نفس الملاح في الوجبتين !!

بالعربي الكسيح
محمد الطيب الأمين

* في كثير من البيوت السودانية (ملاح الغداء ياهو ذاتو ملاح العشاء) ..
* طبعاً حالياً بقى ما في غداء، (فطور وعشاء فقط) ..
* حتى الطبيب زمان بكتب ليك حبة بعد كل وجبة (يعني تلاتة حبات) ..
* هسه الطبيب بقي يكتب (حبتين) وهذا تأكيد على أن الشعب السوداني بياكل وجبتين ..
* وفي ناس الوجبتين في تلتلة ..
* المهم.. كنا بنضايق كثيراً عندما يكون (ملاح الغداء هو نفسه ملاح العشاء) ..
* صعب جدا تأكل (فاصوليا) في الغداء وتجي تأكلها في العشاء ..
* قاسية جدا تأكل (بامية طبيخ في الغداء وتجي تأكلها في العشاء) ..
* ممكن تكون البامية ثابتة في الوجبتين لكن الغداء بامية طبيخ والعشاء بامية مفروكة ..
* البامية ياها لكن التنوع مهم ..
* والله كونو الغداء والعشاء من نفس (الحلة) صعبة علينا ..
* الآن قدر الهلال في دوري النخبة أن يأكل في الغداء والعشاء من نفس الحلة ..
* في دوري النخبة (غدانا وعشان من نفس الحلة) ..
* ملاح واحد ..
* والله صحي ..
* مريخ الفاشر ومريخ هنا ..
* نفس الطبيخ ..
* نضرب في الغداء بامية ونجي في العشاء نضرب نفس البامية ..
* وهذا يتطلب من الهلال ان يستعد بشكل أكبر لمواجهة المريخين ..
* دي (6) نقاط شبه مضمونة ..
* وبصراحة مريخ الفاشر أصعب لينا من مريخ العرضة الشهير ب(المدفور) ..
* ضرب مريخين بهلال واحد سيكون متعة حقيقية ..
* بكرة مريخ السلاطين والجمعة الجاية مريخ الحكومة ..
* الهلال مطالب بأن يقفل ملف وداعه لبطولة كأس السودان ..
* ومطالب بأن يصالح جماهيره من خلال مباراة اليوم ومباراة الجمعة الجاية ..
* الخروج من كأس السودان لا يعوضه إلا مرمطة المريخين في دوري النخبة ..
* وأهم ما تحتاجه المباريات القادمة هو التشكيل الصحيح ..
* التشكيلة التي لعبت بسنار هي لا تعتبر الأفضل ..
* تشكيلة الهلال الأمثل لابد أن يكون فيها شيبوب أساسياً وكذلك بشة الصغير ومحمود امبدة ..
* وأهم حاجة السموأل يكون مافي ..
* إبعاد السموأل (المشطوب وما مشطوب) أهم حاجة ..
* كذلك يجب إبعاد الطاهر سادومبا ..
* سادومبا رغم أن لمسته جيدة إلا أنه في الغالب يتسبب في هنات كثيرة ..
* الهلال مطالب بأن يقدم المريخين هدية للجماهير التي لم تهضم فكرة وداع الفريق لبطولة كأس السودان ..
* الجدية في التدريبات والقوة والروح العالية هي طريق الهلال نحو تحقيق الانتصارات وصولا للكأس في هذه النسخة الجديدة كليا ..
* نحن نستغل مريخ الفاشر لتخويف مريخ العرضة ..
* نضرب مريخ الفاشر بقسوة عشان مريخ العرضة يفكر في الانسحاب ..
* بالمناسبة.. ناس المريخ استعجلوا علي الوفاق ..
* استجعلوا شديد ..
* لو صبروا أسبوع واحد كان الهلال بيحل كل مشاكلهم ..
* هزيمة المريخ امام الهلال المتوقعة كانت ستطيح بالمجلس المنتخب دون وفاق ..
* المهم ..
* قبل أسبوع من مباراة القمة مجلس المريخ يستدعي سيف تيري وحمزة داوود المتوقفان عن التدريبات ..
* أول مرة في التاريخ لاعب يتسجل لنادي ويتوقف عن التدريبات في نفس الاسبوع الاتسجل فيهو ..
* دي ما حصلت قبل كده ..
* اتسجل ووقف عن التدريبات ..
* مثل هذه الاشياء لا تحدث إلا في المريخ ..
* سيف تيري اللاعب الذي سجلته الحكومة في كشف المريخ ربما يكون توقف عن التدريبات بأمر من الحكومة التي لا تريد مجلس قريش ..
* يعني سيف تيري أشبه بالورقة الانتخابية التي استخدمتها الحكومة فيما يتعلق بابعاد مجلس سوداكال وتمكين مجلس ود الشيخ ..
* علي العموم الوفاق لن ينحج في المريخ وستكون هذه بداية النهاية للمريخ ..
* ونهاية المريخ الحقيقية ستكون تحت اقدام بشة وشيبوب بعد اسبوع من الآن.
* والسنة دي بالذات يا متنا من الضحك ويا كمان الضحك كتلنا ..
* عموما .. مباراة الهلال اليوم لن تكون سهلة لأن مريخ الفاشر جدد جلده ويحلم بتحقيق نتيجة ايجابية ..
* الهلال مطالب بأن يشهر العين الحمراء ويبسط هيبته حتى يضع كل فريق في علبه ..
* التساهل والتراخي يغري كثير من الاندية ويجعلها تطمع في الهلال ..
* اضربوا مريخ الفاشر عشان مريخ الحكومة يخاف ..
* ونركب صافنات ونجيبة (دارفورية) وأصلو الزول بيموت والذكرى تفضل حية ..
* و..و..
* وابقوا الصمود ما تبقوا زيف ..

التطبيق               

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app 

17756 حملو التطبيق

على متجر apkpure

https://apkpure.com/ar/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9/net.koorasudan.app

على متجر facequizz

http://www.facequizz.com/android/apk/1995361/

على متجر mobogenie

https://www.mobogenie.com/download-net.koorasudan.app-3573651.html

على متجر apk-dl

حمل تطبيق كورة سودانية لتصفح أسرع وأسهل 

لزوارنا من السودان متجر موبايل1

http://www.1mobile.com/net.koorasudan.app-2451076.html

2,456حملوh

http://apk-dl.com/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9

على متجر apkname

https://apkname.com/ar/net.koorasudan.app