الحصة الصباحية
اتحاد الكورة (دولة عميقة) – رفض شكوى حي العرب في (طبنجة).
الناس ديل ما عارفين الحكومة دي حكومة (مدنية)!!.
………….
• رؤساء مجالس الهلال والمريخ عندهم جن اسمو (الصورة)…الواحد فيهم لو رفع ليه (طوبة) عاوز ينزل وينشر صورتو.
• عندهم عقدة من (الصورة).
• أي حاجة يعملوها لازم يتصوروا فيها.
• الكلام دا طبعا ما ظهر الآن مع الكاردينال وسوداكال – الكلام دا من بدري في الهلال والمريخ.
• في رؤساء جابتهم للكورة (صورة).
• المهم….(ما عاوز ادخل ليكم في التفاصيل).
• واطول ليكم في الموضوع.
• حب الشهرة والاضواء والصور هو الذي جعل الكثير من رؤساء الهلال والمريخ يتهافتوا للعمل في المجال الاداري بهذا الشكل.
• الكلام دا من بدري …وحتى عهد صلاح ادريس وجمال الوالي ، لم يكن يخلوا من الصور.
• الناس ديل كلهم رايحة ليهم (صورة).
• اعملوا شير.
• لكن الوضع مع الكاردينال زايد شوية.
• اهم حاجة في أي خطوة يقوم بها الكاردينال (الصورة).
• عاوز يسجل.
• عاوز يشطب.
• كلو بالصور.
• عاوز يهدم.
• عاوز يبني.
• بالصور.
• ما في حاجة بدون (صور).
• على كل حال ليكم ولي غيركم اعملوا فيها ما سمعتوا حاجة.
• ما تشتغلوا بي كلامي دا.
• احفروا ليه قبلو.
• وادفنوه.
• ارضية استاد الهلال عندما تم قلب الارضية وحفرها …وزراعتها من جديد – ظل الكاردينال يتصور في الملعب لمن النجيلة قامت.
• الصور التى اتصورها الكاردينال في نجيلة ملعب الهلال اكتر من النجيلة.
• اعملوا شير.
• اخر تقليعة في الموضوع دا – الكاردينال قعد مع الفاتح النقر في الواطة.
• على النجيلة جلسنا.
• وجابوا ليكم الصورة في قناة الهلال.
• في النشرة الرئيسية.
• طبعا الكاردينال الموضوع دا ولا بدسو.
• ولا بخجل منو.
• شعار قناة الهلال ..(الصورة في ملعبك).
• بالواضح كدا.
• والصورة طبعا صورة الكاردينال.
• مقصورة الهلال فيها (صورة) الكاردينال – لا صديق منزول ولا جكسا ولا كسلا ولا طارق احمد ادم ولا والي الدين.
• المقصورة فيها صورة الكاردينال.
• اعملوا شير.
• مسرح الهلال اسمو مسرح كرومة وفيه صورة الكاردينال.
• مفارقات غريبة.
• في علاقة بين كرومة والكاردينال؟.
• قناة الهلال لمن الكاردينال قالوا فاز بي اوسكار الفيفا – صورة الكاردينال اعلي الشاشة مع شعار الهلال سنة كاملة.
• كلو بالصور.
• المهم….(ما عاوز ادخل ليكم في التفاصيل).
• واطول ليكم في الموضوع.
• موضوع (الصور) دا لو ما شفتوا ليه حل …القمة السودانية ما بتتقدم.
• ولا بنمشي لي قدام.
• عملوها لينا كلها (صور) – ونسوا (الكورة).
• الكاردينال يزور المعسكر بالصورة.
• الكاردينال يتناول وجبة الغداء مع اللاعبين بالصورة.
• الكاردينال يضع يده في كتف ابوعاقلة في سفرة الغداء – بالصورة.
• الكاردينال يجتمع بحمادة صدقي بالصورة.
• بي الفاتح النقر بي الصورة.
• اصلو ما في حاجة ساكت.
• على كل حال ليكم ولي غيركم اعملوا فيها ما سمعتوا حاجة.
• ما تشتغلوا بي كلامي دا.
• احفروا ليه قبلو.
• وادفنوه.
• قالوا ليك زمان الجرايد لو عاوزة صورة للزعيم الطيب عبدالله إلّا تشيل صورة الجواز.
• الطيب عبدالله ما عندو صورة.
• ولا بتصور.
• زعيم امة الهلال.
• البابا.
• ما عندو صورة.
• ولا في زول بشوفو.
• لكن الكاردينال شغال في الهلال بالصور.
• الكاردينال يغادر البلاد بالصورة.
• الكاردينال يصل لندن بالصورة.
• الكاردينال في جوبا بالصورة.
• الكاردينال يعود الى البلاد بالصورة.
• حاجة لله – اصلو ما في.
• شغالين (صور).
• والله الكاردينال دا لو ترجم (صورو) دي الى شغل الهلال كان شال كاس افريقيا.
• المهم….(ما عاوز ادخل ليكم في التفاصيل).
• واطول ليكم في الموضوع.
