بالعربي الكسيح
محمد الطيب الأمين
لشنو روح الخروف المعنوية كانت أعلى من روحنا ؟؟
* مرت كثير من الأحداث خلال أيام العيد وقد كانت النجومية الأعلى لـ(الرغيف) ..
* كثير من الناس بعد (ضمنوا) الرغيف حتى إشتروا (الخروف) ..
* وهذا تأكيد على أن الرغيف أعز من الخروف ..
* كانت المعاناة كبيرة في الحصول على الرغيف وكانت المعاناة أكبر في الحصول على المال بينما توفرت الخرفان ..
* الخرفان موجودة وقروش للخرفان ما في ، وقروش للرغيف في لكن الرغيف مافي ..
* فكانت الهجرة .. ناس الكلاكلة فتشوا رغيف في السجانة وناس شمبات فتشوا رغيف في بانت ..
* هجرة الرغيف في موسم العيد الحلو ..
* ومن حسنات هذه الأزمة إننا ولأول مرة (ضقنا) رغيف المنشية والرياض والأحياء النضيفة ..
* تسمع إنو في فرن المهندسين ما فيهو صف تركب تمشي تجيب رغيف من المهندسين ..
* ولولا هذه الأزمة لما أكلنا رغيف المهندسين والمنشية والعمارات ..
* بنشكر الله على هذه الأزمة التى جعلتنا (نضوق) رغيف الناس الهاي هاي ..
* من الأحداث المؤلمة خلال الأيام التى سبقت العيد هزيمة الهلال داخل إستاده أمام نهضة بركان ..
* هذا هو الوجع الذي سرق فرحة العيد بجانب شهداء المناصير والرغيف وسعر الخرفان ..
* بالمناسبة الخرفان بقت ما زي زمان ..
* زمان الخروف في الزريبة بتوتر قبل العيد بيومين وبيكون خايف ..
* قبل العيد بيومين في الزريبة بتحس بالخروف نفسيا تعبان وراقد وسارح ..
* ولكن هذا العام .. الروح المعنوية للخرفان كانت مرتفعة حتى قبل العيد بساعات ..
* خروف يعاين ليك لما أنت تدنقر ..
* الروح المعنوية عند الخرفان كانت أعلى من الروح المعنوية عندنا نحن ..
* والله صحي ..
* وجات خسارة الهلال وزادت الوجع أوجاع ..
* خسارة مؤلمة لأنها جاءت أمام فريق صغير في كل شئ ما عدا المستوى الفني ..
* نهضة بركان صغير في كل تفاصيلو ولكنه كبير بمستواه وطموحه ..
* والهلال كبير في كل تفاصيله ولكنهم أرادوا له أن يكون صغيرا في مستواه ..
* لم يكن الهلال (قدر الأسم) فتعرض لإستحقار من صغار أفريقيا في بطولة الكونفدرالية هذا العام ..
* مثل هؤلاء الصغار كنا نلعب معهم وديا على هامش المعسكرات الأعدادية ..
* فريق زي المصري البورسعيدي ده كنا بنلعب معاهو مباراة ودية لما نمشي نعمل معسكر في القاهرة ..
* بنلعب معاهم وديا وهم بيكونوا ما مصدقين إنو لعبوا مع الهلال ..
* فريق زي الموزبيقي ده كنا بنرسل ليهو يجي يلعب معانا مباراتين وديتين بإستاد الهلال إستعدادا لمبارياتنا الرسمية أمام الترجي ومازيمبي ..
* ولذلك عندما يكون الجرح من الصغار يكون أكثر ألما ..
* والهلال بهذه الطريقة لن يمضي إلي الأمام ولن يحقق حتى ما كان يحققه سابقا ..
* لحدي وكت قريب كان عندنا (وضع معتبر) في أفريقيا ..
* الآن نحن لا نطالب بكأس افريقيا ، فقط نطالب بأن نحافظ على (وضعنا المعتبر) في أفريقيا ..
* صورة الهلال لن تقبل إهتزاز أكثر من الذي حدث لها هذا العام ..
* خروج الهلال من الكونفدرالية وقبوله للخسارة والتعادل داخل إستاده أمام فرق لا وزن لها يجب أن لا نتعامل معه بمنطق كرة القدم (فوز ، تعادل وخسارة) ..
* المنطق ده بنقبل بيهو لما نلعب أمام الترجي والزمالك والوداد ..
* لكن مع بغاث الفرق لن نقبل بهذا المنطق ..
* وحتى إذا قبلنا بهذا المنطق أمام بغاث الفرق الأفريقية سنقبل به في حال يلعب الهلال (كورة قدم) ..
* لما تسقط أمام الصغار الإستثناء بيكون لما تلعب كرة وتخسر ما في مشكلة ..
* لكن لما تسقط أمام الصغار وانت مستواك باهت وضعيف فهذا إنهيار يستوجب التدخل والعمل والتدارك ..
* القصة أكبر من خسارة أمام نهضة بركان و(مصالحة) أمام أهلى مروي ..
* اللهم إلا إذا تقاصرت طموح الناس وأصبح الفوز على أهلى مروي غاية الآمال ..
* الحكاية بقت مفهومة والعاقل بيستفيد من الأخطاء ..
* ومشكلة الهلال أن مجلس إدارته يكرر الأخطاء بالكربون ..
* أخطاء في التسجيل ، أخطاء في التعاقد مع المحترفين ، أخطاء في البيئة والمناخ ، أخطاء في الوعود ، أخطاء في الشطب ، أخطاء في التعاقد مع الأجهزة الفنية و..و…و..
* وبالطريقة دي ح يكون الثمن غالي وغالي جدا ..
* الإصلاح لابد أن يبدأ عشان كده ما صاح ..
* وده الهلال ما لعب ولا هظار ..
* من الأشياء التي رفعت من روحنا المعنوية رغم كل الأوجاع هي (منظر نجيلة إستاد المريخ) ..
* حقيقة أول مرة في حياتي أشوف لي نجيلة عطشانة في عز الخريف ..
* دي ما حصلت قبل كده ..
* نجيلة عطشانة وقايمة في حتة وفي حتة ما في ..
* نجيلة بتشبه (رأس زول حلقو صلعة بي مُوس قديمة) ..
* طبعا حلاقة الصلعة بالمُوس القديمة بتخلي حتات فيها شعر وحتات ما فيها ..
* وهذا هو حال ملعب إستاد الحكومة الشهير بإستاد المريخ والمشهور بإستاد (المدفور) ..
* وغايتو جنس غايتو ..
* نركب صافنات ونجيبة (برناوية) وأصلو الزول بيموت والذكرى تفضل حية ..
* و..و..
* والعيد الجاب الناس لينا ما جابك …..(واقف في الفرن ولا شنو) ؟
