صحيفة كورة سودانية الإلكترونية

لما يكون عندك مشكلة مع باب الدولاب

1٬463

صابنها
محمد عبدالماجد

لما يكون عندك مشكلة مع باب الدولاب

 

• قبل ايام عجبتني صورة تداولت في احد الصحفات على مواقع التواصل الاجتماعي لأحد الاشخاص وهو يقف على رأس الطباخين امام (الحلل) مشمرا لطاقيته ومتابعا للطبيخ مع تعليق يقول : (اديني سبب واحد يخليك تساهر مع طباخ المناسبة)؟
• الزول الزيد ا بكون مزعج شديد.
• وكلامه كتير.
• الزول الما بنوم الليل دا بكون جنو نضمي.
• طبعا دي ثقافة راسخة عندنا – لمن تكون في مناسبة واحد من الاسرة لازم يتابع مع (الطباخ) ويساهر معاه.
• نظام الزول شفت – وعارف أي حاجة.
• يقعد يحرسهم لمن تشرق.
• والصباح لمن تلقاه – تلقاه تعبان ونعسان تسألو مالك تعبان كدا؟ يقول ليك : والله امس كنت مساهر مع الطباخ ..ما نمت إلّا بعد ما شرقت.
• يا زول المسهرك شنو؟
• في ناس عندهم احساس انو ممكن يحصل (تسريب) للحمة ، او حتى (الفحم) – عشان كدا لازم تكون مفتح وتساهر مع الطباخ.
• وفي ناس بحبوا يتابعوا الاوضاع – بحبوا (الطواقة) ، وهي الإستذاقة قبل ان يستوي الطعام.
• في اشخاص بحبوا يتدخلوا في أي شيء – طبعهم كدا. الدمعة دي عاوزة ملح …والضلعة ما اتحمرت كويس.
• وسلطة الاسود عاوزة ليمون زيادة.
• في ناس كدا.
• والحلة ديك نارها بسيطة.
• يقعدوا في رأس الطباخ عشان ينظروا ليه ..وعشان كل ما تطلع حاجة يشيلوا منها (عينة) للطواقة ..زي المكون العسكري في الحكومة الانتقالية.
• غير (التنظير) و (الطواقة) ما شفنا منهم حاجة.
• نحن عندنا حاجات بنتشابه فيها.
• حاجات بتحصل لكل الناس.
• في الشرق وفي الغرب وفي الشمال وفي الجنوب.
• في العاصمة وفي الارياف.
• نفس الشيء.
• لمن تكون عاوز الكهربة تقطع بالنهار عشان تطمئن في الليل – عشان في مباراة عاوز تتابعها في المساء – بحصل العكس، اليوم داك الكهربة التى يفترض ان تقطع بالنهار ما تقطع.
• تقعد تحضر في المباراة وأنت بالك كلو في (الكهربة) – حتى لو لم تقطع بتكون مجهجه مع أي هجمة وعندك احساس ان الكهربة ممكن تقطع في أي لحظة.
• ما بتستمتع بالمباراة.
• لمن تكون مستعجل عندك موعد ..الاشارات في التقاطعات كلها بتلقاها حمراء ..ولمن يكون ما عندك موضوع وعاوز تكسر الوقت …تلقى كل الاشارات (خضراء).
• في حاجات بتشتغل معاك (عكس).
• عندي احساس ان اشارات المرور بتعمل بنظام (معاكستك) فقط.
• لمن تكون عندك مكالمة مهمة ومصيرية بتعاين للتلفون بتلقاه عاوز يقطع شحن.
• نحن زمان وقت كنا طلبة …لمن كنا بنركب في الحافلة والواحد عندو قروش تذكرتو فقط بتلفت وراه بلقى الحافلة كلها اهلو..وهو راكب قدام.
• خالتك.
• وعمتك.
• وبنت الجيران.
• وانت ما عاوز تتحرج مع زول – خاصة بنت الجيران.
• الحافلة كلها تسلم عليه…وانت بتجتهد عشان ما ترفع رأسك وما تعرف زول.
• ولمن كمان يكون عندك قروش وعاوز تعمل فيها فنجري ..تركب الحافلة وتقعد تفتش فيها راكب راكب عشان تلقى ليك زول بتعرفو وتدفع ليه ما بتلقى.
• الغريبة دائما لمن يكون عندك قروش ما بتلقى زول بتعرفو في الحافلة ..حتى لو كانت الحافلة دي ماشة بيتكم عديل.
• ودائما وقت يكون ما عندك قروش بتحاول تمرق من الحرج وتركب ورا ..بتمشي وتركب في الحافلة وتلقى نفسك راكب قدام.
• يقعد يزحزحوا فيك ويقوموك لمن تلقى نفسك راكب مع السواق – في المعقد المجاور.
• الحياة كدا.
• نفس الفهم.
• في البيت في مرحلة معينة من عمرك ..لازم يكون عندك مشكلة مع باب الدولاب.
• يتخيل لي الناس دي كلها مرت بالمشكلة دي.
• في أي دولاب في ضلفة ما بتتقفل.
• ما عارف السر في ذلك شنو؟
