صحيفة كورة سودانية الإلكترونية

مكاتب علي قارعة الطريق والشتل علي عينك ياتاجر

27

تغريده واتساب?
بقلم :معاذ ابومؤيد✍?
مكاتب علي قارعة الطريق والشتل علي عينك ياتاجر

همت سافر همت منتظر الحجز همت منتظر النثرية الجوازات جات من مصر للتأشيرة الجوازات مسافرة مع همت المريخ لاعب مباراة ودية مع فريق الانتاج الحربي لا مع التصنيع لا ما لاعب
بالله عليكم دا حال فريق عايز ينافس محليا ولا علي البطوله الافريقيه ولا دا حال مؤسسة رياضية عندها مجلس ادارة
لو الكلام الفوق دا حاصل يبقي علي المكتب التنفيذي يسلم اوراق استقالتهم اليوم قبل الغد
ولو الكلام الفوق دا ماحاصل يبقي علي المكتب الاعلامي تسليم استقالتهم وهم ماقادرين يعملوا منصة إعلامية الناس تأخذ الإخبار منها
ومخلين الشتل يكتر في القروبات
واكتر شي محير جايبين صورة عمنا همت و قدامه شنطة سفر ياخي معقولة وصل بينا الحال لحدي كدة
الجمهور في يوم ما ماكان يعرف الا البيان بالعمل والامور قدامه واضحة
الجمهور حاليا متوقع اي شي حتى السفر لنيجيريا ممكن ما كان يسافر الفريق لو لاقدر الله الجوازات ضاعت في السفر دا او حجزت بواسطه الشرطة المصرية او السودانية
وكيف فريق كامل جالس في مصر من غير اوراق ثبوتية
والمكتب التنفيذي السنة الفاتت نفس القصة في السفر للجزائر
السؤال الاختيار للمكاتب دي بتم بواسطة ولا كل زول معين قريبو
دي كلها ملفات مفروض تفتح بواسطة اعلامنا السلبي اعلام التحليل الفني
بدل تقعدوا تحللوا مباراة شوفوا المكاتب دي الحاصل فيها شنو والاخفاقات دي وراها منو نستفيد شنو من تحليلكم دا
شوفوا المفيد وابحثوا عن الطاسة الضائعة دي وفكونا من الغث البتكتبوه بعد المباريات وقاعدين تحللوا وشاغلين نفسكم بنقاط ما من اختصاصكم
انتم اعلام انتم السلطة الرابعة يعني تحاكموا المجالس والادارات علي اي تقصير عشان انتو في يدينكم القلم
فتشو علي الاخفاقات وعالجوها الجمهور صوتو ماواصل الا عن طريقكم انتو
انتهى زمن الصحف الورقية و الأعمدة الثابتة والعالم ماشي للإعلام الالكتروني
اطلعوا من عباءة الاسم والشخصية الانتو عايشين فيها
خلوكم مع الجمهور تكسبو لانو الجمهور والشفوت ديل عارفين خطط اللعب وعدد المباريات والاحصائيات الانتو بتكتبو فيها
الجمهور عايز الزبدة
ومكاتب مجلسنا ومكانب اتحاد كرة القدم كلها عايزه تصحيح عشان كدة من باب اولى مراجعة اعمال تلك المكاتب
قلناها للريس لكل زمان رجال ياريس
وحاليا نقولها لاصحاب الصحف لكل زمان اقلام
ماترقدو قفى علي كتاباتكم والتماثيل الصانعنها لانفسكم لانه لوعشتوا علي نفس الفهم القديم حتلاقوا الناس ملت
العصر عصر السرعة
والشفوت عايزين الصحفي المصادم
لو عايزين تحللوا قدامكم القنوات والراديو امشوا حللوا فيها
ختاما
لو مكاتبنا في النادي حتعيش بالفهم القديم والشغل التقليدي ارحلوا مع المجلس واركبوا نفس القطر
لأنه حاليا عصر العولمة وعصر المعلومة
ولو ماقادرين تستخدموا العولمة صاح وبطريقة مؤسسية اتركوا الفرصة للشباب المبدع في التقنية واكتفوا انتم بدور الاستشارات فقط

ارحمونا يرحمكم الله

ونحن علي المدرج ونتفرج بقينا نخاف من اخطاء المكتب التنفيذي اكتر من اخطاء الدفاع في الفريق
وبقينا نصنع الشتلة ونصدقها ونوزعها علي القروبات لأنه المكتب الاعلامي عندنا نائم نوم تقيل والمكتب الاعلامي مرات بشيل معلومته من الشتل الموجود في شبكات التواصل الاجتماعي
ويا شفوت خطوات تنظيم والتنظيم يبدأ من مدرجنا دا

 

تغريدة واتساب

قد يعجبك أيضا
اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد