ماما أميرة وفرحة الهلال الناقصة !!
بالعربي الكسيح
محمد الطيب الأمين
ماما أميرة وفرحة الهلال الناقصة !!
* ظهرت (أميرة) وهي تبكي في (لايف) بعد أن طردتها دولة جنوب السودان من أراضيها.
* وأميرة هي إمرأة جنوب سودانية يطلق عليها أهل السودان إسم (ماما أميرة) .
* كل رأس مالها (شتائم وكلام فارغ وكمية غير عادية من الوقاحة وساقط القول وقلة الأدب) .
* الأوطان المحترمة لا تتشرف بالساقطين والساقطات ولذلك جاء قرار دولة جنوب السودان محترماً وشجاعاً .
* عكس ما حدث لهذه المرأة في شمال السودان .
* عندنا في الشمال استقبلوها استقبالاً لم تحظى به حتى أحلام مستغانمي عند وصولها مطار وطنها الجزائر بعد (غربة وشجن) .
* ناس (قريعتي راحت) ديل استقبلوها وغنوا ليها واتصوروا معاها وحاوروها.
* تشوف الواحد يحاور فيها وهو فرحان تحلف تقول بيحاور في (حنان النيل) .
* خفة ورشاقة وجهل غير عادي.
* هي إمرأة اشتهرت بسوء الألفاظ وقلة الأدب ، أنت حاورتها أو اتصورت معاها عشان عاجباك قلة الأدب ولا عشان هي نجمة في قلة الأدب؟
* الإحترام أنت البتجيبو لنفسك .
* وأنا والله زاد إعجابي بشكل غير عادي بدولة جنوب السودان حكومة وشعب .
* أنت البتحدد قيمتك وقامتك .
* أنت البتختار وتحدد داير تبقى من كبار القوم أو من صغار القوم .
* واميرة التي يطلقونا عليها (ماما) كشفت لنا كبار القوم وصغاره .
* أميرة ظهرت تبكي وتصرخ وتدعي حب وطنها .
* كل الألفاظ التي تطلقها دافعها الحب .
* طيب وقت (قلة الأدب) مبرر للحب مالو (قيس) ضيع زمنو في الغزل العفيف ؟
* عمرها ما كانت الألفاظ السوقية مبررة للحب .
* وبما أن ذلك كذلك فإن هنالك من يحبون الهلال على طريقة (ماما أميرة) .
* يكثرون من الشتائم والألفاظ ويقولون إن ذلك بسبب حبهم للهلال .
* والحب برئ من ذلك .
* قناعتي القديمة أن الهلال إذا اكتمل داخل الملعب لابد أن يكون ناقصاً خارج الملعب .
* يكون الفريق تمام ، تلقى مجتمع الهلال ما تمام .
* يكون مجتمع الهلال تمام يكون الفريق ما تمام .
* مكتوب علينا (الفرح الناقص) .
* الآن وبرغم أن الهلال يملك فريق محترم جداً إلا أن بعض الأصوات تنطلق هنا وهناك من أجل (تدمير ناعم) .
* واحدة من أهم مشاكلنا نحن كهلالاب هي أننا نختزل الهلال في مصالحنا الضيقة .
* أي زول فينا داير مصلحتو.
* لو اتعاملنا مع الهلال كحالة حب قطعاً لن نستغله لأغراض المصلحة الشخصية الضيقة .
* ولكن تجدنا نتعامل مع الهلال باعتباره سوق نجمع منه المال ونبيع فيه ونشتري.
* كبرنا وحاولنا نصغر الهلال .
* ولكن يظل الهلال أكبر من الجميع .
* وقناعتي أن ما يفسد ويعكر أجواء الهلال هم الإداريين العندهم قروش .
* ناس القروش ديل هم البيخلوا (النحل) يهجم على الهلال .
* محتاجون نحب الهلال بدون مصالح .
* نحبو عشان هو بتحب.
* نستغل قوة الهلال الجديد ونطرد كل زول داير يحب على طريقة (ماما أميرة) .
* أفريقيا كلها تتعامل مع الهلال باعتباره من كبار القارة .
* ولذلك يعملون له ألف حساب .
* يحترمون الهلال احتراماً لا يجده الهلال حتى عند الذين يحسبون أنفسهم هلالاب .
* الهلال حتى تاريخ اللحظة لم يستثمر (إحترام أفريقيا له) .
* أكثر ما يجب أن يتعلمه الهلال في هذه النسخة من دوري أبطال أفريقيا هو (أن يكون على قدر مكانته في أفريقيا) .
* أيام الكاردينال (هان الهلال وبالتالي كان سهل الهوان عليه) .
* اما الآن فلا يوجد ما يمنع الهلال من لعب دور الزعامة في أفريقيا.
* يملك الهلال فريق من ناحية عناصر يعتبر هو الأفضل على مستوى أفريقيا والوطن العربي .
* نخبة من نجوم وزحمة من مواهب .
* هذه العناصر بجانب الانسجام والتناغم تحتاج للثقة والإحساس بقيمة وقامة الهلال.
* لابد أن يتعاملوا بشخصية الهلال .
* وعشان يحسوا بقيمة الهلال لابد أن يكون مجتمع الهلال حاسي بقيمة الهلال.
* ما يدور خارج الملعب ينعكس داخل الملعب.
* قوة الهلال كفريق مستمدة من قوة الهلال كمجتمع .
* الهلال الجديد هو الأفضل خلال السنوات العشرة الأخيرة.
* وهو مؤهل لتحقيق كأس خارجي .
* لو ما السنة دي السنة الجاية .
* ولكن الكأس محتاج لرجال قلوبهم على الهلال .
* مش رجال قلوبهم على جيوبهم.
* محتاج لنوايا طيبة .
* نصبر ونشجع ونقول الكلمة الطيبة لأن هذه هي الأشياء التي تنقص الهلال .
* الهلال فيهو الغربال وجيسي وأبو عشرين .
* فيهو روفا وبشة الصغير ومجاهد فاروق .
* فيهو اوتارا وفيني وبوغبا .
* فيهو نزار والشغيل وصلاح عادل.
* فيهو أبو عاقلة ووضاح وعيد مقدم .
* فيهو سليم برشاوي وارنق ومنير .
* الجماعة ديل لو ما السوباط على بالنعمة في (بيت عرس ما يتقابلوا) .
* ما تفرطوا في الهلال الجديد .
* ما تضربوا الاستقرار بالنميمة والفتنة .
* ختوا الهلال فووووق عشان هو فعلاً فوق .
* و..و..
* والله في .
عندما تكتب بايجابية نقول لك أحسنت المقال والدعوة لما هو مفيد من وحدة الصف الهلالي ووقف المهاترات والمشاحنات.. وبالتأكيد ليس عليك اذا اردت مدح الهلال ذم الفرق الاخرى لأنه يدونها لا هلال ولا مريخ أنت يعجبك الهلال وهذا حقك وأنا مريخابي وهذا من حقي انت يعجبك الغربال وألشغيل وابوعاقلة وعبدالرؤوف وبشة ووضاح وبوغبا ومقدم والطيب ومجاهد وصلاح عادل وارنق وذلك لا يمنعني أن أذوب حبا في التش والعقرب والسماني والصيني وأمير ونمر ورمضان وبيبو وتيري وضباء الدين والتكت وكرنقو وعزام وسيف الدمازين ووجدي وكردمان وتمبش.