مالو ما ورانا اسبابو ؟؟
بالعربي الكسيح
محمد الطيب الأمين
مالو ما ورانا اسبابو ؟؟
* يظن كثير من الناس أن بنهاية الفيضانات والسيول إنتهت معاناة المتضررين.
* المتضررون من الفيضانات هذا العام المعاناة عندهم بدأت بعد نهاية السيول .
* هم حتى تاريخ اللحظة في (حيرة من أمرهم) .
* حتى الآن هم في العراء وأكثرهم عجز عن (بنيان بيته) .
* هل تصدق لحدي الآن في ناس قاعدين في الخيم ؟
* فيضان (٢٠٢٠) تجاوز حدود المعقول والمتوقع والطبيعي .
* كسر الفيضان أرقام قياسية مثلما كسرت (٢٠٢٠) أرقام قياسية أيضاً .
* (الفيضان) كسر رقم قياسي في تاريخ الفيضانات ، و(٢٠٢٠) كسرت رقم قياسي في تاريخ السنين ، و(المريخ) كسر رقم قياسي في تاريخ التمهيدي.
* والله صحي .
* الفيضان تجاوز (الطبيعي) ، والمريخ تجاوز (العادي) .
* وتعال أناقشك.
* بعد ثلاث سنوات المريخ يتأهل وهو تأهل يستحق الفرح.
* لو الظروف كانت كويسة قطع شك المريخ كان ح يحتفل بهذا التأهل العظيم .
* لو التأهل ده حصل في زمن جمال الوالي الشهير ب(عزو) لكانت الاحتفالات مدورة لعند الآن.
* لكن سوداكال عاقل.
* سوداكال عارف إنو المريخ اتأهل عشان يطير .
* جاييك انيمبا.
* وأنتو طبعاَ ما بتعرفوا فرق بالحجم ده .
* بتعرفوا (القطن التشادي) و(الغزالة التنزاني) و (العنقرة الجيبوتي) .
* مرحلة إنكم تواجهوا انيمبا دي مرحلة أكبر منكم .
* واوع تشبكني لوح الشرف ومانديلا وبطيخ .
* نهائي مانديلا لعبتو ضد الأهلي؟
* قال لا .
* لعبت النهائي مع الوداد ؟
* قال لا .
* لعبت النهائي مع الترجي؟
* قال لا .
* قوم على حيلك .
* بلا مانديلا بلا دوشة .
* جاييك انيمبا وورينا شطارتك .
* انيمبا ده اسألوا منو الهلال .
* شلنا منو نقطة في عقر داره والمطر يلخم .
* مباراة كان من نجومها جمعة جينارو .
* مباراة كلها مطر وطين .
* قابلنا انيمبا في الخريف .
* وأنتو لسوء حظكم ح تقابلوهو في (البرد) .
* البرد وما أدراك ما الوحدات الأردني .
* عندكم ذكريات أليمة مع البرد.
* ذكريات لا بتتنسي ولا بتتمحي.
* (سباعية) قالوا سببها البرد .
* من هسه اعرفوا إنكم ح تواجهوا انيمبا في البرد .
* عشان بعدين ما تقولوا لينا السبب البرد .
* خلوا مدربكم (يمرنكم على البرد) .
* والله العظيم أنا لما المريخ قال سبب الخسارة أمام الوحدات الأردني (البرد) قلت (البرد) ده الحكم .
* قالوا لي لا ما الحكم .
* افتكرت الوحدات الأردني عندو مهاجم اسمو (البرد) .
* طلع اسمو شلباية .
* وغايتو جنس غايتو .
* المهم .
* تمضي على قدم وساق تحضيرات الهلال استعدادا للاشانتي.
* هذه المباريات الودية التي يخوضها الهلال ستقدم فائدة كبيرة للفريق .
* لا نريد أن نركز على طريقة لعب زوران ولن نركز في قلة الأهداف المسجلة بل سنركز على دعم الفريق .
* الوقت لا وقت حساب ولا وقت تقييم .
* نثق أن العناصر الموجودة بالفريق قادرة على اسعادنا.
* مواجهة الاشانتي ستكون صعبة .
* الفريق الغاني سيرمي بكل أسلحته من أجل إبعاد الهلال .
* والهلال يملك أسلحة فتاكة قادرة على تحقيق الأهداف بإذن الله .
* الهلال رافع شعار الفوز (بره وجوة) .
* الفرق الطموحة هي التي تكسب رايح جاي .
* سيلعب الهلال مباراة ودية اخيرة أمام هلال كادوقلي .
* من خلالها ستظهر ملامح تشكيلة غانا .
* وأي تشكيلة سيقع عليها الإختيار سندعمها كامل الدعم.
* حالياً ما في لاعب في الهلال ما بقامة الهلال.
* كلهم بقامة الهلال .
* جيسي قدم أمس بعض من سحره ودشن أهدافه.
* ننتظر أن يسعدنا الساحر جيسي أمام الاشانتي بغانا.
* لا داعي للقلق لأن القادم أفضل.
