قزاز ورذاذ
محمد الطيب الأمين
محمود عبد العزيز وفيضان النيل البجيب (بوكسي) !!
* الفيضان .
* والفيضان إرتبط بـ(الأمطار) و(الخريف) .
* و(السيل) هو اسم من أسماء (الفيضان) أو العكس صحيح .
* نحن في الحياة العامة نحصر الفيضان في (الموية والخريف) .
* ولكن الفيضان ممكن يكون في أى حاجة .
* تعريف الفيضان هو : (الزيادة في الشئ دون الإرادة) .
* أو قل : الزيادة غير المتوقعة .. هذا هو تعريف الفيضان بحده الأدنى .
* ولذلك ممكن يكون هنالك فيضان في الحزن وفيضان في العاطفة والشوق وحتى الكراهية فيها فيضان .
* زيدان ابراهيم غنى : (يا المشاعرك فايضة رقة) .
* جميل جداً هذا التعبير .. (مشاعر وفايضة رقة) .
* والمشاعر يفترض تفيض مشاعر لكن عند زيدان إبراهيم المشاعر فاضت رقة .
* وهذا فيضان له فوائد .
* هسه النيل لما يفيض مرات ما بجيب موية .
* مرة النيل فاض جاب ليهو (خشب) و(تماسيح) و(براميل) .
* فاضت المشاعر وجابت ليها رقة .
* في مساحة اليوم يطيب لي ان اقف عند واحدة من اجمل الاغنيات السودانية .
* أغنية تمثل حالة فريدة من حالات الفرح والتعبير الصادق .
* أغنية كتبها الشاعر (إبراهيم محمد إبراهيم ) .
* هى : (لهيب الشوق) .
* إسم النص .. (لهيب الشوق) .
* والأسم في حد ذاته له (شنة ورنة) ولذلك الأخ إبراهيم كان موفقاً في إختيار الإسم لحد بعيد .
* اللهيب (حاجة ما كويسة) ، والشوق (حاجة كويسة) ، وربط اللهيب بالشوق أبرز قوة النص .
* قال : (فاض بي لهيب الشوق) .
* قوة النص وجماله زادته (حنجرة الحوت) قوة وروعة حتى صارت الأغنية (تاج على رأس) اغنيات الشباب .
* يقول إبراهيم في النص :
ﻓﺎﺽ ﺑﻰ ﻟﻬﻴﺐ ﺍﻟﺸﻮﻕ ﻭ ﻣﺎ ﻋﺎﺭﻑ ﺃﺣﻮﺍﻟﻬﺎ
ﺍﻟﺤﻠﻮﺓ ﺳﺖ ﺍﻟﻨﺎﺱ ﻳﺎ ﺭﻳﺘﻨﻰ ﻓﻰ ﺑﺎﻟﻬﺎ
* الذى يحس بالشوق يرجو ويتمنى أن يكون الطرف الثانى يشتاق له بذات الدرجة .
* يعنى القصة ما تكون شوق من (طرف واحد) .
* عشان كده إبراهيم بواسطة حنجرة الحوت قال : (الحلوة ست الناس يا ريتني في بالها) .
* (يا ريت) كلمة تفيد التمنى .
* وهو يتمنى أن يكون في بالها .
* هذا التمنى يكشف أن إبراهيم عندما كتب النص لم تتجاوز قصته العاطفية مرحلة (يا ريت) وهذا يؤكد ان العلاقة (برلومة) .
* علاقة جديدة تقف في حدود (التمنى) .
* وياتى فيقول :
ﻣﺰﺭﻭﻋﺔ ﻓﻰ ﺟﻮﺍﻯ وأنا ﺯﺩﺕ ﻓﻰ ﺷﻮﻗﻬﺎ
ﻣﺤﺮﻭﺳﺔ ﺑﻰ ﻳﺎﺳﻴﻦ وﻗﻠﺒﻰ ﻣﻌﺸﻮﻗﻬﺎ
ﺯﻯ ﻧﻔﺤﺔ ﺍﻟﻴﺎﺳﻤﻴﻦ ﺳﻤﺤﺔ ﻭ ﺳﻤﺢ ذﻭﻗﻬﺎ
* قال : (مزوعة في جواي) وقصد بذلك تضخيم مكانتها في القلب .
* وهذا تعبير يشبه : (جنبك ومشتهيك) و(أنت معاي وانا مشتاق ليك) .
* (مزروعة في جواي وأنا زدت في شوقها) مقطع يشابه المقطع الذى غناها محمود ويقول فيه (تمر الفكى السيدو شايلو ومشتهِ) .
* استفاد إبراهيم من الثقافة الدينية واستعان بـ(سورة يس) فمنحت النص جمالاً .
* محروسة بي يس وأنا قلبى معشوقها .
* والذى تحرسه (يس) يكون في آمان وفي حفظ الله ورعايته دون شك .
* ختم إبراهيم الكوبليه التانى بصورة جمالية قال فيها : (زي نفحة الياسمين سمحة وسمح ذوقها) .
* الياسمين هو سمح من حيث الشكل والمضمون .
* يعنى ما ممكن تلقى ياسمين شكلو حلو وريحتو كعبة .
* ما في .
* الياسمين حلو شكل وحلو ريحة .
* وهو شبه هذه الفتاة بـ(الياسمين) ليؤكد إنها (فتاة شكل ومضمون) .
* ويقول :
ﻟﻴﻪ ﺍﻟﺤﻨﻴﻦ ﺩﻓﺎﻕ ﻭ ﻗﻠﻮﺑﻨﺎ ﻣﺸﺘﺎﻗﺔ
ﻛﺎﺗﻼﻧﺎ ﺑﻰ ﺭﻳﺪها ﻭ ﻧﺤﻦ ﻋﺸﺎﻗﻬﺎ
ﺍﻟﺮﻭﻋﺔ ﺳﺖ ﺍﻟﻨﺎﺱ ﺣﺎﺭﻗﺎﻧﺔ ﺃﺷﻮﺍﻗﻬﺎ
* تدفق الحنان فيه تأكيد على فيضان الشوق .
* التدفق والفيضان هما (أخوان أولاد خالات) .
* والاستعانة بـ(التدفق) تؤكد إصرار الشاعر على تثبيت (فيضان شوقه) وهو أيضاً ظهر في قوله (قلوبنا مشتاقة وحارقانة اشواقها) .
* يختم إبراهيم النص قائلاً :
ﻧﺎﺭ ﺍﻟﻐﺮﺍﻡ ﻓﻰ ﺍﻟﺠﻮﻑ ﺯﺍﺩﺕ ﻟﻬﻴﺐ ﺍﻟﺸﻮﻕ
ﺍﻟﺮﻭﻋﺔ ﺳﺖ ﺍﻟﻨﺎﺱ ﺻﺎﺣﺒﺔ ﻣﻌﺎﻟﻰ ﻭ ذﻭﻕ
ﺯﻯ ﻗﻤﺮﺓ ﻓﻰ ﺩﻭﺭﻳﻦ ﻳﺎ ﻗﻤﺮﺓ ﻓﻰ ﺩﻭﺭﻳﻦ
ﺃﺻﻠﻮ ﺍﻟﺠﻤﻴﻞ ﻣﻌﺸﻮﻕ
* جميل جداً قوله : (نار الغرام في الجوف زادت لهيب الشوق) .
* والنار العندها لهيب هى زي (الحيطة الليها ضل) .
* نحن نعوذ بالله من النار العندها لهيب ولكن نستمتع بنار ولهيب الشوق .
* خلاصة القول عند إبراهيم هى : (زى قمرة في دورين) .
* بت عبارة عن (قمر 14) .
* التحية للشاعر الجميل إبراهيم وللملحن الكبير القديل وللاسطورة محمود عبد العزيز .
* لهيب الشوق أبدع فيها الحوت كعادته وجعل كل الشباب يحسون بالشوق حتى وإن لم يكن الشوق مشكلة عندهم .
* والجميل أن الأغنية تحظى بكل هذا الحب والاستماع في زمن (الواتس والفيس والاختلاط في الجامعات) .
* كل الأشياء والوسائل التى قتلت الشوق لم تقتل صوت محمود وهو يصدح بهذا النص الفاخر .
* تنويه .
* أرجو من القارئ الكريم الإشتراك في قناتي على اليوتيوب.
* سنقوم بتقديم عمل جديد على القناة خلال الأسبوع القادم ان شاء الله.
* للإشتراك تدخل اليوتيوب تكتب (قناة دقايق) تعمل إشتراك وأكون شاكر ومقدر ليك.
* و…. و…
* وليه الحنين دفاق و……….. (البراميل فاضية).
والله يا روميو عشان ما جبت سيرة مريخ هلال بشترك الان
اهو نعمل معاك صداقه مؤقته