لو ما (شاعر) انك غواصة للطبال.. امرق تعال..!!
كرات عكسية
محمد كامل سعيد
لو ما (شاعر) انك غواصة للطبال.. امرق تعال..!!
* فضلت الاستعانة بمشهد سرحان عبد البصير مع الشاويش حسين، والضابط احمد عبد السلام، في مسرحية (شاهد ما شافش حاجة)، وبالتحديد عندما بدأ فريق المباحث في استجواب الشاهد، بعد اقتحام شقته، وقلت في نفسي ربما اتمكن من خلال ذلك بتوصيل فكرتي..!!
* بدأ (منظر التآمر)، بمجرد قيام الضابط احمد عبد السلام بتوجيه امر للشاويش حسين طالبه فيه بالجلوس.. فكان سرحان يطلب من الشاويش عدم الالتزام بذلك الامر.. فتكرر الطلب، ومعه الرفض كثيرا، حتى صاح الضابط بأعلى صوته ما تقعد يا حسين.. (فقعد)..!!
* حتى بعد ما شرع الضابط في استجواب الشاهد، كان سرحان حريصا على شحن الشاويش ضد رئيسه، مؤكدا له ان اي قرار فصل لاي جندي لا يصدر الا من وزير الداخلية مباشرة.. في اشارة الى ان الشاويش سيظل (محميا) من الرتبة الاعلى منه..!!
* كان (سرحان) يسعى (لشق صف المجموعة) الامنية، التي زارته في منزله بدون اي مقدمات، وذلك لايجاد اي مخرج له من الزنقة التي وجد نفسه فيها، والمتمثلة في اتهامه بقتل جارته الرقاصة عنايات ابو سنة..!!
* (عبط وهبل) سرحان، (واستنكاحه) لم ينطلى على الضابط (الفاهم المدرك لمتطلبات عمله)، لكنه نجح في نطاق ضيق، مع (صغار) الامنجية.. وبعد فترة وجيزة، فرض المنطق نفسه، وجلس اي عسكري وجندي ومخبر كل في مكانه.. وبقي (القائد قائد)..!!
* وبعيدا عن مسرحية سرحان الكوميدية، وبالنظر الى واقع حالنا في السودان، سنجد ان فترة حكم الكيزان للبلاد خلفت الكثير من الثوابت المظلمة، وصار (كلاب العهد البائد) يتخذون اسلوب (المؤتمر اللاوطني) اسلوبا للتعامل حتى في مؤسساتهم الخاصة..
* اي مكان، سواء كان شركة، او مصنع او غيره فان صاحبه يحرص على زرع (غواصة) في كل مكتب، او بين كل مجموعة ليقوم بنقل الاخبار ويوشي بما يدور من ونسات بين زملائه..! * ولان جل التجار الذين انتعشت اوضاعهم المالية في فترة حكم الكيزان استندوا على سياستهم التي اتبعوها في التمكين، كان من الطبيعي ان يكون برنامج الغواصات من احد ابرز واهم الطرق لتأمين انفسهم، فتابعناهم يقومون بتجنيد الكثير من عشاق الوشايات..!
* انا شخصيا اثناء عملي في الجريدة (دييك) عشت مع الزملاء، كثير من القصص التي كان ابطالها (غواصات) تم تجنيدهم لمتابعتنا، ونقل ونستنا، وحواراتنا، وكل ما نقوله الى صاحب العمل، ومقابل ذلك ينالوا مكاسب عديدة، مالية ومعنوية لكن في اصلها وحقيقتها وهمية..!
* واثناء او قبل ذلك المشهد البائس الذي عشناه في الجريدة ديييك، تابعنا كثير من المواقف الدخيلة على الكرة، دارت احداثها من حولنا في المؤسسات، خاصة الرياضية بما فيها اتحاد الكرة الذي شهد من قبل اكبر عملية اختراق، كان ابطالها اشخاص يعرفهم كل عشاق الساحرة المستديرة وبالاسماء..!!
