نقل مباشر من إستاد الهلال (صورة وصوت) قولوا ما شاء الله

صابنها
محمد عبدالماجد
نقل مباشر من إستاد الهلال (صورة وصوت) قولوا ما شاء الله

· افضّل ان نطلق عليه اسم (استاد الهلال) – فليس هناك اجمل من الاقتران بالهلال او حتى التشبه به – فالتشبه بالهلال فلاح.
· دا بالنسبة للناس التانين القاعدين يقلدوا في الهلال في كل شيء.
· نقول الزعيم يقولوا الزعيم.
· نقول سيد البلد يقولوا سيد البلد.
·نقول نادي الوطنية يقولوا نادي الوطنية.
· نقول نادي الخريجين يقولوا نادي الخريجين.
· ديل هلال الملايين لحقونا فيها.
·نقول نادي الشعب يقولوا نادي الشعب.
·كمان دي عاوزين تلفحوها.
·نادي الشعب مسيطر عليه (الدعم السريع)!!
·دي يطرشني منها.
.شوفوا الكلام الخطير دا (كشفت مصادر مطلعة لـ (مونتي كاروو) ان قوات الفرقة التاسعة مظلات التي يقودها اللواء الركن طارق يوسف (الدفعة ٣٩) ، الحقت جزء من قواته الى شعبة العمليات الحربية التي تكون مجمعة من وحدات مختلفة يتم تقسيمها وتوزيعها من العمليات الحربية والمسؤول عن هذه القوات في مدينة أم درمان قائد منطقة امدرمان المركزية وقائد سلاح المهندسين اللواء الركن هشام درنكي، وهشام درنكي من الشخصيات التي دخلت الى الوسط الرياضي حديثاً، ويرتبط بعلاقة خاصة مع اللواء بقوات الدعم السريع نور الدين عبد الوهاب المقرب من حميدتي وكلاهما (درنكي ونورالدين) انضما لمجلس إدارة نادي المريخ برئاسة حازم مصطفى، وتخضع القوات الملحقة بالعمليات الحربية في أم درمان لتعليمات قائد سلاح المهندسين).
·المعروف ان هذه القوات شاركت في قمع المتظاهرين في ام درمان.
·الكلام دا خلوه ..بنرجع ليه تاني.
.خلونا هسع في استاد الهلال.
· مع ذلك لا اعتراض لنا على اسم (الجوهرة الزرقاء) تقديرا لما قام به رئيس الهلال السابق اشرف الكاردينال الذي لا يمكن ان ننكر له هذا الفضل.
·يظل استاد الهلال يمثل لنا قيمة كبيرة – نحس فيه بالوطن – فهو وطننا الذي نلتقى فيه بدون اختلاف.
·تتخيلوا بحسبة بسيطة جدا – يمكن ان نختلف في أي شيء وفي أي مكان.
·المكان الوحيد الذي لا نختلف فيه او حوله هو استاد الهلال.
·كلنا لمن نكون في استاد الهلال بنحس بالألفة والقرابة.
·الشاي ببقى (قطاع عام).
·والقهوة بتبقى شراكة.
·في استاد الهلال ممكن تلاقى ليك زول (غريب) لم تلتق به قبل كدا – مع ذلك بتحس نحوه بالألفة وتشعر بالمعرفة – زي كأنك بتعرفو من الف سنة.
·تقعدوا تحكوا وتقصوا وتتونسوا طول زمن المباراة.
·وقت المباراة تنتهي يمكن تكون ما سألت الزول وقلت ليه انت اسمك منو او انت من وين؟
·الحاجات دي كلها في استاد الهلال ما مهمة – تسقط القبيلة وبتبقوا اخوان في الهلال.
·بتقوم او تطلع من الاستاد من غير ما تشيل رقم تلفونو …ما في زول عاوز ليه شيء من زول – أي حاجة بتنتهي مع المباراة.
·الزول دا ممكن تلاقيه تاني في الاستاد وممكن ما تلاقيه.
·المهم أي زول بتلاقيه في المدرجات بكون زولك.
·استاد الهلال عندو (الفة) قريبة.
·احلي شاي.
·احلى قهوة.
·بتشربها في استاد الهلال.
·احلى لحظة ..ساعة التسخينة.
·كنا بنتسابق في معرفة التشكيلة منو اللاعب ومنو القاعد برة.
·الوقت داك ما كانت في مواقع تواصل اجتماعي ولا كان في تلفونات ..التشكيلة بتعرفها من الملعب.
