه.
• الهزيمة في الدوري والكأس.
• انتوا كدي دقيقة.
• نهائي الكأس كان مع اهلي شندي.
• اي كلامك صااح.
• طيب واصلوا في الردحي .. أقصد في كلامكم.
• أي ممكن نتحمل الهزائم.
• عشان أيام وبتعدي.
• لكن الجوهرة ما بنقدر عليها.
• تفتح الواتساب والفيسبوك.
• تلقي الجوهرة والرئيس يشيد بكردنه.
• وجماهير الهلال مبسوطه بالجوهرة.
• زمان جيمي عمل لينا استاد عالمي.
• قلنا دا احسن واحد في افريقيا.
• (ياهو الطابق دا) ولا حاجة تانية.
• طبعا الكسرة الفوق دي مني أنا.
• يادوب عرفتو الفارق الكبير بين الناديين.
• من زمان الكلام دا كان وين.
• كردنه يا شفت.
(لحن الختام) ..
• كلو العارفو مشتاق ليك وعارفك لي مشتاقه.
• تعالي نيقن الاشواق بانو اكيد حا نتلاقى.
• بكره حا تتفتح ابواب ونفاجين وكم طاقه.
(صمت اخير) ..
• مبروك للسودان.
• أكيد أكيد بكرة أحلي وأجمل.