* وبمجرد معرفة قادة الاتحاد لتفاصيل تلك القصة الغريبة، تابعناهم يطردون كل من شارك في الفضيحة، وشاهدنا كيف تم تعويض (الغواصات) الذين قاموا بدور البطولة في تجاوز شاذ لا يحدث الا في عهد (مريخ الكيزان)..!!
* ولان ابطال تلك القصص ما هم الا اذيال للكيزان، تربوا في عهدهم، وكونوا ثرواتهم بمعونات، ومساعدات وعطاءات مضروبة، كان الفساد هو عنوانها الاول، وبمباركة رموز النظام البائد، لم نتعجب من ظهور سيناريو جديد لفصل بايخ سار بنا في نفس اتجاه الفساد وبرائحته التنتة ذاتها..!!
* لقد تابعنا منذ فترة ليست طويلة، وجود اختراق واضح في اتحاد الكرة، بطله الاول (واحد مخلوع)، عامل نفسو رايح، (وما شاعر) باي حاجة، بعدما مارس الانبهار مع (الطبال الموهوم)، واعلن استسلامه التام لكل توجيهاته ومقترحاته..!!
* تحول الغواصة، (الما شاعر)، الى اداة، مثله مثل (الشاويش حسين)، الذي كان (سرحان) يحركه من خلف الضابط، (بالريموت كنترول) وذلك سعيا لاحداث مزيد من (الفوضى والبلبلة والتأليب)، ضد (البروف) العلامة كمال شداد..!!!!! * تابعنا كيف تحول (الما شاعر) الى بطل في نظر الطبال، ولم لا يحدث ذلك بعد ما اصبح في وضعية الشخص المميز وصار احدث غواصة يتم تحريكها من على البعد بالريموت كنترول كما هو الحال بالنسبة للشاويش حسين من جانب سرحان في المسرحية..!!
* ومن هنا نوجه نصيحة للغواصة الجديد، ونؤكد له ان الاهتمام الوهمي الحالي من جانب الطبال لن يتواصل، وسيزول بمجرد ان ينال التاجر مراده، وستجد نفسك في لمحة بصر بلا قيمة مثلك مثل بقية الاشخاص الذين اتخذهم المدعي كادوات وصولا لاهدافه..!!
* لا تزال قصة (سيدنا يوسف) تحاصر عقلي وبالتحديد مشهد مجموعة الكهنة الذين يعرف كل واحد منهم درجة الوهم التي يتعامل بها (كبيرهم اليخماو)، ورغم ذلك يصرون على التسبيح بحمده ليل نهار، رغم علمهم بانه موهوم، وهم يفعلون ذلك من باب الحرص على مصالحهم، وما اكثر مثل تلك النوعية في زماننا الحالي..!
*تخريمة اولى:* حقيقة يا (غواصة)، لو انت فاكر روحك مدسوس، (وما شاعر) بان لعشاق الكرة علم بتحولك الى (مخلب قط)، يتم تحريكه من على البعد بالريموت كنترول، فانك بالجد واهم، اما اذا احسست بالذنب باستسلامك للطبال فامرق تعال..!!
*تخريمة ثانية:* اذا كان هناك من يعتقد بان البروفيسور كمال شداد غارق في الفساد حتى اذنيه، فمن باب المصلحة العامة عليه ان يشرع في مقاضاته بالمحاكم، بدلا من (الردحي اليومي ده)..!!
*تخريمة ثالثة:* ضحكت وانا اقرأ مانيشيتا احمر يتحدث عن (تحسر الغربال) على اصابة التش.. فسرحت مع نفسي، وتصورت ان عاشق الازرق قد (عاد للمريخ عبر تصريح)..!!
*حاجة اخيرة:* والله العملتها في الوسط الكروي يا (ود العمدة) نحنا ما عافينها ليك نهائي (روح يا شيخ منك لله).