* ونركب صافنات ونجيبة (عطبراوية) واصلو الزول بيموت والذكرى تفضل حية .
* و..و..
* ويمة الليلة الزول ما ورانا اسبابو …… (يعني البرد ما سبب ولا شنو) ؟
1- المريخ يا شاطر لولا اتحادك الفاشل قبل سنتين لما كنت معاهو في مجموعة واحدة في دوري الأبطال وغلبناكم 2/ صفر ومعانا النجم الساحلي وفيرافيارو تأهل المريخ لدور الأربعة وكانت المؤامرة الكبرى وتم تجميد نشاط الاتحاد السوداني لكرة القدم بفعل فاعل وصعد فيرافيارو مع النجم بدلا عن المريخ للأسف لأنو هلالك كان طيش المجموعة ودي زعلت ناس شداد وجماعتو
2- المباراة حقت الوحدات في بطولة ودية وانتهت 4/7 يعني وكنا فايزين 3 في السودان ولكن تعال على دوري الابطال نعيد ليك سلسلة سداسيات الترجي في الهلال وقال ايه في دوري الأبطال 0/18 في 3 مباريات مقسمة وموزونة 0/6 و0/6 و0/6 والصحفي المشى يشرب موية وخلاها 0/0 قال رجع لقى الهلال مضروب 6 ههه ولا خماسيات الوداد البيضاوي 1/10 مرتين 0/5 1/5 وهدافهم مصطفى بيضوضان البقى هداف أفريقيا من مباراة واحدة ولا خماسية مازمبي الشهيرة في المعبرة 1/5 كأكبر هزيمة داخلية ولا هزيمتكم وخروجكم مرتين أمام بطل الصومال وقد الصومالي والمرة التانية المطايع الصومالي ولا ولا ولا أحسن تسكت هس ولا كلمة
غلطان والله يا ابو وليد كان عليك تترفع ومآ تنزل لهذا المستوي وترد ( زمان جدتي ) حبوبتي بالدارجي السوداني قالت العاوز تهريه اسكت وخليه ،، ازيدك من الشعر بيت يجوز تكون انت من مواليد التسعينات أو قبل ذلك ،، الزمالك ده ضرب اهلنا بالعرضة شمال ٦/ ويومها جاتني نفسيات مش لأنه إتغلب لأن أحد مشجعي الزمالك زادني مغص بالتريقة علينا ما قال الهلال قال ايه ده دي فرقتكم بالسودان زعلت زعل ،، الله يرحمه اداني درس في الوطنية ..
هههههه هاااااا. ياود الطيب طلقت في ابو المستعار نارية وخليتو يهترش زي الراميهو جمل. غايتو الله يجازي صنف اليخماو العمل فيهم العمايل السوده دي. قال الوحدات بطولة ودية!!!! هههههه هاااااي الله يجازي اليخماو الخلي الجماعة ديل عايشين في هضربة دايمة. 😂😂😂
دوري الاربعة ده الدلاقين تاهلوا ليها مرة واحدة وكانت بصحبة راكب وهو سيد البلد وتلتها الثلاثية المازمبية الساماتية التي جعلت عمك تنقو يفيق من الهلوسة بروائح المطار. هسه المخدر ده عاوز يعملها مرتين. الله يشفيكم من اصناف اليخماو والمطبلاتية غايتو. لو عاوزين تزوير في الاحصائيات ابقوا شطار زي ابو شيبة خصيم الحكام ارجعوا تلاتين او اربعين سنة للوراء لكن مش معقول تزوروا في الماضي القريب.
اين تعليقي؟؟؟. بس تاركين ابو المستعار اتفسح براهو باحصائياته المضروبة. ماتخلونا نرد علي الهضربة والتزوير الناتجة من صنف اليخماو.
يعجبني اسلوبك كالعاده بس بتذكرني بالحاله صعبه واكل البوش بي موية الجبنه ..وطبعا اجمل مافي مقالاتك تبتدي بهموم البلد وده طبع جيد وتنتهي بهمك الكبير الزعيم والله انت زول تمام يا فرده بتنكت كتير والغريبه بتجيب اسماء فرق انت اتكويت منها ..ولكن هي الطرفه بطريقة تعليقك وهي مكاواه وطنيه بحته بس انت خليت المستخبي يطلع وهزايمك طلعت وبصراحه براك مشيت تهبش ..عموما انت الذ صحفي في صحفيو ناس 19 تحت الصفر وبنحترم فيك وطنيتك بس اعمل حسابك تاريخ فريقك ما يسر خليك ساكت بدل الاحراج
تحياتي يا صاحبي
الاخ احمد عبالله كريم الدين خالص تحياتي … للوطنية ولك العتبى ولكن الذي ده تقول فيهو شنو
عباراتك كلها كسيحه زى عنوان عمودك انته مين الاجاز ليك مهنة الصحافه عشان تكتب عن المريخ ياخى شخص الداء عندكم فى الهلال واترك المريخ الكاويكم جانبا