لو تعرف يا حمدوك

في السلك

بابكر سلك

لو تعرف يا حمدوك

*تعرف يا حمدوك الناس الطلعت وترست هم نفس الناس الجابوك
*نفس الناس الحبوك
*نفس الناس القالوا بنحبك يا حمدوك
*لكن كمان صبروا وصابروا ورجوك
*استنوك ياحمدوك
*ورجوك ورجوك
*الأسعار مشعللة فوق
*رجوك واترجوك
*وهم فاهمين وفهموك
*لاكا مسكت بلداً صادر قطن جزيرتها مشحون في البواخر فوق
*لاكا مسكت بلداً سودانيرها في مطار هيثرو ضاربة الروق
*لاكا مسكت بلداً قطرها يقدل فوق سكك حديدها شاقي سهوله والمزارع طوق
*لاكا مسكت بلداً صادراتها مالية العالم وكمّين سوق
*لاكا مسكت بلداً جنيها في السما والدولار محروق
*لاكا مسكت بلداً لحمها راااقد بالطايوق
*لاكا مسكت بلداً مصانعها المحلية كافية السوق
*لاكا مسكت بلداً صمغها العربي بتصدر باسمها وعايدو مالي بنوك
*لاكا مسكت بلداً اقتصادها خالي شكوك
*لاكا مسكت بلداً خزانتها تبل الشوق وتفرح المعشوق
*لاكا مسكت بلداً في العالم صاحب مقام مرموق
*لكن ياحمدوك
*بالإمكان أفضل مما كان ومما هو كائن يا حمدوك
*ترّسوا شان ينبهوك
*ولسه قولهم بنحبك ياحمدوك
*وما قادرين يقولوا غير كده يا جوك
*طلعهم … اخرجهم من الحرج والمنعرج والضيق الشديد يا حمدوك
*ولا تجدهم مضطرين يقولوا أي شئ خلاف بنحبك يا حمدوك
*أها
*نجي للكورة
*هي وينا الكورة؟؟؟؟؟؟
* أيها الناس
*إن تنصروا الله ينصركم
*ويوفق حمدوككم
*ويفك زنقتكم
*وينضف رغيفتكم
*ويرخص لحمتكم
*ويطلع زيتكم الإسمو بترولكم
*أها
*نجي لي شمارات والي الخرتوم
*الرغيف بالكيلو يا والينا
*هل سيد الفرن ربع كيلو بدينا؟
*وهل من الحتة ادينا بتجوز لينا
*والرغيف الفخدة كيلوهو بكم يا والينا؟؟؟
*خالي عضم يا والينا

سلك كهربا

ننساك كيف والكلب قال عندو مسابقة
أغلى كيلو اللحمة ولا كيلو الرغيف ولا كيلو الكهربا ولا كيلو مشوار الركشة؟؟؟
ترسل الإجابات على بريد مجلس الوزراء والمجلس السيادي والمجلس البيغادي
وإلى لقاء