صحيفة كورة سودانية الإلكترونية

نزار والثعلب .. رز لاصق في الحلة !!

44

بالعربي الكسيح

محمد الطيب الأمين

نزار والثعلب .. رز لاصق في الحلة !!

* يعتبر (الخشب) هو الغذاء الرئيسي لـ(الأرضة) ..

* (الخشب الخام) بالنسبة لـ(الأرضة) مثل (الفول) بالنسبة لينا ..

* و(دولاب الخشب) بالنسبة لـ(الأرضة) زي (التفاح) عندنا إحنا ..

* طول عمرها تتغذى (الأرضة) بالخشب ومع ذلك جربت (الحجر) ..

* (شلاقة) منها جربت الحجر ولكنها فشلت فعادت للخشب ..

* وبما أن (هذا هو هذا) فان للمريخ شرف (تجريب) الممتاز رغم إنو طول عمره يتغذى بالخشب .. أقصد يتغذى بكأس السودان ..

* يأكلوا في (الخشب) الذي هو (كأس السودان) العمر كلو، ومرة مرة بيشتهوا (الحجر) الذي هو (كأس الدوري) ..

* لا نلوم المريخ في هذا (التجريب) لأن (الأرضة قد سبقته وجربت الحجر) ..

* لكن كمان لازم تعرفوا إنو الناس مقامات وكل زول يمد كراعو قدر كأسو ..

* وغايتو جنس غايتو ..

* إحنا وأولاد حلتنا أطلقنا على عملية التجديد لنزار حامد وصهيب الثعلب التى تمت بالأمس أطلقنا عليها إسم (الرز اللاصق في الحلة) ..

* هكذا أطلقنا عليها ..

* وأي زول طبعاً حر في (إطلاقاتو) ..

* فاجأ رئيس نادي الهلال الكاردينال الجميع وهو يجدد للثنائي نزار حامد وصهيب الثعلب ..

* هذه الخطوة فرحتها عندنا لا تقل عن فرحة اللقب الغالي..

* والفرحة فرحتين.. فرحة التجديد وفرحة السرية والسرعة التى تعامل بها الكاردينال ..

* بعد (48) ساعة فقط من نهاية الدوري الكاردينال جدد لهذا الثنائي ..

* بعد أسبوع وثلاثة أيام من (شكوى أيمن عدار) جدد الكاردينال للثنائي ..

* بالمناسبة .. قالوا في السوق ظهر (تي شيرت) جديد إسمو (شكوى أيمن عدار) ..

* والله صحي ..

* الكاردينال (إشتغل صاح) وهو يبدأ بالتجديد لأحرف (اتنين) في السودان (نزار والثعلب) ..

* أو قول: (الثعلب والثعلب) ..

* نزار ذاتو ثعلب ..

* هدف نزار حامد في شباك سموحة المصري ما بجيبو إلا ثعلب ..

* نزار حامد لاعب من طابقين ، والثعلب لاعب بعقلين ..

* وما في أجمل من كده ..

* قفل الكاردينال الباب أمام كل الإجتهادات بهذه الخطوة الذكية ومؤكد أن الدور جاي على أبوعاقلة وبشة الصغير ومؤيد الصيني ووليد الشعلة والشغيل ..

* وأنا حقيقة أوصي الكاريدنال بمؤيد الصيني كما أوصيه بنجم الأمل عطبرة (سليم) ..

* سليم لعاااااااااااب وسيضيف الكثير للهلال ..

* إذا كان الهلال غير محتاج لسليم في الوقت الراهن فيجب تسجيله وإعارته للأمل ..

* زي سليم ما بيجي كتير في ملاعبنا فهو نجم من (مشتقات) مهند الطاهر وهذا يكفي ..

* التجديد لنزار والثعلب شال من قلوبنا هموم كتيييييرة ..

* كده ماشين صاح ..

* المهم ..

* أنا ما عارف هل الإتحاد العام ممكن يستبدل المريخ بهلال الأبيض في مباراة السوبر بالامارات ؟؟

* هل الشغلانية دي ممكنة ؟؟

* أنا طبعا عارف هي ما ممكنة لكن برضو حابي أسأل ..

* البيسأل ما بتوه ..

* لو ممكن يبقي هلال الأبيض وجه مشرف ..

* لأنو المريخ ح يفضحنا ..

* ديل كورتهم شلاليت ساكت ..

* والحمدلله الناس شافت لقطة صلاح نمر ورمضان عجب وأمير كمال وهم يحاولون (نطح) الحكم في مباراة القمة الأولى ..

* حركة (النطح) دي وارد جدا صلاح نمر يعملها للحكم الاماراتي.

* والحركة دي بالذات لو نمر عملها في الامارات ح يخرب علاقتنا بالأخوة الاماراتيين ..

* حتى لو ما نطحوا الحكم ممكن يقدموا شكوى (غلط) ..

* ح يفضحونا مع الخليجيين ..

* والمريخ ما فريق بيمشي يلعب بره ..

* عشان كده أنا شايف كان من الأفضل إنو السوبر يكون بين الهلال وهلال الأبيض ..

* سوقوا هلال الأبيض وقولوا ليهم ده المريخ ..

* أصلاً ما في زول في الامارات بيفرز المريخ من الما مريخ ..

* المباراة لازم تكون قمة في كل شئ ..

* ولازم نلعب كورة سمحة ..

* والمريخ من معوقات الكورة السمحة ..

* الحاجة دي معروفة ..

* دايرين شلاليت سوقوا المريخ ..

* وغايتو السنة دي بالذات يا متنا من الضحك ويا كمان الضحك كلتنا ..

* اليوم الفصل في استئناف مدفور البلد ضد قرار اللجنة المنظمة التي رفضت شكواه شكلاً ..

* ولجنة الاستئناف لن تجد معاناة في رفض الاستئناف في اقل من ربع ساعة ..

* إجتماع اللجنة اليوم ممكن ما يزيد عن العشرة دقايق ..

* إجتماع لا يحتاج لقعدة ..

* ولكن ننصح المريخ أن يقوم بتصعيد الشكوى للمحكمة الدولية بلوزان ..

* قضية زي دي ما تسكتوا عليها ..

* لازم تصعدوها لأبعد الحدود ..

* وفي النهاية ما ح تلقوا ولا سجم الرماد ..

* وما تنسوا .. السنة دي ما عندكم تسجيلات ..

* اقعدوا اتفرجوا بس ..

* الفرجة سمحة برضو ..

* أي لاعب بينتظر المريخ الممنوع من التسجيلات يكون ما عندو موضوع بس ..

* سامع يا السماني الصاوي ..

* ونركب صافنات ونجيبة (بديرية) واصلو الزول بيموت والذكرى تفضل حية ..

* و..و..

* والارضة جربت الحجر ..

قد يعجبك أيضا
اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد