صحيفة كورة سودانية الإلكترونية

ناس للنادي تقشقش وناس عايزه في المناصب تكنكش

67

تغريده واتساب?
بقلم : معاذ ابومؤيد

ناس للنادي تقشقش وناس عايزه في المناصب تكنكش

لم تمضي اقل من اربعه وعشرين ساعه الا ويثبت الشفوت والالتراس والمحبين انو همهم الكيان مافتشو ليهم لشهره ولا عايزين منصب وكرسي
مريخ شاخور جاري في دمهم عشقو الكيان واتنفسو العشق شباب زي الورد تفتخر تكون في نصهم وتكون واحد منهم مااحبطهم التعادل ولا خساره النقاط ولاعارفين انو الفريق الليله لقاهره المعز سافر وفات بدخلو المباريات يلهبو الحماس والليله منظر النادي حرك اياديهم بدل نفراتهم للتشجيع اتجمعو للصيانه والنظافه والمنظر العام
عشان كدى قلنا ليك ياريس مفروض تاخد جوله حول النادي وتشوف الفرق بين المحب والمصلحجي وبين السمسار والمريد الولهان شباب واطفال ونساء ورجال
معقوله ناس ماوقفهم عن العمل الا الصلاه ماحسو بالوقت وتداخلت عليهم مواعيد الوجبات الفطور بقى غداء ماغداء عمل ولا مطعم فاخر غداء شفوت طرحت البركه فيه لانهم هدفهم وااااحد وشعارهم واحد
بالله ناس الكنكشه مابخجلو وناس المصالح بتاعين السمسره مابخجلو يسمسرو في عرق التعابه وجايبين ليهم محترف اسمو في شيخ قوقل لم تكتبو قوقل زاتو بدل تسالو يسالك يقول ليك انت متاكد من طريقه الادخال لاعب قاعد في الكنبه لم اتلصقت فيه اصلا هو حجم عائلي كمان مع الكنبه بقى دولاب وكنبه
اسه السمسار دا في شارع العرضه ساكت مفروض يجي ماشي بالله ضميرو ميت للدرجه دي ونفسو مفتحوه ياكل من صهر الرجال مفتكره شفتنه ولامفتكرها فهلوه عالم غريبه لابحسو ولابهشو ولابنشو قاعدين لينا في حلوقنا وانفاسنا الدخلهم المجال الرياضي شنو الله اعلم
ناس مابتفرق بين المريخ وصحانه الاكل عايزه تلهط وتاكل وتبلع وتسمسر ياخي سمسرو ليكم في ارض صالحه بدل تجيبو لينا ارض بور
معقوله ياساده نلعب ناقصين ٣خانات بسبب اخطاء اداريه ٣خانات قاعده ومدرب ماقادر يتصرف فيهم طيب كان تصعدو فيهم من الرديف ممكن يطلع لينا ابراهومه جديد ولاخالد ودالمصطفي جديد
اصلو الرديف رميتو طوبتو بدل لاعبينكم يتسربو من بين ايديكم لفرق تانيه خلوهم يطلعو في الكشف الفوق
وحبيبنا طارق المعتصم مامعروف استقال ولاقاعد يعني الراجل اجتهد وماقصر معقوله المساعده تجيه من القروبات وانتو ماقادرين تساعدوه ماقادر تاسسو للمستقبل حنقعد نستورد زي كريم الحسن دا وبالدولار
شفت ياريس القروبات مامقصره مع ناس الطاسه الضائعه لكن هم مقصرين معانا ومع اللاعبين ديل من شده مامقصرين ناسين اسماء اللاعبين وماعارفين مصعب من حاج موت بالله مصعب دا بتنسي لو مصعب ماشفتوه علامه الصلاه ساكت مفروض تشوفوها كشفكم يمشي ناقص ليه والسبب شنو وليه ابوجريشه فقط من يتولى امر السفريات والمعسكرات اسه قعدتو امبارح في كنبه الاحتياطي دي مابتشبه قعده بيتوركا بتاع اتحاد جده قعده كلها سلبيه واحباط تقول نحن مهزومين مهتم بموبايلو اكتر من الفريق
كل مايصبح صباح ننتظر بيان من المفوض لاعلان الجمعيه العموميه
عشان المركب الوزن زايد فيها وخايفين من الغرق ياناس المفوضيه المريخ دا فريق سوداني ووضعو ماعاجبنا ولجنه التسيير زاتها خلاص شكرناهم ووصلناهم الباب ماتخلوهم يرحعو معانا لجوه تاني
الكنكشه في المناصب ماسمحه وماحبابه العمل العام يحتاج القبول والشارع المريخي شكى لطوب الارض ومافي قبول كنكشتكم دي تخصم من رصيدكم
ياناس التسيير
والسمسره برضو ماسمحه لمن تجيب مقاسات الحجم العائلي
اسه النادي ينادي وانتو لحياه لمن تنادي
ماعارفنكم سامعين ولاعاملين رايحين
قلناه ليكم زمان ياناس التسيير شغله رزق اليوم باليوم في الكوره مابتنفع نحن مالعبين لينا دافوري ولادوري حواري المهمه اكبر منكم لاحافظتو علي المكتسبات الفاتت ولاحافظتو علي الانضباط في الفريق
اها اتعادلتو والكرسي بدا يترنح تحتيكم قبل الكرسي ماينكسر احسن تسلموالكرسي للشفوت والمحبين عشان يقررو القادم منو
والقادم معروف للجميع لكن قدومو المره دي بفهم الشفوت يعني الناس استوعبت الدرس تماما الجاي دا جاي بفهمنا وباسلوبناعشان مايتلم الناموس حول الفانوس والناموس معروفين للجميع ناموس ينوني في اضنينا ليه سنين عزبنا حمانا القعده في الاستاد وحمانا الجيه للنادي عشان كده جينا بمقاشيشنا عشان ننضف والكنس الجاي لناس المصالح ولي اطفال الانابيب العارفين نفسهم اصلو ريحتهم فاحت وتصرفاتهم ظاهره للجميع
عايزين نعرف المشكله شنو لوعجلتو بالجمعيه العموميه والله الناس تقدرها فيكم وتكونو خليتو زكرى طيبه في نفوس الناس والناس تطرااكم بالخير
وتنفعكم في المستقبل لو الزمن جار بيكم تلاقو دعوه الشفوت حافاكم ومحصلاكم
احسن ليكم الدعاء من الدعاء عليكم

