هدف الغوريلا في المريخ.. وينوو..؟!!

كرات عكسية
محمد كامل سعيد
هدف الغوريلا في المريخ.. وينوو..؟!!

# واصل الهلال انتصاراته في بطولة وسط وشرق افريقيا (سيكافا) المقامة حاليا برواندا..
# ممثل السودان تغلب على (كي. في. زد) الزنزباري برباعية نظيفة.. وبالتالي فقد اقترب من الوصول للمربع الذهبي..
# المربع الذهبي.. يعني قبل النهائي.. كما انه يعني ان هنالك مباراة واحدة (حال التأهل) ستفصل الهلال عن النهائي..
# اها.. ده الكلام اللي بيجنن (الناس ديييللك)..!!
# يعني من هسه ح نكون على موعد مع ارتفاع نغمة رعاية الهلال للبطولة.. وأن عمليات الشراء قد تمت بنجاح..!!
# طيب.. نسبَيب الهلال في حالو.. ونتحول للمريخ اللي بدا مبارياته الودية استعدادا للموسم الجديد.. ده كلام كويس خالص خالص..
# المريخ لعب مباراة ودية امام منو..؟! اما غوريلا الرواندي.. غوريلا تاااتي..؟!
# ااي غوريلا تااتي.. عندك اي مانع.. (لا لا العفو ما عندي اي مانع).. “واصل واصل.. بدون فواصل”..!!
# “واصل واصل” دي على وزن (عبارة كده) (خلينا ساكتين.. ما عايزين تجيب اي سيرة ليها ولا لاي حاجة)..!!
# لا يا حبيب.. جيب السيرة.. قصدك شنو انت..؟! ما تقول الكلام مباشر..!!
# قصدي ان العبارة دي يتذكرني هتاف: (الرذيس الطوالي).. عرفت كيف انك ظلمتني.. (عموما انا عافي ليك)..!!
# المريخ فاز على غوريلا بخمسة اهداف مقابل هدف.. (كلام زي العجب) اها (زي العجب) دي كمان ما بتذكرك بي أي حاجة..؟! لا ما بتذكرني..!!
# عموما لم أشاهد لا مباراة الهلال والفريق الزنزباري في سيكافا.. ولا لقاء المريخ والغوريلا الودي..!!
# لكنني شاهدت لقطات لأهداف الهلال وعدد من اهداف المريخ التي غاب عنها هدف الغوريلا.. لماذا..؟! والله ما عارف..!!
# لاحظت علي اللقطات القصيرة للمريخ.. ان ناشرها تعمد التركيز على تمرير أفراد المريخ للكرة فيما بينهم..!!
# (استحواذ سلبي يعني).. تمرير الكرة في مناطق المريخ وعلى النصف الخاص به (يبقى استحواذ سلبي)..!!
# الهدف الاول للمريخ مثل الهدف الاول للهلال.. جاءا من ضربتي جزاء.. هدف المريخ الأول لم نشاهد المخالفة فيه.. على عكس ضربة جزاء الهلال التي كانت صحيحة..!!
# احد اهداف المريخ جاء من خطا للدفاع.. بجانب ان هنالك هدف كان ملعوب بطريقة جميلة.. لكن يظل السؤال قائما: اين هدف غوريلا..؟!
# عموما.. اعتقد ان رفض المريخ المشاركة في سيكافا، كان قرار غير موفق.. خاصة وان الفريق لا يزال يبحث عن تجارب ودية تدخل في إطار الإعداد..!!
# عموما.. تمنينا ان نشاهد هدف غوريلا في شباك النريخ خلال اللقاء الودي الذي اقيم ظهر الأربعاء، لا لشئ سوى لأجل معرفة جوانب القصور.. والسعي لتصحيحها..
# الهلال لم يستقبل حتى الان خلال مباراتين اي هدف، رغم حداثة عناصر الدفاع.. ومشاركة محمد مصطفى وفريد كل في مباراة..!!
# لاحظت ان لاعب الهلال الجديد (قودوين) على ما اعتقد، يملك مهارات عالية في صناعة اللعب ويتميز بالتمريرات الحريرية للمهاجمين..!!
# كما أن مدافع المريخ الأيمن (ابو شعر مصبوغ) يمتلك مهارات عالية وإمكانيات مبشرة..!!
*كلمات ساخنة جدا:*
# أشرك المريخ والهلال خلال مباراتي الأربعاء، كمية كبيرة من المحترفين.. وعمليا، فقد تضاءلت فرص اللاعبين الوطنيين..!!
# الفرق ان اي انتصار يحققه الهلال، يقربه من لقب سيكافا.. بينما انتصارات المريخ لا تقربه الي اي شئ، او كما قال الصربي..!!
# لو كنت مكان اللجنة التسيرية “فاقدة الشرعية” بالمريخ لوافقت على المشاركة في سيكافا..!!
# وذلك لضمان اداء خمس مباريات على نفقة منظمي البطولة.. (ااي الهلال) بجانب الاستفادة من الاحتكاك والسعي لزيادة الالقاب..!!
# لكن يبدو أن الخوف والرعب من الطيران.. بيعمل أكثر من كدة.. ولا تسألوني (طيران شنو)..؟!
# عليك الله.. طيران شنو..؟! ورينا ما تدس كلامك..!!
# طيب قصدي الطيران امام الهلال بسبب كسب الشكوى الأخيرة في النكبة..!!
# نال المريخ لقب الممتاز الاخير عن طريق الشكوى تلايزال الأمر بين يدي الإتحاد).. الشئ الذي تسبب في تصاعد الغضب بين جميع الشرائح المنتمية للهلال..!!
# لاعبون.. إدارة.. أعلام.. مشجعون بشقيهم.. والجمهور..!!
# الغضب داك ممكن يتفجر في الملعب، حال وقوع المريخ مع الهلال في مجموعة واحدة.. أو تواجد الأحمر في مسار الهلال..!!
# اها هناك.. في سيكافا.. ماااافي شكاوى، ولا طعن في اجانب او مجنسين..!!
# خاصة وان الهلال هو الممول الأول للبطولة.. وبالتالي على حسب وجهة نظر بعض المريخاب، فإن الهلال هو (سيد الرصة والمنصة)..!!
# نرجع لي مرجوعنا.. المريخ وعقب اعتذاره عن المشاركة المجانية في سيكافا.. شرع البحث عن تجارب اعدادية ودية..!!
# التجارب الاعدادية الودية دي بتكلف المريخ الكثير من المال..!!
# تلك الأموال ترتبط مثلا بقيمة ايجارات الملاعب.. وتكاليف الحكام.. والاسعاف وخلافه..!!
# نطلع شوية من القصة دي.. ونقول ان انتخابات الهلال.. حتى ولو كانت مشوهة، او عن طريق عضوية مستجلبة.. تبقى احسن من لجان التسيير..!!
# الليلة برضو التخريمات اجازة.. (لما تنتهي خرمجة اللجنة التسيرية دي)..!!
# سيكافا الحالية بالجد متطورة جدا.. َفيها نقل لجميع المباريات.. وحول الملعب توجد اعلانات ضوئية..!!
# الكلام ده زمااان والله ما كان في.. الدنيا دي اتطورت الا نحنا في السودان…!!
# في السودان نحنا أساتذة في الغلاط والكراهية وبس..!!
# تاني بنسأل: هدف الغوريلا في المريخ.. وينوو..؟!!