صحيفة كورة سودانية الإلكترونية

منن والشيخ وحسن متوكل افتحوا عنبر الحوادث والحالات المستعجلة

1٬663

صابنها
منن والشيخ وحسن متوكل افتحوا عنبر الحوادث والحالات المستعجلة
محمد عبدالماجد
• الهلال بقى فيه ثري ميسي.
• او ميسي ثري.
• على وزن جيم ثري.
• شبع جد.
• كلمات والحان وأداء.
• كل هذه الاشياء كل هذه (الميسيات) اجتمعت بفضل الله وحمده ففي فريق الهلال.
• والله دي نعمة جد.
• اول مرة افهم قاعدة الف واو الجماعة.
• يعني جمع ميسي في الهلال ممكن نقول عليه (ميسيوا).
• يا جماعة من الليلة بختصر ليكم اباذر ميسي وعثمان ميسي وحسن ميسي في (ميسيوا).
• والله الهلال مفترى.
• ميسى ذاتو عملوا جمع.
• بزار شديد.
• افراط في الميسي.
• اسراف في ميسي.
• دي في الارجنتين بلد المنتج ما بتتلقي.
• ميسيوا.
• واحد.
• اتنين.
• تلاتة.
• ليس مرة واحدة.
• ولا مرتين.
• بل ثلاث مرات.
• ميسي الثالث في الهلال اللاعب حسن متوكل والذي اعلن عن التعاقد معه امس العليقي في قناة الهلال سوف يكون ان شاءالله اضافة كبيرة للهلال.
• انتظرت الاعلان عن الصفقة رغم معلوماتي عن التحركات والمفاوضات التى قادها محمد ابراهيم العليقي مع اللاعب ولكن نسبة لسرية العميلة انتظرت الاعلان الرسمي عن الصفقة للكتابة عن حسن متوكل ميسي.
• قلت ليكم في ميسي ثالث في الطريق.
• قعدتوا تغالطوا – وعملتوا فيها ما سمعتوا شيء.
• الموضوع بقى فيه اباذر ميسي وعثمان ميسي وحسن ميسي.
• برشلونة بفتش ليه عن (ميسي) واحد – الهلال بقى فيه (3) ميسي.
• دي باريس سان جيرمان ما بلقاها.
• ولا بحلم بيها.
• ميسي واحد عمل لي كرنقو وطبنجة وامير كمال لفة رأس وفلايت وبامية مفروكة …(3) ميسي يعملوا ليهم شنو؟
• انا قلت بامية مفروكة؟
• ما تقفوا في الحتة دي.
• مشوها.
• من ميسي لي ميسي لي ميسي.
• دي زي الزول الطلع من امتحان الرياضيات دخل ليه في قندران.
• يا طبنجة شوفوا ليكم بلد.
• كلم امير كمال يشيل دفتر العيادة.
• تاني الواحد فيكم لو صنقع ساكت بلقى الكورة في القون.
• (3) ميسي دفاع مانشستر سيتي ما بقدر عليهم.
• ثنائي العاصمة من كلمات الدكتور علي شبيكة بغنوا (عجوة معطونة بي عسل).
• اها الكلام دا اصبح واقع في الهلال.
• (3) ميسي ممكن يكونوا جرعة للتطعيم ضد الكورنا.
• (3) ميسيات بشيلوا الملاريا.
• المدرب ممكن مراعاة لحالة الخصوم يلعب في أي مباراة بي ميسي واحد.
• ميسي عند اللزوم.
• ميسي واحد يكفي.
• كرنقو لو نسى اسمو ما في زول يزعل منو؟
• اعرف ان هناك بعض المواهب التى اتفق الهلال معها ومع الاندية التى تلعب لها وابقى عليها الهلال في انديتها.
• هناك عددا كبيرا من المواهب التى اتفق معها الهلال دون ان يدخلها بشكل رسمي في كشوفات الفريق.
• لهذا اقول لا بد من عودة عبدالصمد منن الذي كان يلعب في فريق الميرغني كسلا بعد الاتفاق الخارجي مع النادي واللاعب في التسجيلات الماضية.
• عودة عبدالصمد منن مهمة مع كمية الميسي البقت موجودة في الهلال – الهلال في حاجة الى اللاعب (المهاري) العملة النادرة في كرة القدم – اللاعب الذي يجعل للكرة متعة.