ختاما
من لايشكر الناس لايشكر الله

نشكر مجموعات الواتساب المريخيه جميعها دون استثناء عشان ماننسى مجموعه وتزعل علي مجهوداتهم في النادي
نشكري استاذه سعديه والبصري وحسن الوسيله المسؤولين الخلص الحضروعلي حساب اسرهم عشان يكونو وسط الشفوت ويدعموهم
شكرا مريخاب للابد شكرا التراس الاسود شكرا التراس رد استار شكرا طيف المريخ شكرا مريخاب اسياد بلد شكرا قروب حفيدات خلف الكيان
انتم جميعا ترفع لكم القبعات
انتم من علمتم الناس حب الكيان
وحب الزعيم
اصلو حب الزعيم لم يجري في الدم مابعمل عمائل وبعمل كاروشه ويخليك ماتفارق شارعه العرضه

ونحن علي المدرج ونتفرج ومنتظرين باقي الشفوت كل زول من الجماهير يشارك حتي لو بالمجهود المريخ مريخ الشعب مريخ الجميع
ماتهتمو للايام ظروف وتعدي طبيعه الدنيا زي الموج تشيل وتودي
ونحن عايزين الموج دا يشيل اصحاب المصالح والمنتفعين من ضهر الغلابه الناس العارفين نفسهم بؤره فساد وعكننه
الناس تتفائل بالخير لتجده
والتحليل الفني الفي القروبات والمجموعات مابيخدم القضيه وغدا لنا عوده لماذا تلعب الفرق بكامل طاقتها امام المريخ وتلعب بكل انهيار واستسهال امام الند التقليدي
عشان نكشف الاوراق ونكشف نقطه الضعف عندنا

نسال الله الشفا العاجل لمرضانا وربنا يعجل الشفا لاستاذنا اسماعيل حسن

فتناكم عااااافيه

 

تغريدة واتساب

قد يعجبك أيضا
اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد