لو المجموعة فرقها الأربعة سودانية
في السلك
بابكر سلك
لو المجموعة فرقها الأربعة سودانية
*خسر أبو الهل برغم الخندقة المن أمها
*اكتفى الهلال بنقاط أربع شايل فيها تلاتة من المريخ
*واكتفى المريخ بأربعته التي جلب منها تلات نقاط من الهلال
*ومجموع نقاط المريخ والهلال لا يؤهل أحدهما للمرحلة القادمة
*صن داونز سطاشر نقطة
*الأهلي عشر نقاط كلها من السودان
*يعني نجح ترس الشمال في قفل بلف مصر
*وفشل الكبيران في ألا يكونا حصالة للأهلي بالذات
*والأهلي في أسوأ حالاته
*ونحن في أحسن حالاتنا
*معسكرات ربع دستة من الشهور
*أجهزة فنية أجنبية ومخلوطة بالمحلبية السودانية
*ودرة التسجيلات وقنبلة الموسم ومحترف من العيار الثقيل
*والمحصلة طيران الخليج
*وحتى لا ندفن رؤوسنا تحت الرمال
*طرنا لأنو إدارة الكرة في بلادنا بدءا من الوزارة ووصولا للجيش الجرار بإدارة الكرة
*كلهم لا يعرفون منهجية إدارة النشاط
*فمن لعب الكرة لموسم أو بعض موسم
*لا يكفيه ذلك ولا يؤهله لإدارة الكرة بأي ناد
*بلد تفتقر للاستراتيجيات يستحيل تحقق إنجازات
*وعلوق الشدة عمرو ما دخل حمار الزول الأمي مع حمير الكتبة
*صعد المريخ للمجموعات وكل همه وقمة أهدافه الهلال يطير
*وكان له ما أراد
*ودخل الهلال المجموعات وقمة طموحه المريخ يطير
*وكان له ما أراد
*فالناديان يدخلان التنافس الأفريقي على طريقة الأصحاب الاتنين الماشين في الخلاء وقابلهما الشيطان
*الشيطان قال للأول أطلب داير شنو أحققو ليك
*صاحبنا قال ليهو داير لي مراح خرفان
*تخ تخ جمبلوق
*مراح الخرفان وقف
*الشيطان سأل التاني
*داير شنو؟
*قال ليهو داير لي مراح مرافعين
*الشيطان قال ليهو مراح مرافعين تعمل بيهو شنو؟
*صاحبنا قال للشيطان
*عشان ياكلن مراح صحبي ده
*وده بعينه هو التعصب السالب الذي يقوم على تحطيم الآخر دون التفكير في تطوير الذات
*عشان كده نادينا كثيرا بالتعصب الإيجابي
*وهو الذي يجعلك تفكر بجدية في تطوير ذاتك دون الاشتغال بالآخر
*والخلاصة طرنا
*واستحقينا سخرية الصعيدي القالوا ليهو الهلال بغلب الأهلي وبتأهل
*قال ليهم يتأهل مين يا الدلعادي
*لو المجموعة فيها أربعة فرق سودانية مش حا يتأهل منها واحد
*الله لا جاب عقابكم
*أيها الناس
*نظل في نفس الحال إلى أن يغير الله حال إدارة الكرة ببلادنا
*إلى أن نبحث عن رئيس بمواصفات ليس من بينها بدفع
*لما ننقي الوسط الرياضي من الكرتجية والمصلحجية وأصحاب الاغراض والأمراض
*أيها الفشلة
*قوموا لدوريكم يرحمكم الله
*أيها الناس
*إن تنصروا الله ينصركم
*أها
*نجي لي شمارات والي الخرتوم
*والينا المكلف بينا
*يعني الكهربا لما تجيبوها ستة بتكونوا قاصدين عشان نسمع الأذان يا أخينا ؟؟؟
سلك كهربا
ننساك كيف والكلب قال التدهور خلال الحقبة الأخيرة بيأكد إنو الناس ديل كضابين ما بقدروا
وإلى لقاء
بتقول كدا وانتو في الإعلام الرياضي المصنف هلاريخ نشرتو التعصب والحقد والغل…. ودخلتو على الهلال والمريخ بالسمسرة والتدخل في الشأن الفني…. واكتب واقبض… والتطبيل للجلابي… وغيرها من أدوار الإعلام الرياضي السالب… دايرين الليلة تبقوا ناصحين…. من الذي كتب… ما بنطير برانا
صدق الأخ جمعة موسى، هؤلاء حفنة من المشجعين، ليس لهم أي علاقة بالرياضة، بل مصلحجية و مطبلاتية و لن ينصلح حال كرة القدم مادام هؤلاء الذين يدّعون انهم صحفيين رياضيين موجودين، اتقوا الله في السودان انتم و من شاكلكم من عسكر و انقلابيين و بنو كوز،،، حسبنا الله ونعم الوكيل فيكم
اصلا السودان بلد ميت اكلينكيا وما عندنا حس في الاتحاد الافريقي الذي يسيطر عليه البلح ولا كيف موسيماني يسحب القرعة ويختار فريقين من السودان ل
الإعلام جزء أصيل من تدهور الكرة السودانيه أنتم نشرتو التعصب بين الجماهير،
كيف عاوزين الكرة تتقدم والبلد كلها صحف رياضية والرياضة عندهم هي كرة القدم كل واحد يطبل ويمجد اما في الهلال او في المريخ والاثنين للخير في هذا ولا ذاك والواحد من الصحفيين كل همه يكتب عموده اليوم من اجل الارتزاق مافي صحفي واحد عنده ذرة وطنية والا لماذا الصمت عن المال الاكبر الذي لا يوجد في كل القارة الا في السودان الا وهو عدم وجود ملاعب مؤهلة لاستضافة المباريات الدولية وانتم اعلم بمن اكل كل الاموال التي كان تريد لتنفيذ مدينة رياضية منذ ثلاثون عاما بل زادوا علي ذلك بان استولوا عليمايزيد عن نصف الأرض التي خصصن لذلك المشروع وقامت فيها نظارات استثمارية من الأفضل لنا ان لا نتكلم عن الرياضة وخاصة كرة القدم فلا توجد لدينا كرة قدم ولا رياضة