• لاعب الازقة الضيقة مهم في التشكيلة.
• كذلك مهم ان ينضم اللاعب منن للهلال حتى يستفيد اللاعب من امكانيات الهلال ومن الجهاز الفني الذي يقود الهلال.
• لن تتوفر للاعب عبدالصمد منن الظروف التى يمكن ان تتوفر له في الهلال – لذلك اى محاولة لتسجيل اللاعب في نادي اخر وان كان ذلك على سبيل الاعارة امر مرفوض ولن يجن منها الهلال شيئا.
• اعتقد ان اللاعب عبدالصمد منن قادر على ان يفرض وجوده في الهلال…نحسب للجنة التطبيع والجهاز الفني للهلال مواصلة اللاعب تمارينه في الهلال في انتظار الاعلان الرسمي للتعاقد معه.
• نسأل الله ان يتم لنا ذلك.
• مهم ان يلعب منن تحت الضغط الاعلامي والجماهيري وان يلعب بجوار الشغيل والغربال وياسر مزمل – هذا الامر لن يتوفر للاعب منن في أي نادي اخر.
• خلوه يلعب مع حسن متوكل وعبدالرؤوف والشيخ ح تشوفوا العجب.
• لهذا نشدد على التعاقد مع اللاعب عبدالصمد منن والذي يمكن ان يكون محمد حسين كسلا اخر او الطاهر حسيب وهو يأتي لنا من شرق السودان الحبيب.
• شرق السودان عندما يقدم لاعب كرة يقدمه بموهبة كاملة – فعلها الشرق مع محمد حسين كسلا ومع الطاهر حسيب وعبدالرؤوف يعقوب. واظنه سوف يفعلها مع اللاعب عبدالصمد منن.
• الناس لا تنسى كذلك اللاعب هاشم كجر الذي كان موهبة يطرب الناس لها مثل كجراي والحلنقي وابراهيم حسين وصالح الضي وعبدالعظيم حركة والتاج مكي.
• في الهلال هناك عناصر خاملة – لم تقدم ما يشفع لها للبقاء في كشوفات الهلال.
• اللاعب الذي لا يفرض نفسه ولا يشارك مع الفريق وجوده في كشوفات الهلال امر لا جدوى منه.
• نسبة مشاركات اللاعب في المباريات امر مهم للغاية – يمكن ان يكون اللاعب جيد وموهوب لكن اذا كان لا يشارك في المباريات ولا يلعب للفريق يبقى لا جدوى من وجوده.
• في برشلونة وفي ريال مدريد يمكن الاستغناء من لاعبين كبار اذا لم يشاركوا مع الفريق ولم يثبتوا وجودهم حتى بعد ان صاحب انتقالهم للفريق ضجة كبرى وكلفوا خزينة النادي الكثير.
• الفيصل يرجع الى نسبة المشاركة.
• عبدالصمد منن قادر على ان يثبت وجوده – لذلك نحتاج الى قرار شجاع من الجهاز الفني للهلال ومن لجنة التطبيع بتسجيل اللاعب والاحتفاظ به في كشوفات الفريق وليس في نادي اخر.
• كذلك اسعدتنا عودة الشيخ محمد وهو لاعب يحتاجه الهلال اذ يفتقد الهلال لاختصاصي الضربات الثابتة.
• سوف يكون للضربات الثابتة بما في ذلك الضربات الركنية شكلا اخر في وجود الشيخ وسوف ترتفع نسبة الاهداف من الضربات الثابتة في وجود هذا اللاعب.
• هذه الاسماء مع حسن متوكل الذي اعتبره المكسب الحقيقي في التسجيلات يمكن ان يحدثوا العجب في الهلال – حسن ميسي لاعب يلعب في عدد من الخانات ويمتلك يسارية ساحرة.
• الهلال كسب لاعبا يجعل المدرجات تمتلئ من عصر بدري.
• سوف ترجع الصفوف.
• ليس في المخابز وطلمبات الوقود وإنما في مباريات الهلال.
• هذا الثلاثي (الشيخ ومنن وحسن متوكل) في وجود عبدالرؤوف وعثمان ميسي واباذر ميسي سوف يحولوا حفلات نادي الضباط الى استاد الهلال.
