نجوم في إسطنبول .. الجاتكم في مالكم سامحتكم يا (أولاد الشيخ) !!
بالعربي الكسيح
محمد الطيب الأمين
نجوم في إسطنبول .. الجاتكم في مالكم سامحتكم يا (أولاد الشيخ) !!
* كثير من الأصدقاء يضعونا في مواقف بايخة أحيانا.
* قول لي كيف ؟
* قبل رمضان وأنا في باب الصحيفة قابلت صديق (عزيز وقديم) .
* صديق وأخ جميل يحب (الشمارات) زي حب الصائم للبطيخ.
* وبعد السلام بالكوع والبوع _ خوفا من كورونا _ دخلنل في الموضوع .
* قال لي رأيك شنو في النجوم السافروا تركيا ؟
* قلت ليهم ياتو نجوم ؟
* قال لي نجوم السودان سافروا تركيا لإنجاز برنامج تلفزيوني.
* قلت ليهو ما عندي فكرة لكن كده اشرح لي .
* قال لي في أخوان (محمد وإبراهيم الشيخ) رجال أعمال قدموا دعوة لحوالي (٣٠) نجم سوداني لزيارة تركيا بغرض تسجيل برنامج لصالح قناة النيل الأزرق.
* قلت ليهو رجال الأعمال ديل (شايتين على وين) ؟
* قال لي شباب ما مشهورين لكن عندهم شركات وكده .
* قلت ليهو لو بشتغلوا في النضيف الله يوفقهم إن شاء الله ، ولو بشتغلوا في الوسخان الله يوفق وجدي صالح .
* طيب النجوم السافروا منو ؟
* ومخرج البرنامج منو ؟
* قال لي النجوم كتاااار لكن المخرج أبوبكر الشيخ.
* قلت ليهو دقيقة .. أبوبكر الشيخ ده مش كوز ؟
* قال لي ما بعرفو والله .
* قلت ليهو أنا ذاتي ما بعرفو لكن سمعت إنو الكيزان كانوا عايزين يدوهو وزارة زي روضة الحاج وأبو هريرة حسين .
* سمعت كده .
* وبرضو سمعت إنو في عهد الكيزان كانت ماشة مع أبوبكر عسل عديل .
* طيب خليك من أبوبكر ، النجوم ديل فيهم ود اللمين؟
* قال لي : لا .
* فيهم سلمى سيد ؟
* قال لي : لا .
* فيهم أبو عركي البخيت ؟
* قال لي : لا .
* فيهم أزهري محمد على؟
* قال لي : لا .
* فيهم عفاف حسن أمين؟
* قال لي : لا .
* فيهم نانسي عجاج ؟
* قال لي : لا .
* فيهم سعد الدين حسن ؟
* قال لي : لا .
* فيهم عوض احمودي ؟
* قال لي : أيوة عوض معاهم .
* قلت ليهو عوض نجم ما في كلام.
* طيب فيهم جمال حسن سعيد ؟
* قال لي : لا .
* فيهم هيثم مصطفى .
* قال : لا .
* فيهم العجب؟
* لا.
* فيهم مهند الطاهر ؟
* لا .
* من الرياضيين فيهم منو طيب ؟
* قال لي عبد الحميد السعودي .
* قلت ليهو عبد الحميدي السعودي بتاع المريخ ؟
* قال لي : ياهو ذاتو.
* قلت ليهو عبد الحميد السعودي لما كان بيلعب في المريخ ما كان نجم ، معقولة بقى نجم بعد شطبه بعشر سنوات؟
* طيب .. فيهم محمد موسى بتاع النكات ؟
* لا.
* فيهم جلواك ؟
* قال أي.
* نعم جلواك نجم ما قلنا حاجة .
* فيهم ترباس ؟
* لا .
* أحمد الصادق .
* لا.
* حسين وطه؟
* لا.
* ندى القلعة ونضال الحاج ؟
* قال لا .
* قلت ليهو من (الشاعرات) ساقوا منو ؟
* قال لي داليا الياس .
* قلت ليهو داليا ساقوها عشان شاعرة ولا عشان اتكلمت في الفحولة ؟
* سكت ما رد علي
* طيب فيهم إنصاف مدني ؟
* قال لا .
* طيب يا ود الناس (أولاد الشيخ ديل ساقوا منو طيب) ؟
* المهم .
* الحوار ده دار بيننا قبل رمضان ، وأول أمبارح هذا الصديق اتصل علي وسألني عن انطباعي عن البرنامج.
* قال لي : شفت نجوم في اسطنبول؟
* قلت ليهو : شفت إسطنبول.
* والنجوم ؟
* قلت ليهو : النجوم يمكن يجيبوهم في العيد .
* قال لي طيب رأيك شنو في غزل برهومي مع البت التركية ؟
* قلت ليهو : الرشاقة هي الأخت الصغرى للهبالة.
* قال لي : طيب رأيك شنو في إسطنبول وفي البرنامج ؟
* قلت ليهو داير الصراحة ولا بت خالتها ؟ قال لي قول الصراحة.
* قلت ليهو أنا لو كنت سيد القروش بسوقو الجماعة ديل بوديهم خزان جبل أولياء أو ود العقلي .
* ولو جاملتهم بوديهم شارع النيل .
* إسطنبول شنو كمان .
* أدفع سبع سنين من عمري وأعرف (أولاد الشيخ) استفادوا شنو من إنتاج برنامج لم يشاهده حتى أصدقاء هؤلاء النجوم ؟
* لا في ترويج للسياحة ولا يحزنون.
* غايتو يا أولاد الشيخ الجاتكم في مالكم سامحتكم.
* ويا أستاذة : أولاد الشيخ لازم يطلعوا ذكاة الفطر برضو .
* و..و..
* ويا الله مطرة .