*همسة:* عشان كده الغواصة ال(ما شاعر) رفض التصريح، والرد على الاسئلة التلقائية لانه تلقى تعليمات، وتوجيهات بعدم التعامل مع صاحب (كرات عكسية)..!!
ههههههههايا، الليلة يا ود كامل جبتها ضقلها يكركب عديييييل كدة 😆😆😆
الليلة هبشت لينا ضيف إجتماع الفيفا الما بعرف يتكلم إنجليزي ودخل الإجتماع ومرق بدون ما يفهم حاجة، ودي النوعية الحشروها الكيزان الملاعين في كل حتة لحدي ما طلعوا عين البلد لعنة الله عليهم !!
المشكلة إنو زولك بتاع الدكتوراة الكيزانية المضروبة هو ذاااات نفسه يامولاي كما خلقتني، ولو طلبوا منه يجي يقابل وفد من الفيفا حا يكبرها ويعمل عنده ملاريا ويرقد في البيت…..!! ديل يا أستاذ محمد كامل العلم ما بسوي عندهم حاجة، المهم الواحد يطبل ويشتم ويهتك أعراض الناس ويستلم قريشاته ويبقى مارق، والكيزان أكتر حاجة فلحوا فيها مقدرتهم على إختيار المرضي الحاقدين وأصحاب العقد النفسية ومركب النقص وحشرهم بين أولاد الناس والمتعلمين عشان ينخروا بيناتهم ويلقطوا المعلومات وينشروا الفتن والدسائس، بس ربك عادل خليها عليه وعما قريب حا يسعدك ويرد ليك حقك فيهم !!
الليلة الجمعة والعطلة حاصلة، أسي بيمرق عليك صبي الكاهن الأعظم أليخماو السبعيني العجوز ولدنا أبو المستعار المندلاوي ويكيل ليك السباب والشتيمة إنتقاما ودفاعا عن ملهمه ومخدره، بس أديله وأهرد فشفاشه هرد، ما فضل ليهو كتير 😂😂😂
ملحوظة: مين ياخوانا عارف طالب الإعلام بتاع أمدرمان الإسلامية القبضوهوا ببخرة 😆😆😆
الله يشفيك
حسي ده كلام يتقال يوم جمعه؟!!!!
ما قابلني انسان في الحقد و الضغينه زيك.. عايش في الدنيا دي كيف و ناس بيتكم عايشين معاك كيف؟
داير ليك جلسه مع دكتور نفسي ..
عفارم عليك فقد اصبت الحقيقة ولكن من يقرأ ومن يفهم بانه لن تقم لنا ريادة وقيادة وسيادة فى مجال نحن من اوائل مؤسسيه طالما نقتال فى كبارنا واحد افضل علمائنا و ادارينا اكاديميا ورياضيا ولن ننال البطولات والاحترام وهناك من يسربون اسرار ومستندات ووقرارات مصالحهم لمرضى يريدون اعلاء زاتهم وتميزهم عن اقرانهم بامتلاك المعلومة ليتوهموا بانهم الاقدر والاجدر والافهم ليستغل ذلك.فى هز المنظومة وتحقيق مكاسب لاحد.الكيانات دون غيره بالخبث والفساد كما حدث بالامس ايام سمير فضل وكاس وما هو حاصل الان فى قضية العجب واخوانه و قضية سوداكال ودخول هؤلاء الغواصات واستلام الملفات و ادارة الازمة وتغليب كفة على اخرى رغم انهم يفترض بحكم مناصبهم ان يكونو على مسافة واحدة بين الخصماء وان يعملوا على اعلاء حاكمية الاتحاد وقدسيته باعمال تطبيق القانون واللوائح ولكن ياقلبى لاتحزن فهذا هو السودان الذى اختلط فيه الحابل بالنابل وعلاء فيه صوت الفسدة الجاهلون المفسدون .
اللهم اشفي هذا الشخص بالله عليك اليوم جمعة وعيد للمسلمين وإجازة لكل الناس عشان تستريح من عناء العمل لاسبوع وتجلس مع اسرها وانت مازلت في ضلالك القديم الجديد والله كده بتموت من الغل والحسد الجواك وزول بيجيب ليك خبر مافي غير صلاح وهجام وجالون شل
اتقي الله في الناس وفي نفسك فالمؤمن ليس بطعان ولا لعان ولا فاحش ولا بذئ وللاسف كلها مجتمعة في كتاباتك
يا اخي امشي اضرب مزمل دا بمسدس عشان ترتاح
شفاك الله
اقول لك ذي ماطار سوف يقع وقعة كبيرة وبدأ الان التهاوي
ياريت الهلال كان فتح موضوع مباراة
مريخ الفاشر مع الفيفا من جديد. لسبب
واحد فقط وهو تعرية الفاسدين. رجل في مقام
محمد الشيخ ما سمعوا كلامه لغاية ما خلاها
ليهم وانسحب …. والان شغالين على الروفيسور شداد.
انت طيب انت ما تقول لي شداد يمشي يفتح بلاغ اشانه الحاميهو شنو واحد اتهموه بالفساد والسرقه والموضوع وصل لي جوا بيتو المسكتو شنو لو هو اصلا ما فاسد وحرامي.. اللذيذه مزمل ولا مهبب ليك 😁
@ روجر ميلا…
محمد الشيخ مدني هو من تابع القضيه محليا و مل المكاتبات كانت بتمهر بي توقيعو.. حتى مهر توقيع الاستئناف لمحكمه كاس.. كيف يكون انسحب من القضيه؟ .. فكيتو الكضبه و دايرننا نصدقه.. !!!
الوهم يضرب بأطنابه علي كاتب هذا المقال شنو يعني عملت مع مزمل أو لم تعمل ، عشاق الأحمر بالملايين ومدركين لكل ما يدور في الشارع الرياضي ، لسنا في حوجة حتي توهمنا بهذه الخطرفات everyday , مزمل ليس بهذا الغباء يكتب بدون دليل والصحفي الحقيقي ان لم يكن لديه السند أو الدليل لا يخاطر بمستقبله وقد تحديته أنت شخصيا عندما قدم المريخ شكواه لكأس وبها كسب الشكوي ومن ثم نال البطولة، كنت تسخر منه بتحدي صريح ، هذا هو الصحف الذي خبرناه، فمن انت وأي مؤهلات علمية أهملت لهذا المجال ، دع الرجل وشأنه فنحن أعلم به منك .
سنين الحرقه ملازماااني
الليله جبتها عديل سبب زعلك وحقدك يا ما قلنا ليك الحارقك طردوك من الجريده
وبما انك مغبون وحاقد شديدكل يوم حامياك النوم
الحمد لله مرقتها الليله يمكن ترتاح ولو لسه واجعاك نشوف طبيب من اياهم
بصراحه انا وجعتني خلي انت والله مزمل ده بالغ طرد عدييييل كان يجيبها ليك بالتدريج بدل الخلعه الفيك لي هسي
معليش يا اسطي مش البيه اسطي برضه بنحاول نشوف ليك اي شغلانيه تمشي بيها حالك
لكن الطرده حاره والله حااااااااره خلت الزول محبك لامن الوش ورم
الليله ديك في الجريده ديك طردوه ..خللوه
الفى بطنو حركس براهو بيرقص هس الزول ده جاب سيره مزمل هو كتب مقال شيق وصاحب العقل يميز
هو فعلا الاستاذ محمد سعيد ما جاب سيرة ( حول لي يا ريس ) ولاجاب سيزة المكرمه
يااااخ دكتور مزمل طردك من الصدى وما دايرك تشتغل معاهو وهو صاحب الجريدة وأدرى بمن يعملون معه واذا فيك خير هو المستفيد واللبيب بالاشارة يفهم …. نحنا ذنبنا شنو كل يوم تردح لينا… خلاص اسكت بنكلمو يرجعك ههه
ومرت الايام وفي الخيال لوزان