لو باريتوا الصادق المهدي بتلقوا البشير رجع القصر !!
بالعربي الكسيح
محمد الطيب الأمين
لو باريتوا الصادق المهدي بتلقوا البشير رجع القصر !!
* الصدمة هي أن يرفع النداء للصلاة وانت لا تستطيع أن تقترب من المسجد خوفا من المرض .
* هو نفس المسجد الذي كان يرفع النداء وكنا نحن لا نقترب منه خوفا من الشيطان .
* لطفك يا الله .
* بعد البنطلون (الناصل) ، ظهر الان في (أغاني وأغاني) البنطلون (القصير) .
* لما استهجنا الاسكيرت القصير عند البنات ما اتوقعنا يجي يوم ونشوف الأولاد لابسين تحت (الركبة) .
* الفنان يا كافي البلا لا بتعرفو عايز يغني ولا بتعرفو عايز يقطع خور .
* وغايتو جنس غايتو .
في فترة من فترات حياتي كانت تعجبني كلمة (أنصاف الحلول) .
* كلما أستمع لهذه الكلمة اطرب من الداخل ، اطرب ولا اعرف معناها.
* أول مرة سمعتها عند المعلق الكبير الرشيد بدوي عبيد وهو يعلق على احدي مباريات الهلال .
* ومن باب الفلسفة المشاترة استعنت بهذه الكلمة في واحدة من العلاقات العاطفية المبكرة .
* كنا نحن واولاد حلتنا بنقول للبنات : (ما دايرين إنصاف حلول في الريد) .
* قشرنا بهذه الكلمة جدا .
* أنا بالذات الكلمة دي عملت لي شغل عاطفي(إبن كلب جدا) .
* اليوم أحب أن أشكر الأستاذ الرقم الرشيد بدوي عبيد الذي اهداني هذه الكلمة واهداني أول(حنك عاطفي) في حياتي.
* شكرا استاذ الرشيد .
* العطر النسائي في نهار رمضان يجرح الصيام .
* أما (البيبسي القزاز) في نهار رمضان فهو (فطور إلا ربع) .
* ويا الله مطرة .
* أغلب الظن أن رجالات حكومة البشير كانوا على ثقة بأن الموت لا يقترب من أهل السلطة .
* الدليل على الكلام ده (كمية الأراضي) السرقوها .
* نحن الواحد فينا عندو تلاتة بناطلين (أسود وكحلي وبني محروق) ، وهم الواحد عندو ١٩ قطعة أرض ومزرعة وعمارتين.
* مساكين قايلين الكفن فيهو (جيوب) .
* قايلين (ود اللحد) ناصية فاتح على شارعين .
* حاجة تكسف .
* إذا حاولت قوى الحرية والتغيير (مبارات) الصدق المهدي أستطيع أن أجزم بأن البشير سيعود.
* والله تباروا الصادق المهدي ده بكرة البشير يرجع ويرقص ليكم ٣٠ سنة تانية .
* طنشوا الصادق المهدي فبعض الأوجاع تموت بالتناسي.
* حالة صعبة .
* أكثر شئ مؤلم في هذا الحظر هو (إدخال اليد في الجيب) .
* إحساس قاسي لما يوميا تدخل يدك في جيبك عشان تمرق قروش دون أن تدخل جيبك قروش .
* غايتو ح نطلع من الحظر ده وبطرفنا دبلوم عالي في البخل .
* الحظر خربنا.
* المؤسف ليس أن سهام عمر تسأل تلك الأسئلة السخيفة في برنامج (مسارب الروح)، بل المؤسف أن تكون سهام عمر وبعد ١٤ سنة من العمل والظهور لسه (متدربة) .
* جنس تدريب .
* فشل يبكي والله .
* المهم .
* بعض الذكريات هي مثل (جنا الحشا) ..
* غالية وعزيزة ..
* والذكرى عند بعض الناس (ترمي) مثل (القهوة) و(الشاي) ، وعند البعض الآخر هي (موت جديد) لا ينقصه إلا (الفاتحة والعزاء الحسن) ..
* وخطورة الذكريات إنها تضعك في مواجهة مباشرة مع نفسك ..
* ويعجبني هنا قول أزهري محمد علي : (الذكريات في كل ليل تفتح حنينك بيت بكا) ..
* والذكريات فيها (الأليم) وفيها (السعيد) ..
* ذكرى رحيل النجم والي الدين محمد عبد الله هي من الذكريات التى تشبه (وجع الضرس) .
* ذكري كلما مرت عليها السنوات (تعتقت) وزاد وجعها في قلوب الناس .
* ولذلك يظل والي الدين هو (الوجع الأكبر) في حياة كل الهلالاب .
* كان (موجُوعا) في حياته وأصبح (وجعا) للناس بعد مماته .
* مرت علينا قبل يومين ذكرى رحيل والي الدين نسأل الله أن يرحمه ويغفر له ويسكنه العالي من الجنان .
* و..و..
* ويا أستاذة : شايفكم في رمضان ده غيرتو (قش المكيف) تلاتة مرات !
* كل (عشرة) في رمضان بتجيبوا ليها قش جديد للمكيف.
* عشرة الرحمة بقشها وعشرة المغفرة بقشها وعشرة العتق من النار بقشها
* غايتو القش الاكلو مكيفكم ده خروف جيرانا ما اكلو .
* و..و..
* ويا الله مطرة.