• أي دولاب فيه ضلفة (مكون عسكري).
• مرات تقلفها بالتربيزة.
• ومرات تعمل ليها كرتونة.
• ومرات تدق ليها (مسمار).
• دولايب البلد دي كلها كدا.
• مرة اتذكر اشترينا لينا دولاب (5) ضلف..الوقت داك الدولايب كلها كانت (3) ضلف.
• دولاب (5) ضلف دا كانت حاجة كبيرة شديد.
• اشترينا الدولاب وقت كنا عاوزين ندخلو في الغرفة ..النجار قال لينا الدولاب ما بدخل.
• ليه نحن عاوزين ندخلو (طب)؟
• فرتكنا الدولاب دا ضلفة ضلفة زي (الحرية والتغيير) عشان يدخل الغرفة.
• الزمن داك ما كان نظام تركيب الدولايب داخل الغرف والشقق – الكلام دا ظهر في السنوات الاخيرة مع العفش والاثاثات التركية.
• عشان ما تقعدوا تنظروا لي ساكت.
• المهم وقت الدولاب اتركب في الغرفة ..قمنا رحلنا من البيت.
• الحاجات دي بتحصل لي كل اسرة بتجد معاناة في ادخال الدولاب في الغرفة.
• اول ما تعمل كدا تقوموا ترحلوا من البيت.
• خاصة لو كنتم ناس ايجار.
• في السودان دا – اجزم ان الناس كلها عندها مشكلة مع القرع والعدس والبامية المفروكة والحكم العسكري.
• مع ذلك (العدس) دا اصلو ما فايتنا.
• والحكم العسكري.
• (3) ثورات الناس ديل الكلام دا ما واقع ليهم.
• ما عاوزين يفهموا.
• لكن نحن تاني (عدس) بحكمنا ما في.
• ليه معسكرات الالزامية زمان كلها كانت بتكون (عدس)؟
• عشان الحكم العسكري.
• لهذا انا عندي اعتقاد ان العدس وجبة عسكرية.
• في واحد قال لي انت مالك مع العدس.
• سمعت ليك زول يوم قالوا خنقو عدس؟
• او حصل في يوم لقيت ليك شوكة في عدس؟
• قلت ليه طيب سمعت ليك زول بياكل ليه في (سمك) قال ليك انا مديون.
• شفت ليك زول بياكل ليه في (لحمة) قال ليك انا عندي مشكلة في الضروس.
• العدس دا الزول ما بمشي عليه إلّا مجبور.
• زي الحكم العسكري.
• زولكم قال لي : أي والله.
• في واحد قال انت عارف البطيخة بقت بي كم؟
• قلت ليه هسع الجاب سيرة البطيخة في الموضوع دا شنو؟
• قال لي سعرها!!
• قلت ليه بقت بي كم؟
• قال لي بي الف ونص.
• قلت ليه يعني لو اشتريت ليك بطيخة وطلعت ما حلوة زي الزول الطلعت صرفتو في الصندوق الصرفة الاخيرة.
• يجيبوا ليك صرفتك في المستشفى.
• ولا تطوق ليها طعم.
• تصرفها دربات.
• البرهان وحميدتي طالبوا من حمدوك حل الحكومة.
• ديل زي الزول القال عليه كمال ترباس …معزوم ويقوم يقلب السمكة.
• عاوزين تقلبوا الحكومة.
• اقصد عاوزين تقلبوا السمكة.
• وانتوا ما دافعين فيها أي شيء.
• مرة مشينا لينا لي زول عيان في المستشفى.
• الدكتور قال لينا الزول دا ما تدخلو عليه …حالتو صعبة شديد.
• الزول المعاي قال للدكتور ..حالتو صعبة يعني ما بقدر يرجع لي الـ (10) الف جنيه الشايلها مني قبل ما تجيه حاجة؟
• الدكتور قال لينا هو لو بقدر يرجعها ليكم كان حالتو بقت صعبة؟؟
• الزول دا حالتو بقت صعبة من الدين الكتير.
• نحن طوالي قنعنا منو ..ورجعنا خليناه.
• الكلام دا ما عندو علاقة بالمكون العسكري.
• دا كلام ساكت كدا.
• …..
متاريس
• الاهلي مروي لعب امس في الكونفدرالية.
• والمريخ يلعب اليوم.
• وبكرة ان شاءالله يلعب الهلال.
• ان شاءالله الاندية السودانية تطلع بنتائج جيدة.
• خايف على المريخ من غارزيتو.
• غارزيتو يمكن يكون عندو رأي.
• وغارزيتو عاوز الشرط الجزائي.
• خليك في البيت.
• ما تسنوا حق الشهداء.
• حق كشه وعباس فرح واحمد الخير وعيسي دودو.
• ما تخونوا الدم.
• مدنية لأخر نفس.
• لأخر شيء.
• ونحن تاني ما بغشنا زول.
• ولا بضللونا.
• ….
• ترس اخير : والبلد دائما ان شاءالله بخير.

قد يعجبك أيضا
اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد