نظموا كنبة الاحتياطي وخطوات تنظيم للدور التاني
تغريده واتساب
بقلم : معاذ ابومؤيد
نظموا كنبة الاحتياطي
وخطوات تنظيم للدور التاني
معقولة يا ناس الحاصل في دكة الاحتياط
معقولة المدرب يشمع و الكنبة مليانة دبابات من الحجم العائلي
الفريق العندو رغبة يمشي لي قدام يوزع التخصصات ويوزع المهام
مافي داعي لشغل فرق الحلة…
الاداري اداري والفني فني واللاعب لاعب والجمهور عارفنه شفت وعارف واجباتوا
لم رفعوا التغيير تقول رفعوا جركانة بنزين في ناس جرت علي الحكم جنس جري
جارين لي شنو وعشان منو
عشان الماسورة ولاعشان في غلط في الرقم في السبورة!!
ولاعشان تحللوا حق السمسرة…..
التغير دا من اختصاص المدرب ما من اختصاص الإدارة
كنبة الإحتياطي بتاعة لاعبيين ومدربين فقط فقط فقط
ما كنبة مواصلات ولا كنبة مصالح
فهمت ولانعيدوا ليك يا المطير عينيك
وما محتاجين تبريرات في الصحف
محتاجين تفضي لينا الكنبة …
????
وشريط المباراة دا لو وصل الاتحاد الافريقي بتجينا عقوبات إدارية ماعقوبات شماريخ
الجمهور وصلنا ليه رسالة الشماريخ واستوعب الدرس وسجارة ماولعها في الميدان
لكن الناس القاعدة تضر فينا وفي المريخ الكيان
البفهمها منو!!!!
بالمناسبة موسم الهجرة الي الحبشه فاتح للناس العندها مصالح
بدل تدخلاتك الفنية
شوف تجارتك وامورك المالية….
?????
اتعبتنا معاك حس شويه بالله عليك
وورينا (جمال) خطوة رجليك
عندنا (جمال )جاي من هناك
ماتمشوا بعيد يا شفوت امكن (جمال) خطوات اخرى
الزبدة انو ريحة سمسرتك فاحت
والمريخ مضرر منك
والجمهور خلاص بقى يشوفك عشرة عشرة
قدامنا مباراة مهمة بالله كدي حاول ابعد حبة ومانشوفك في الدكة
ولو سافرت رحله استجمام تكون ماقصرت
?????
اها نجيكم ياشفوت
المامنكم والله من الزعل بيموت….
جاهزين للجاي عندنا مهمة صعبة
خلاص احتفلنا بتاهلنا واحتفالنا بتاهل الاهله طبعا قاصد ناس الاهلي (شندي )
ماتسرحوا وتمشوا بعيد
نحن قلنا احتفالتنا مابتزيد عن الأربعة وعشرين ساعة
يلا خلاص انتهى الزمن نجمع الورق ونشوف المادة البعدها بمناسبة اجمع الورق بالتوفيق لطلاب الشهادة السودانية عندنا فيهم شفوت لحدي مباراة السطايفة يارب يلحقونا حناجر الشباب مهمة
?????
المرة دي عايزين الحشد فوق الخمسين الف طبعا حيتحقق الرقم عشان جيرانا حيجوا يتفرجوا معانا
لانه ضاربهم الهواء وجواهم زعل المغادرة ونفسهم يشوفنا طايرين زيهم
ما مهم احساسهم نحن واثقين في التيم وفي اللاعبين
خليهم يحضروا ويتحسروا وبطنهم تغلي من جوة اصلو الحقد دفين
ماعايزين اي دقسة ورخوة
لو المكان اتملا نطلع فوق كتوف بعض كل شفت يشيل شفت خفيف فوق كتفه يبقوا الشفوت طابقين والاستاد طابقين…..
في دلع اكتر من كدة
نفرة مباراة الدور الاولي عايزين نضاعف المجهود في الدور الجاي
ناس الجزائر محتاجين زيادة لياقة …
????
مسيرة الدعم ما زالت متواصلة وقروب الصفوة ٣ مع فرحة الانتصار يفرح خزينة النادي بعشرة مليون دا الكلام..
الرشيد الطاهر الايام دي فرحاته كترت
دخل مباراة ونفرة قروبات وصعود للدور التاني
شكرا صفوة ٣ بقياده الشريف و صحبه في القروب ودي نفرتهم الثانية الاولى تسعة مليون
والتالتة احتمال تصل النادي قبل مباراة الجزائر ويكون المعدل في زيادة
وما ننسي ناس ناديك يناديك ديل كمان ماشاء الله تبارك الله ديل استثمار حقيقى ودعم فعال وافكار تطبق علي ارض الواقع
يلا كلنا نشد الهمة مريخنا فوق للقمة
المباراة الجاية محتاجة كل القروبات
كل قروب عنده مدرج جاهز ليه
????
ختاما
خففوا الكنبة عشان مركبنا ماتغرق
الأوزان التقيلة دي بتغرق المركب
????
ونحن علي المدرج ونشجع ونتفرج بس فجأة ناس الألتراس مالقيناهم
الشباب ديل قلبهم علي الزعيم
معقولة يمشو وناس الاحجام العائلية قاعدين
رسالتكم وصلت يا ألتراس بس رسالتكم كان تكون بعد المباراة
المريخ محتاج لحناجركم
محتاج لااصواتكم
روقوا المنقة حبة
وقضيتكم قضيتنا ولم نشوفكم بنطمن
لكن تصرفكم شبيه بتصرف حاج موت
كلو زول كايس حقه بفهمه وطريقته!!!
اختلفت الاسباب والمتضرر الزعيم
نعاين للكيان ولي قدام
وننسي تصرفات بعض الاقلام
????
خارج النص
ابحلقوم وابجضوم الحلة فوق النار ماعايزين نفسد فرحة الشفوت والثوار….
حلتكم قربت تنجض!!!
بس قدامنا المهم والاهم ….
جاينكم واحد واحد اي زول بتاع مصالح وعنده رغبة في الاسترزاق والضرر بالزعيم احسن يتخارج بدري بدري
الشفوت واعين تمام وعندهم صوت وحنوصل كل حرف حاسين بيه عشان الماسمع يسمع
لنا عودة…..