• المتعة سوف تكون حاضرة في كل مباريات الهلال.
• طبعا هذه المواهب في حاجة الى عناصر تمتاز بالقوة والحركة مثل الشغيل و صلاح عادل وابوعاقلة ووالي الدين خضر ويمكن ان نقول وجمعة قلق كذلك.
• اضف الى هذه الاسماء اللاعب جمعة قلق الحيوية والنشاط واللاعب الذي طلبه ريكاردو بالاسم وظل مراقبا له لمدة 3 اشهر.
• يعني الهلال ما ح يكون عندو أي مشكلة.
• القوة والمهارة حاضرة في الهلال.
• في الهجوم تم ضم لاعب يمتاز بالقوة والسرعة وهو اللاعب مبارك عبدالله (سيل الوادي المنحدر) ليكون الى جانب الغربال وياسر مزمل وبقية العقد الفريد في هجوم الهلال.
• المجاملات والعواطف في كرة القدم لا تنفع.
• هناك عناصر في الهلال اخذت الفرصة الكافية ولم تثبت وجودها واعتقد ان الفرصة يجب ان تتاح لهذه العناصر الصغيرة والموهوبة والتى يحتاج لها الهلال.
• الهلال طبعا اكمل اتفاقه مع الحارس اسحاق ادم وهو الحارس الافضل في الساحة الآن.
• اسحاق لاعب صغير في السن ولعب في كل المنتخبات ويمتاز بالأخلاق الرفيعة والانضباط التام والقامة الطويلة.
• في وجود هذه الاسماء لن يكون هناك خوف على الهلال وسوف يكون الهلال آمن الفريق لمدة (5) سنوات قادمة.
• مساعد رئيس الهلال الفاضل التوم الى جانب النشط الذي يعمل في صمت وهدوء محمد العليقي اتمنى منهم الحفاظ على الشيخ ومنن بعد التسجيلات التى اكتملت وتم الاعلان عنها.
• الطاهر يونس مع عبدالمهيمن الامين تميزا بالشجاعة واتخاذ القرار الصاح لذلك تمت اضافة عناصر قوية للهلال في التسجيلات الماضية جعلت الهلال يظهر بهذا الشكل حيث عاد لقب الممتاز بعد غياب ثلاث مواسم وبفارق (11) نقطة وبعد الانتصار على المريخ الذي كان هو الاخر عصيا على الهلال.
• منن لا بد ان يدخل رسميا لكشوفات الهلال.
• التفريط في عبدالصمد منن سوف يكون جريمة في حق الهلال.
• مدرب الهلال ريكاردو اثنى على (حسن ميسي) واشاد به واعجب بمهاراته العالية.
• اقسام الحوادث والطوارئ سوف تكون جاهزة لاستقبال الحالات المستعجلة بعد ضم هذا الثلاثي للهلال (الشيخ ومنن وحسن ميسي).
• ……
متاريس
• الطاهر يونس ظهر امس مع ابوعشرين.
• والرسالة وصلت.
• امسكوا الخشب.
• اقفلوا الفيس.
• استاد الهلال بقى حاجة روعة.
• الفيس قفل.
• والواتس قفل.
• والشرق قفل.
• يا ناس الهلال ألحقوا السيستم ..قبل ما يقفل.
• احسموا لينا صفقاتكم من بدري.
• خير البر عاجله.
• الناظر ترك قالوا بفكر يقفل السيستم.
• اصلو الحكاية سائبة.
• هملة بس.
• شفتوا ضربة مبارك عبدالله (سيل الوادي المنحدر) عملت شنو؟
• ادوار سادمبا اشاد باللاعب مبارك عبدالله وقال عنه لاعب جيد جدا (Wow very good player)..اتخيلوا سادومبا عندما شاهد فيديو للاعب قال (واو)…سادومبا اتهجم وعلق (What a good player).
• هسع دي يا مبارك (سيل الوادي المنحدر) بتلقاها في المريخ؟
• …..
• ترس اخير : ناس المريخ قرروا يصعدوا (مرفعين) وكولينا وزرقة ويعرشوا على كدا.

قد يعجبك أيضا
6 تعليقات
  1. خالد يقول

    عليك الله الشيخ شنو ومتوكل شنو
    وانت في شنو والناس في شنو
    انت الزول الوحيد في السودان الشغال بالشغلة البسموها كورة دي
    شكلك مرتاح وبالك رايق

  2. فيصل جمال الدين يقول

    ههههه كتاكيتي كتاكيتي في العش تركتهم وجات القطة تيتي كلتهم كلهم.. صدقني إعادة لعمودك من زمن ايشيا وموكورو وعمودك الفات يوم تسجيل عبدالرؤوف وجيسي لاست الصاقعة ههه واليوم انت سعيد بهزيمة المريخ التي تعتبر الفرحة الوحيدة الذين لم يزورهم الفرح وما بيعرفوا فرح غير هزيمة المريخ وطبعا سيل الوادي المنحدر سيجرف احلامكم قريبا واذا انت منتظر ناس ميسي واطاتك اصبحت دي كتاكيت مش حمل بطولات افريقية ومنافسة ممكن صالات خماسبات واستعراض لكن مع العمالقة ما اظن.. ألعب على سطور الأعمدة اصلوا اللعب ساهل والإسعاف في انتظارك قريبا ان شاء الله. وانتظر ما بعد زرقة وكولينا الغريق قدام والنشوف يا عشمان صاحب القلاب القلت جبت الزيت. والزيت عندنا نحن يا.. بس اول يختانا الديناصور الحاقد وحاتشوف يا عشمان هههه لكن ما جبنا الزيت الاصلي ههههه

  3. صلاح يقول

    طبعا كلام ذي ده يا ود عبد الماجد بيسخن بالصبي العجوز مستعارخي ويخليه يجقلب من الغيظ، المسكين شايف المكنة بي جاي في الجوهرة ماشاء الله مدورة والحفرة العميقة تكسوها الكآبة وتشتعل فيها النيران والحسرة حارقة فشفاشة وما قادر يتنفس…..
    أديله يا ود عبد الماجد يا كايده 😝😝😝

  4. دلدوم يقول

    انت حتسجل كم لاعب؟ كل سنة كدة والنتيجة صفر كبير ….تبيعون الوهم للجمهور المسكين….قال ميسي قال…..هلالك فالصو يا زول نمر من ورق منفوخ …..علي بالطلاق السنة الجاية حتكتب بنفس السيناريو سجلو فلان وجيبو فلان …..مافيش فائدة يا صفية…..

  5. Adli يقول

    انت يا زول ما بتوب من القشخره حقتك دي هههههههه كل موسم تسجيلات بتكرر نفس الجمل والكلمات وفي الاخر تجي تبكي

  6. احمد التجاني يقول

    طبيعي يا أستاذ محمد انو ناس قريعتي راحت ما يعجبهم كلامك دة. الناس لابد تفكر في المستقبل ومستقبل الهلال في ميسي واباذر ومنن وشيخو. انا خايف الهلال يسجل سيف تيري ودة لو حصلت العيادات حتتملي يا ود عبدالماجد وحتصل ازمة في البلد في حبوب الاسهال.

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد