موت الجماعة عرس وخلو الكبار معانا في نفس السرج
تغريده واتساب?
بقلم: معاذ ابومؤيد✍?
موت الجماعة عرس وخلو الكبار معانا في نفس السرج
الناس كلها شافت النفرات وشافوا التكاتف الحصل لاعمار الدار شباب مجنون بحب الزعيم ختو الكوره واطة واشتغلوا بلغة العسكرية بيان بالعمل
واعادوا الحيوية للدار وفي ناس منهم خلو عملهم وبقو ساكنين في النادي عديل لو مريت الصباح تلاقيهم بشربوا في الشاي ولو جيت المساء تلاقيهم قاعدين
الناس انجزت المهم وباقي الاهم
الاهم بعد دا لقاء جااامع لكل الاعضاء وكل القروبات في دار النادي ومعاهم ناس التسيير وناس الشورى وكل شخص يهمه مصلحة الكيان ما يجينا زول عنده مصلحة شخصية ولا عايز يشخص علينا عشان ما حيلاقي الا الشفوت واقفين الف احمر
الدعوة عشان مباراة العبور الاولى عشان نحن السنة دي كل مباراة عندنا حتكون مباراة عبور و مباراة نهائي مبكر واجتماعنا للتجهيز لمباراة الرد
والناس لم تجتمع واليد تبقى واحدة ومن دار النادي بعد التجديد تنطلق شرارة مجلس الجمهور المريخي الحلم الاكبر مجلس الجمهور المريخي دا النواة للمجلس الاب دا مجلس الشفوت الماعندهم مصلحة غير حب المريخ ديل القلبهم علي الزعيم مش قلبهم علي جيوبهم ولم كبارنا ناس الشورى يكونوا قاعدين ممكن نفتح باب التبرعات عشان كبارنا ديل عايزين يشاركونا الفرحة
محتاجين ناس القروبات ديل يتعارفوا ويوحدوا الكلمة عشان في مباراة الاياب يتوحد التشجيع عشان مايكون في نصنا متخازل و الحناجر والهتافات تتوحد ونضمن التيفو ينجح وكل زول يكون عارف دوره شنو
الجهود دي محتاجة تتقنن بدل كل زول مجهودوه براه
ماتخلونا مشتتين ذي الركشات في السوق خلونا نكون اسطول متوحد الالوان
عشان الداخل الاستاد تاني يخلي جلابيته في شماعة بيتهم ويجينا بالاصفر والاحمر
انجزتوا المهم لاذم تنجزوا الاهم الاهم التجهيز للحضور لمباراة الاياب عشان عندنا تيفو والتيفو مابنجح الا بحضور الناس وعشان الناس تتلم لاذم لقاء جامع في دار النادي بعد التجديد والديكورات الاتعملت دي
لاذم كبارنا يعرفوا انه في شباب قلبهم علي الزعيم وعشان يعرفوا انه خلفوا وراهم رجال يسدو عين الشمس ويطمنوا انه المريخ في ايدي أمينة
وعشان ناس المصالح وناس المنفعة يعرفوا انه الشفوت واقفين ليهم بالمرصاد
الرسالة لمشرفي القروبات اتجمعوا في دار النادي وارموا بذرة مجلس الجمهور عشان ترتاحوا لقدام ويكون الشغل مؤسس وكل زول عارف مهمته
وبدل نصفق بيد واحدة نصفق بيدينا كلنا
ختاما
مجلس الجمهور اولى خطوات النجاح للقادم والقروبات لم تجتمع في وعاء واحد كل فكرة حتكون واقع معاش
ونحن علي المدرج ونتفرج ومحتاجين نكون في المدرج اسرة واحدة وعارفين انه عندنا مجلس جمهور يوصل رسالتنا للجميع
وعشان يحصل دا لاذم اللقاء الجامع في دار النادي
وياصحفنا بدل التحليل الفني واخبار التشكيلهة ومسمياتها خصصوا صفحة للدعوة للاجتماع دا وخليكم مساهمين في الدعوة دي باقلامكم وساعدوا الشفوت ديل
القادم محتاج للتكاتف وعشان يحصل دا لاذم يكون الشغل منظم
وخطوات تنظيم لكل الشفوت
ومدراء القروبات اتوحدوا تحت راية واااااحدة عشان باكر وعشان المريخ يصبح قوه ضاربه من المدرجات وانت ماشي
واللمة حلوة في مجتمع المريخ
والزعيم عالم جميل …….