• بعد الكاردينال – ظهر ادم سوداكال – لسه ما كمل ليه 21 يوم في المريخ ..سوداكال عاوز يعلق صورتو في استاد المريخ.
• يا زول ما تستعجل.
• يا زول اصبر.
• يا ريس الكلام دا بدري عليه.
• لسه انت ما وصلت مرحلة (الصورة).
• يعني بالواضح كدا – استاد المريخ يبنيه شاخور..وناس خالد حسن عباس ومهدي الفكي وود الياس يساهموا ويعملوا فيه وجمال الوالي يجدد في الاستاد ويجي ادم سوداكال يعلق صورتو في الاستاد.
• لا سكسك.
• ولا العجب.
• زول ليه 21 يوم في المريخ عاوز يعلق صورتو في استاد المريخ.
• انت يا ادم سوداكال يعني عاجبك البعمل فيه الكاردينال دا.
• بتعلقوا صورتكم في الاستاد على شنو؟.
• عملتوا للهلال والمريخ شنو عشان تعلقوا صوركم في الاستاد؟.
• صورتكم علقوها في صوالينكم.
• في بيوتكم الخاصة.
• في مكاتبكم.
• الاستاد ما دايم ليكم.
• ما تبقوا زي صدام حسين …وحسني مبارك – صورهم كانت في أي محكمة ..في أي مكتب حكومي.
• صدام ومبارك صورهما وين الليلة.
• شالوها بالجرارات.
• ما تبقوا زي صدام ومبارك.
• ألحقوا رقبتكم.
• ما معقول تعلقوا لينا صوركم في استادات (قومية).
• نحن ناقصين صور.
• والي الدين مات بسبب اصابة تعرض لها في استاد الهلال.
• يوهانس.
• وما في زول علق ليه صورة ليهم في غرفة في استاد الهلال.
• ايداهور مات في ملعب المريخ.
• وانتوا عاوزين تعلقوا (صوركم) في الاستاد.
• كفاية علينا (الجرايد).
• بالله صور الكاردينال في الجرايد التابعة ليه اكتر من صور لاعبي الهلال من 1930 لغاية 2020م.
• الناس ديل عندهم مشكلة في (الصور).
• عاوزين يعملوها لينا كلها (صور).
• انا ما عارف لو جبتوا كاس الاندية الافريقية للابطال ح تعملوا شنو؟.
• والله الكاردينال لو عملها – صورتو تلقوها في كتاب المطالعة.
• الواحد خايف يفتح جواز سفرو يلقى الصورة صورة اشرف الكاردينال.
• ارحمونا عليكم الله شوية من الصور.
• نحن فترنا من الصور.
• على كل حال ليكم ولي غيركم اعملوا فيها ما سمعتوا حاجة.
• ما تشتغلوا بي كلامي دا.
• احفروا ليه قبلو.
• وادفنوه.
• في زول هسع بعرف صورة رئيس برشلونة.
• اشهر فريق في العالم …ما بتشاهد ليه صورة للرئيس.
• في زول شاف صورة رئيس ليفربول.
• والله ما حصل لاقتنا.
• رغم ان المواقع والفضائيات والوكالات كلها بتنقل وتتنافس على اخبار هذه الاندية.
• لكن ما بتشوف صورة لرئيس ريال مدريد.
• ما بتشوف صورة رئيس برشلونة.
• ما في كلام زي دا.
• ولا حتى في مواقع التواصل الاجتماعي ما بتلقى ليهم صورة.
• اعملوا شير.
• نحن كورتنا هنا بقت كلها (صور).
• الزول من يركز في الصور …فهذا يعني انو ما زول شغل.
• خلو عملكم يتكلم عنكم ..ما صورتكم.
• الله سبحانه وتعالي قال : (وقل اعملوا فسيرى الله عملكم ورسوله والمؤمنون …).
• ما قالوا اتصوروا.
• ركزوا في العمل.
• سيرتكم خلدوها بي عملكم ما بالصورة.
• علقوا صوركم في القلوب ما في الاستادات.
• دي حاجات كلها زائلة.
• كلها بتمشي.
• ويفضل العمل الصالح.
• على كل حال ليكم ولي غيركم اعملوا فيها ما سمعتوا حاجة.
• ما تشتغلوا بي كلامي دا.
• احفروا ليه قبلو.
• وادفنوه.
• …………
متاريس
• والله الكاردينال خلانا نقول يا حليل صلاح ادريس.
• فقدنا صلاح ادريس عديل كدا.
• المحترف يجبيبوه عشان يتصوروا معاه مرتين.
• مرة وقت يتعاقدوا معاه.
• ومرة وقت يفسخوا التعاقد معاه.
• شغالين صور.
• اعملوا شير.
• اولتراس الهلال رسالتو وصلت من (الاعتصام).
• قالوا كلمتهم – وعملوا برنامجهم.
• اصلو ما قصروا في حاجة.
• ………..
• الصبة الاخيرة – يا ناس حي العرب قلنا ليكم الشكاوي الكتيرة بتكتل القلب.