·وكان في تلك اللحظات دائما بنط زول من الصف القاعد فيه ..او ممكن يكون من الصف الخلفي او الامامي ويسأل اللاعب اللابس رقم (12) دا منو؟
·اتذكر الاستاد كلو كان بقوم فيه ..وبقول ليه اسم اللاعب الذي يرتدى هذا الرقم وهم بيستهجنوا كيف لهذا المشجع ان لا يعرف صاحب هذا الرقم.
·الكلام دا زي الحاجة العيب.
·عشان كدا مرات وقت تكون ما عارف اسم اللاعب الذي يرتدى فانلة برقم محدد بتسكت وما تسأل.
·او تسأل من تحت نخرينك.
·او تجيب معاك (الراديو) عشان تسمع الرشيد بدوي عبيد وهو بعلق على المباراة وأنت بتحضر فيها من الاستاد.
·تحضرها صورة وصوت.
.الحتة دي كانت جميلة.
.الناس ما عندها صبر.
·عاوزة تشوف وتسمع في نفس الوقت.
·تسمع صوت الرشيد بدوي عبيد وهو بعلق على المباراة وأنت في الملعب بتحضر في المباراة زي الشاي باللبن.
·حاجة روعة.
·خلطة عجيبة.
·نحن كان عندنا هذا الهوس.
·عشان كدا استمتعنا بالهلال.
·مرات بحس ان الاجيال الجديد ما استمتعت بالهلال متلنا ..وما شافت حاجة لكن تاني برجع وأقول أي جيل عندو طريقة مختلفة في الاستمتاع بالهلال.
·متابعة المباراة من خلال مواقع التواصل الاجتماعي برضو فيه استمتاع.
·الدقيقة كم؟
·وقت تقوم وتطلع و تخش تاني وتلقى الهلال جاب قون.
·ما في أي احلى من كدا.
·غايتو نحن الهلال دا اصلو ما قصر معانا.
·واي زول ما بحس بهذا الامر – مفروض يراجع حساباتو.
·والله ما في اجمل من الهلال.
.نسيتوني هسه الموضوع العاوز اتكلم ليكم فيه.
·زي طولت عليكم.
·بس قبل ما ادخل ليكم في الموضوع – اقول ليكم زمان وقت نزور الخرطوم كانت زيارة استاد الهلال عندنا اهم شيء.
·لو ما جيت استاد الهلال ما بتعتبر نفسك مشيت الخرطوم.
·تحضر ليك مباراة.
·او تمرين.
·وتعاين للمدرجات والحيطة بتاعة الاستاد زي كأنو بينكم علاقة.
·تشرب ليك شاي.
·وتشجع الهلال.
.وتصفق.
·وتنطط كمان.
·بتشعر بالحنين.
·والمعرفة.
·بتحس بالراحة في استاد الهلال.
.امس مع اخوة كرام قمنا بزيارة استاد الهلال – عاوز انقل ليكم الاحساس زي ما هو.
·اكيد بتتابعو الاخبار وبتشوفوا الصور – لكن في احساس ما بتيجبو الصورة.
·ان شاءالله الكلمات تقدر توصلو ليكم.
·اول ما دخلت الاستاد وجدت في عدد قليل شغال في تركيب الكراسي على المدرجات.
·قلت مالهم شوية كدا.
.العدد دا ما بنجز المهمة.
·بعدين شعرت ليك الموضوع ما كبير زي ما هو منقول على مواقع التواصل الاجتماعي.
·لسه بركبوا في الكراسي.
·الموية كاسرة ومترعة.
·والشبكة زي ما هي.
·والمظلات التى تواجه النادي لسه ما في حاجة جديدة عليها.
·ما في حاجة شدتني.
·لكن وقفت في اللون الازرق الذي يجمّل الملعب …لون عجيب ..تشعر بالرهبة والهيبة.
·ازرق هدر.
·النجيلة (مرتبة) بس…(لحاف) يعني ..عشان الامور تبقى ليكم واضحة.
·قولوا ما شاءالله.
·وقت تضع كراعك عليها زي كأنك بتضع كراعك في حلاوة لكوم.
·ازو حلاوة قطن.
· قولوا ما شاءالله.
· لكن تاني رجعت قلت الموضوع عادي.
· اكثر من ثلاث ارباع الملعب اترصت كراسي زرقاء.
· واي زول شغال بإخلاص وحب ..مع قلة العدد.
· برضو عادي.
· ونحن مرات بننفخ ساكت.
· الى ان وجدت اسماعيل عثمان والبروفيسور السر مع الزملاء محمد الجزولي وعمر الطيب والإخوان عصام وهيثم السنوسي وقمنا بجولة داخلية على الملعب.
· شعرت لي بي نفسي في فيلم اجنبي.
· للأمانة وجدنا هناك عمل ضخم يتم بالداخل ..ما في زول شاف الحاجات دي ولا في زول شاعر بيها.
· الكلام دا حالتو بدون عيادة الطوارئ المجهزة طبيا بالآسرة والأجهزة الطيبة التى لم ندخلها لأنها مغلقة.
· حالتنا ما شفنا العيادة.
· مشينا على الكافيتريات فوجدنا تجهيزاتها تتم بصورة سوف تجعل المشجع في رحلة سياحية ممتعة عندما يكون في استاد الهلال.
· تاني جيبوا أسركم معاكم…اطفالكم واولادكم.
· ح يستمتعوا بالكافيتريات.
· على ما اعتقد هناك حوالي خمس كافيتريات داخلية كبيرة في الاستاد..اتمنى ان يشرف عليها مختصين حتى تقدم للجماهير افضل الخدمات.
· الغريب ان الكافيتريا كبيرة – يمرح فيها الحصان لمن يتقطع نفسو.
· دخلنا لينا في ممرات زي كأنك في مانشيستر.
· طلعنا.
· رأسنا لفه .ما عرفنا نحن وين؟
· دخلنا على غرف اللاعبين وجدنا 25 دولاب مع الحمامات والثلاجات.
· غايتو ناس بي ان سبورت ..لقوا ليهم موضوع.
· الدوري الانجليزي بس.
· طلعنا من غرف اللاعبين مشينا على غرفة الحكام..غرفة بي (فارها).
· غرفة فحص المنشاطات بي شاشتها.
· غرفة المراقب.
· وكل هذه الغرف مداخلها وممراتها منفصلة.
· اصبروا يا جماعة..ما تلخبطوني خلوني انقل ليكم الصورة.
· ركبنا الاصانصير ..فجأة لقينا نفسنا في حتة غريبة.
· جناح كبار الضيوف …مقاعد ورؤية مختلفة.
· غايتو البطلع هناك تاني ما بنزل.
· مشينا عن طريق السلم الى غرفة الاعلاميين ..غايتو لو كتبت ليكم من هناك …بكتب ليكم بالهندي.
· عرفت ليك ليه الهنود ديل وقت يغنوا بتقلبوا في النجيلة.
· نفس الشيء.
· نزلنا مشينا لقاعة المؤتمرات الصحفية.
· تشتهى السؤال.
· طلعنا تاني..شفنا غرفة المراقبة وشاشة مساحتها نص المقصورة الرئيسية.
· نزلنا.
· عملنا الموضوع شغلة.
· شفنا غرفة التلفزة.
· وغرفة ناس الاذاعة.
· غايتو الرشيد بدوي عبيد لو قعد في الغرفة دي اقل مباراة بطلع فيها الهلال فائز بالخمسة.
· ما عاوز اكتر ليكم الحاجات اكتر من كدا.
· منتظر اضاءة تركي ال الشيخ.
· منتظرين مقاعد البدلاء والمضمار الازرق.
· تتخيلوا الاستاد سوف يصبح كيف بعد كدا؟
· المهم الشغل دا عاوز متابعة ومراقبة.
· في حاجات كتيرة اتسرقت.
· وفي حاجات كتيرة باظت.
· ان شاءالله بعد هذا المجهود …يتم اجازة هذا الملعب.
· ما عشان في حاجة ناقصة..كل المتطلبات تم تنفيذها.
· ولكن عشان في حاجات تانية ممكن تتدخل.
· افريقيا دي اصلو ما مضمونة.
· الجميل ان العمل مازال مستمر..وهناك تجهيزات تتم في الخارج للأبواب ومواقف السيارات.
· غايتو الهلال لو لعب في ملعبه ..من هسع ح اقول ليكم ح نحقق البطولة.
· دا ملعب عجيب.
· خاصة لمن هذه المدرجات تزدان بجماهير الهلال.
· كل الناس في الهلال اسرة واحدة.
· البروف والعامل.
· بيكو واسماعيل.
· زهرة وجمهور الهلال.
· كل الناس بتعمل بحب.
· الهلال اسرة ممتدة.
· احفظوا هذا الشعار (الهلال اسرة ممتدة)…بقولوا ليكم طوالي ..ناس المريخ ما يقوموا يلفحوه.
· ………….
متاريس
· ما عاوز اتكلم اكتر من كدا.
· عاوز اخلي لي شوية كلام للمضمار.
· يمين الاهلي المصري يلعب في استادنا دا ..يأخذ التلاتة تاني.
· متعودة دائما.
· وكان للمريخ ..لمن غرف اللاعبين تقع ليهم بكونوا اخذوا اربعة.
· من هسع يا ناس المريخ.
· الاستاد دا عاوز ليه لاعب يشيل الكورة ويتخارج.
· دا حلكم الوحيد.
· …..
· ترس اخير : قولوا ما شاءالله.